Ministeriuneq Naalakkersuisullu siulittaasuat spiralilersuinikkut kannguttaatsuliorsimanermut utoqqatserput

Naalakkersuisut qallunaallu naalakkersuisui kalaallinut arnarpassuarnut ukiorpassuarni akuersititseqqaaratik spiralilersuisimanermut maanna utoqqatserput.

Ministeriuneq Naalakkersuisullu siulittaasuat ataatsimut ima nalunaaruteqarput:

- Ministeriuneq Mette Frederiksen Danmarkip Kalaallit Nunaanni Peqqinnissaqarfimmik 1992 tikillugu akisussaaffeqarnerata nalaani immikkoortitsilluni aaqqissuussaasumik spiralilersuilluni suliaq tunngavigalugu arnanut kalaallinut spiralilersorneqarsimasunut utoqqatserpoq.

- Naalakkersuisut Siulittaasuat Jens-Frederik Nielsen Kalaallit Nunaata Peqqinnissaqarfimmut akisussaaffimmik tigusinerata kingorna spiralilersuinermik suliat pillugit utoqqatserpoq.

Arlaannaannulluunniit attuumassuteqanngitsumik misissuineq suli naammassineqarsimanngikkaluartoq, spiralilersuinermik suliaq kalaalerpassuarnut ilaqutariippassuarnullu kamassaataallunilu aliasulersitsisartoq naalagaaffimmit ilisimaneqartoq, Mette Frederiksenip utoqqatsernermut atatillugu oqaatigaa:

- Suut tamaasa paasinngikkaluarlugit naalakkersuisunut suliaq taanna assut sunniivoq, tassami kalaallit arnat amerlasuut assigiimmik oqaaseqartarput, danskit peqqinnissaqarfiannit kanngutsaattuliorfigineqarsimallutik.

- Pereersimasut allanngortissinnaanngilavut. Kisianni akisussaaffik uagut tigorusupparput. Taamaattumik Danmarki sinnerlugu ima oqarusuppunga: Utoqqatserpunga.

Frederiksen: Sumiginnagaapput

- Niviarsiaqqanut arnanullu kalaaliunertik pissutigalugu aaqqissuussaasumik assigiinngisitsinermik eqqorneqarsimasunut utoqqatserpunga. Timikkut tarnikkullu ikilerneqarneq misigisimavaat. Sumiginnagaasimapput.

- Nalunngilarput aaqqissuussaasumik kalaallinut immikkoortitsilluni pissusilersortarnerit allat nuanniitsut aamma pisartut. Kalaaliunertik piinnavillugu allatut pineqartarput. Danmark sinnerlugu utoqqatserpunga, aammali sumiginnakkat allat Danmarkip akisussaaffigisai utoqqatserfingaakka: kalaallit aaqqissuussaasumik inunnit allanit allaanerusutut aamma kongeqarfimmi innuttaasunut allanut sanilliullutik suunnginnerusutut pineqartartut utoqqatserfigivakka.

- Spiralilersuinermik suliaq arlaannaanulluunniit attuumassuteqanngitsoq qulaajarlugu naammassippassuk, danskit naalakkersuisui kalaallit naalakkersuisui peqatigalugit pisut qanoq ilinniarfigisimanerlugit aamma oqaluttuarisaanermi ataatsimoorullugit oqaluttuassatta nuanniitsortaasa kinguneri qanoq ilinniarfigisimanerlugit aamma qanoq aalajangersimasumik iliuuseqarfigisassanerlugit eqqartuinerput nangissavavut. Spirali pillugu suliami allani aalajangersimasuni aningaasatigut taarsiisoqassasoralugu eqqartueqatigiissaagut.

Jens-Frederik Nielsen kannguttaatsuliorsimanermut utoqqatsertoq

Naalakkersuisut akisussaaqataanerat Naalakkersuisut siulittaasuata Jens-Frederik Nielsenip (D) nassuerutigaa:

- Naalakkersuisut sinnerlugit peqqinnissaqarfitta uatsinnit akisussaaffigineqalernerata kingorna arnat arlallit ajoquserneqarsimanerinut kannguttaatsuliorfigineqarsimanerinullu utoqqatserusuppunga. Ilissinnut eqqugaasunut kingunipilutitsisimasunullu utoqqatserpunga - ilissi nammineq piumasarinagu aqussinnaanagulu pineqarsimanersi pillugu utoqqatserpunga.

- Naalakkersuisut akisussaaffipput nassuerutigaarput. Taamaattumik arnat eqqugaasut taarsiiffigineqarnissaat pillugu aalajangertoqareerpoq. Sulineq januarimili aallartippoq aamma arnat eqqorneqartut qanoq taarsiiffigineqarnissaannik qanittukkut nalunaaruteqartoqassaaq.

Spirali pillugu suliap arlaannaanulluunniit attuumassuteqanngitsunit qulaajaaffigineqarnera 2025-mi septembarip qaammataani tamanut saqqummiunneqarnissaa naatsorsuutigineqarpoq. 

Arnat arlallit spiralilersuisoqarnikuunertik pillugu Danmarkimi nunamut namminermut ministereqarfik aamma peqqissutsimut ministereqarfik taarseeqqullugit 2024-mi marsimi piumasaqarfiginikuuaat.

Qulaajaaneq naammassippat Kalaallit Nunaanni malunnartinneqassaaq.