Arnat pingasuusut ilaat, SIK aqqutigalugu RS Servicesimut aningaasanik taarsiivigeqqusoq, eqqunngitsumik tunngavilersuuteqarluni Kalaallit Nunaannut tikisinneqarsimalluni oqaluttuarpoq. Kalaallit Nunaanni sulisussaaleqisoqarnera tusarsimavaa, ilisarisimasanilu aqqutigalugu Filippinerini Royal Greenlandip sulisussarsiornermut suliaqartua attavigisimallugu.
- Tunisassiorfimmi suliffittaarsinnaasunga paasitinneqarpunga, eqqarsarlungalu: "Ajunngilaq, aningaasarsiorfik nutaaq misigisassallu nutaat. Taama isumalioqqaaraluarpunga", oqarpoq.
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat
ilaanni allaaserisaavoq.
Allaaserisat pisartagaqartunit taamaallaat atuarneqarsinnaapput.
Atuarluarna.
Arnat pingasuusut ilaat, SIK aqqutigalugu RS Servicesimut aningaasanik taarsiivigeqqusoq, eqqunngitsumik tunngavilersuuteqarluni Kalaallit Nunaannut tikisinneqarsimalluni oqaluttuarpoq. Kalaallit Nunaanni sulisussaaleqisoqarnera tusarsimavaa, ilisarisimasanilu aqqutigalugu Filippinerini Royal Greenlandip sulisussarsiornermut suliaqartua attavigisimallugu.
- Tunisassiorfimmi suliffittaarsinnaasunga paasitinneqarpunga, eqqarsarlungalu: "Ajunngilaq, aningaasarsiorfik nutaaq misigisassallu nutaat. Taama isumalioqqaaraluarpunga", oqarpoq.
Akiitsut
Isumaqatigiissut atsiorpaa, sulisussarsiortartumut aningaasanik 10.000 koruuninik isumaqatigiissusiornerup nalinganik atorpoq, timmisartumullu billitsimut 14.000 koruuninik aamma atorluni.
NORMU KUKKUSOQ
Aviisimit AG-miit sapaatip-akunnerata siulianitulli, RS Servicesimik piginnittoq, Rhafaelle Martinsen oqaaseqartinniarsarigaluarparput.
SIK-p eqqartuussissuserisuata Kalaallit Nunaanni Eqqartuussivinnut suliassanngortitsinera qanoq isumaqarfigineraa apererusukkaluarparput.
Aamma sulisuminut Filippineriniit suliartortitaminut atugassarititai, ilaatigut aningaasarsiat, sulinngiffeqarnermi aningaasarsiat, akileraarutit A-t allarpassuillu pillugit apererusukkaluarparput. Aamma sooq eqqunngitsumik tunngavilersuilluni Kalaallit Nunaannut suliartortitsiniarnersoq, ilaatigut qanoq ililluni isumaqatigiissut ilumoortuunngitsoq 10.000 koruuninik akeqartissinnaaneraa tusarusukkaluarparput.
Rhafaelle Martinsenip sapaatip-akunnerata siuliani oqaaseqangaarnanilu oqarasuaatikkut attaveqarneq kipivaa. Arlaleriarluta sianerfigisaqattaareeripput normumut kukkusumut sianernerariarluta attaveqaat kipiinnarpaa.
- Kalaallit Nunaannut 2021-mili maajimi tikikkama piviusut allaanerupput. Sulisitsisuma oqarfigaanga Royal Greenlandimi atorfissaqartinneqanngitsunga, taarsiullugulu Salon Aurorami tagiartuisartutut kukilerisartutullu atorfissaqartinneqartunga. Soorunami tamanna allaanerulluinnarpoq, kisianni RS Servicesimut akiitsoqareerpunga taamaattumillu oqaatigineqartutut iliorpunga, oqarpoq.
Isumaqatigiissut naapertorlugu akiitsut ukiup ataatsip ingerlanerani akilerneqassapput, aamma ineqarnermut akiliut 2.500 koruunit ilanngaatigineqarput, tassani arnap pineqartup saniatigut allanik marlunnik ineqateqarluni. Tikinneranit maannamut ineqarnermut akiliut 3.250 koruuninut qaffassimavoq.
- Qaammatini taakkunani sapaatip-akunneranut ullut arfineq-marluk sulisarpunga, 2023-mut naatsorsuutit tigugakkit tupigusuutigaara ukiumut isertitani 5.397 koruuninik amigartooruteqarnera. Paasiuminaappoq. Aningaasarsianut allagartami tigusanni allassimasaraluarpoq akileraarutit A-t akilerneqarsimasut. Qanoq taama amigartooruteqarsinnaava?, arnaq oqarpoq, nassuerutigaalu aningaasarsiniarnermini ajornartorsiuteqakulasarluni, aningaasarsialli amigartoorutaaneq ajortut.
