FOLKETINNGIP AMMAANERSIORNERA
Ministeriuneq: Pereersut nassuerutigaavut. Siunissarlu pillugu ataatsimoorluta
Folketingi pisarnertut oktobarip ulluisa aallaqqaataani ammarneqarpoq. Ministeriunerup niviarsiaqqat arnallu piumassuserinngisaminnik spiralilerneqarsimanerannut utoqqatserneq aamma USA-p Kalaallit Nunaannik soqutiginninnera eqqaavai: "Siunissaq pillugu makittarpugut", oqarpoq.
- Allanngortissinnaanngilarput. Kalaallit arnat meerartaarsinnaanngitsut meerassaannik tunisinnaanngilavut. Sumiginnaaneq taanna allanngortissinnaanngilarput. Akisussaaffilli tigusinnaavarput, Mette Frederiksen Folketingip marlunngornermi ammaanersiornerani oqarpoq.
Assi: Trine Juncher Jørgensen
Folketingip marlunngornermi ammaanersiornerani kalaallit ilaasortat marluk peqataapput. Aki-Matilda Høegh-Damimut (Naleraq) sinniisoq Elvira Kûitse aamma Aaja Chemnitz (Inuit Ataqatigiit) peqataapput.
Inatsisartut siulittaasuat Kim Kielsen nulianilu Judithe, Naalakkersuisut siulittaasuat Jens-Frederik Nielsen (Demokraatit) appaanilu Anika Brandt Sørensen kiisalu naalakkersuisoqarfiup pisortaa Hans Peder Barlach Christensen aamma inersuarmiipput.
Kalaallit Nunaannit aallartitat peqataapput.
Assi: Trine Juncher Jørgensen
Utoqqatserneq inissaminiittoq
Ministeriunerup Mette Frederiksenip (Soc.) Kalaallit Nunaannut attaveqarneq ammaanersiornermi oqalugiaammini eqqartorpaa, tassanilu kalaallit arnat niviarsiaqqallu aaqqissuussaanikkut immikkoortinneqarsimasut qanittukkullu ministeriunermit utoqqatserfigineqartut eqqaavai:
- Allanngortissinnaanngilarput. Kalaallit arnat meerartaarsinnaanngitsut meerassaannik tunisinnaanngilavut. Sumiginnaaneq taanna allanngortissinnaanngilarput. Akisussaaffilli tigusinnaavarput. Sapaatip akunneranilu kingullermi taamaaliorpugut. Naalakkersuisut siulittaasuat peqatigalugu nangaanngilluinnarluta utoqqatserpugut. Aamma Danmarkip inunnut ataasiakkaanut taarsiissuteqarfiusinnaasumik Saammaateqatigiinnissamik Aningaasaateqarfik pilersitsiniarnera nalunaarutigaarput. Pereersut nassuerutigaavut. Siunissarlu pillugu ataatsimoorlu, ministeriuneq oqarpoq.
Susoqaraluarpalluunniit Kalaallit Nunaata siunissani pillugu namminneq aalajangiisinnaassuseqarusunnera tapersersorparput, aamma eqqunngitsumik iliuuseqartunit siooratinneqaraluta ersitinneqalerunnanngilaugt, oqarpoq.
Mette Frederiksen, Danmarkimi ministeriuneq
Amerikamiut soqutiginninnerat
Mette Frederiksenip USA-mit Kalaallit Nunaannik soqutiginninneq ukiup aallartinnerani tusarsaasoq aamma eqqartorpaa.
- Qangalili pisimasutut maanna misinnarpoq. Oqiliallassinnaanngortut immaqa isumaqartoqarsinnaavoq. Taamaattoqanngitsorli isumaqarpunga. Kalaallit Nunaanni taamatut misigisoqanngitsoq aamma oqaatigisinnaavara. Takorluulaaruk sinerissami nunaqarfiit ilaanni najugaqartup qanoq innera. Inuiaqatigiit ikittunnguit.
- Sunut tamanut ungasissumiilluni. Nunarsuarmi naalagaaffimmiit pissaaneqarnerpaamiit pisiarineqarsinnaasutut eqqartorneqarluni. Pigineqarsinnaalluni. Pigineqartariaqartutut isigineqarluni. Taamaattoqarnera toqqissisimajunnaarsitsivoq, ingerlaannarlu qaangerneqarsinnaanani.
Tasiilamiu Elvira Kûitse Naleqqamit sinniisutut Tunumiut amaarnguserluni Folketingip marlunngornermi ammaanersiorneqarnerani peqataavoq. Aki-Matilda Høegh-Damip Inatsisartut ukiaanerani ataatsimiinneranni peqataaniarluni sulinngiffeqarnerani sinniisut pingajuattut novembarip 14-iata tungaanut taartaassaaq.
Assi: Trine Juncher Jørgensen
Aningaasaliissutinut tunngaviusumik isumaqatigiissut
Danmarkip Kalaallit Nunaatalu attaveqatigiinnerisa qaninnerulernissaat kissaatigalugu ministeriunerup oqaatigaa, tamatumunngalu atatillugu isumaqatigiissut tunngaviusoq atsioqatigiissutigineqartoq, Kalaallit Nunaanni attaveqaasersuutinut, illersornissamut, peqqinnissaqarfimmut inuussutissarsiornerullu ineriartortinnissaanut aningaasaliinissamik qulakkeerinnittussaq, eqqaavaa.
- Susoqaraluarpalluunniit Kalaallit Nunaata siunissani pillugu namminneq aalajangiisinnaassuseqarusunnera tapersersorparput, aamma eqqunngitsumik iliuuseqartunit siooratinneqaraluta ersitinneqalerunnanngilaugt, oqarpoq.
Inuit Ataqatigiit sinnerlugit Folketingimut ilaasortaq Aaja Chemnitz Folketingip ammaanersiornera aqqanilissaanik peqataaffigaa.
Assi: Trine Juncher Jørgensen
Aaja Chemnitzip Folketingip ammaanersiornera aqqanilissaanik peqataaffigaa, Elvira Kûitselu perngaammik peqataalluni.
Ammaanersiornermi oqalugiaat sisamanngorpat oqallisigineqassaaq, tassanilu Elvira Kûitse tunumiutut oqalunniarluni nalunaarutiginikuuaa.
Inatsisartut siulittaasuat Kim Kielsen nulianilu Judithe aamma peqataapput.
Assi: Trine Juncher Jørgensen