- Arlaleriarlunga aningaasarsiama piffissaq eqqorlugu tunniunneqanngitsut eqqaasitsissutigeqattaaqqaarlugu tigusariaqartarpakka, ilaannikkut qaammatip naaneraniit ullut qulit qaangiukkaangata aatsaat akissarsiassakka tigusarpakka. Sulisitsisora tamatigut arlaannik utoqqatsissutissarsiortarpoq. Ilaannikkut aningaasanik tunineqalaartarpunga, ilaannilu aningaaserivimmi kontonnut ikineqartarlutik. Aningaasarsiannit akiitsunnut, ineqarnermut akiliut, aap, aamma akileraarutit A-t ilanngaatigineqartarput. Aamma soraarnerussutisiassanut sulinngiffeqarnissannullu akiliuteqarneq ajorpoq. Akileraarutillu A sulisitsisup akissarsiannit ilanngaatigisartagai akilerneqartarsimanngitsut kingorna paasivara, oqarpoq.
Napparsimasoq
Arnap, Japanimi aamma najugaqarnikuusimasup, arlaatigut ajortoqartoq suleqatinilu uiatalu (allaaserisap aappaa atuaruk aaqq.) pasitsaappaat, ataatsimoorlutillu SIK-mut suliassanngortitsiniarlutik aalajangerput. Suliaq arnamut tarnikkut kingunerlutsitsingaatsiartoq.
- Qanoq pineqassanerlunga annilaanngatigisimaqaara. Sinilluarneq ajorpunga annilaangakulasarlugalu. Pissutsit atukkakka nuanniilliorfigaakka, Kalaallit Nunaannit anisitaassaanga, akileraarutinut akiitsoqalerpunga, qanorlu angerlassaanga? Akissarsiarisannit ileqqaarnissaannut periarfissaqarsimanngilanga. Misigivungali eqqunngitsuliorsimananga. Maanga suliartorpunga isumaqaraluarlungalu Kalaallit Nunaat pillugu misigisassarsiorlunga. Tamannali uannut sinnatupalaatullusooq misillerfiuvoq, oqarpoq.
Orlulluni ajoqusersimanini pissutigalugu tagiartuisartutut sulisinnaajunnaarsimalluni oqarpoq.
- Sulisitsisora napparsimanera pillugu nalunaarummik immersuerusunngilaq, taamaalillunga napparsimanera pissutigalugu ullormut aningaasarsitinneqarsinnaaniassagama. Taarsiullugu pinngitsaalillunga sulinngiffeqalersippaanga. Oqaatigineqartariaqarpoq tamatumunnga atatillugu sulinngiffeqarnermut aningaasarsiaqartinneqarsimagama. Isumaqarpungali napparsimanera pissutigalugu sulinngiffeqartitaannginnera tunngaviusumik eqqortuunngitsoq, taanna oqarpoq, sulinerminilu pisiarineqarsimanerluni tunineqarsimanerluniluunniit ullumikkut ilisimanagu.
- Suliffeqannginnama Kalaallit Nunaanniinnissannut inatsisitigut tunngavissaqanngilanga, allamik suliffissarsiorpunga neriuutigalugulu nunani allani najugaqartunut aqutsisoqarfimmit Kalaallit Nunaanniiginnarnissannut akuerineqassasunga, taamaalillunga angerlaqqinnissannut aningaasarsiorsinnaaniassagama, oqarpoq.
Ersisoq
AG-mi aviisimi saqqummernermigut nunanit allameersut allat, sulisitsisuni Kalaallit Nunaanni inatsisinik maleruaanngitsuni sulisut, pitsaanerusumik atugaqalernissaannut ikiorsinnaallugit neriuutigaa.
- SIK-p uagut pilluta suliamik ingerlatsinera nuannaarutigeqaara, nassuerutigisariaqarparali ernumagama. Siunissaq pillugu ernumavunga. Tamanna siooragisassaaqaaq. Suleqatima ilisimatippaanga Salon Aurorami tagiartuisarfik matuneqarsimasoq. Qitikkut ajoqusernera pissutigalugu suli sulisinnaanngitsutut nalunaarsorneqaqqavunga, sulisitsisorali isumaqarpoq tamanna uannut sulinngiffittut isigisariaqariga, taamaattumik naluara qanoq iliussanerlunga. Maajimili aningaasarsiaqanngilanga, taamaammat suut tamarmik aqunneqarsinnaarpasinngitsutut ipput. Tamanna napparsimatitsilerpoq aliasutsitsillunilu, oqarpoq.
