Misissuineq: Atuarfinni mindfulnessip iluaqutissartai arlaliupput
Kommuneqarfik Sermersuumi atuarfimmi ataatsimi mindfulnessimik misiliummik nalilersuinerup takutippaa atuartut nalerisimaarnerannut arlalitsigut iluaqutaasoq. Iluatsittumilli atuutsinneqalissappat ilinniartitsisut iliuuseqangaartariaqarput.
Atuarfinni mindfulnessimik atuutsilersitsinikkut atuartut ukkassisinnaanerulersinnaapput, ilikkagaqarluarnerusinnaallutik atuarfimmilu eqqissisimanerulersinnaallutik. Iluatsittumilli atuutsilersinneqassappat ilinniartitsisut atuarfillu iliuuseqangaarlutillu salliutitsisariaqassapput.
Polfoto/Martin Zakora
Atuartut ilinniartitsisullu natermi issiapput sequnngeqqallutik. Atuartut itisuumik anersaartornerat inimi atuartitsivimmi tusaaneqarsinnaasutuaavoq, timiminnik anersaartornerminnillu maluginiaanissamut ilinniartitsisup sungiusaanerani.
Atuarfimmi mindfulnessip atuutsinneqalernissaa naleqquttunik atugassaqartitsisoqarneratigut sumiiffinnilu pingaartinneqarluni atuutsinneqarneratigut iluaqutissarpassuaqarpoq, ilaatigut atuartut nalerisimaarnerulerlutillu ilikkarsinnaassuseqarnerulersinnaallutik, naliliinermi Nuummi atuarfik Ukaliusaq, USK, allappoq.
- USK-imi mindfulnessip iluatsilluarneranut, ilaatigut atuarfimmi aqutsisunit siulersuisunillu isumaqataaffigineqarluni salliunneqarnera patsisaatinneqarpoq.
Taama Kommuneqarfik Sermersuumi Meeqqanut Atuarfeqarnermullu Ingerlatsivimmit nalilersuisoqarmat oqaatigineqarpoq. Atuarfimmi mindfulnessimik misiliummik suliniut nalilersorneqarsimasoq aningaasaqarnermut inuussutissarsiornermullu ataatsimiititaliap sisamanngornermi novembarip arfineq-aappaanni ataatsimiinnerani saqqummiunneqassaaq oqallisigineqarlunilu.
Kommunalbestyrelsip aalajangiiffigisassatut siunnersuutaa tunngavigalugu Meeqqanut Atuarfeqarnermullu Ingerlatsivik meeqqat atuarfianni ukiumi atuarfiusumi 2023/2024-mi mindfulnessimik misiliummik suliniuteqarpoq.
Ilinniartitsineq pissarsiffigilluarneruneqarsinnaavoq
Misiliinermi misilittakkat takutippaat atuarfimmi mindfulness atuartunut ilinniartitsisunullu iluaqutaangaarsinnaasoq.
- Tassunga ersiutaassaaq atuartut pitsaanerusumik ukkassisinnaalernerat, atuaqatigiit inaanni eqqissisimaneruneq aamma atuaqatigiit akornanni aaqqiagiinnginnerit ikinnerit aamma ilinniartitsisut atuartullu akornanni. Atuartut imminnut ilisimaarinerat (self-awareness) mindfulnessimik sammisat aqqutigalugit pitsanngorsarneqassaaq. Ilinniartitsisunit nalinginnaasumik atuartitsinerup pitsaanerunera aamma ilinniartitsisut annermik angusaqarnerat misigineqarpoq. Nalilersuinerup atuartunit mindfulnessimik ingerlatsineq annermik nuannarineqartoq ingerlaqqiinnarnissaalu kissaatigineqartoq takutippaa, naliliinermi inerniliussami ataatsimiititaliap sisamanngornermi oqaluuserisassaani allassimavoq.
Pilersaarusiorluagaasariaqarpoq
Nalilersuinermi atuutilersitsineq iluatsilluassappat pissutsit pisariaqartut tulliuttut tikkuarneqarput:
- Atuarfimmi aqutsisut atuarfimmilu siulersuisut sumiiffimminni mindfulnessip salliunneqarnissaanik tapersersuissariaqarput
- Sumiiffinni naleqqussaanissamik pilersaarusiornissamillu periarfissaqartariaqarpoq
- Mindfulnessimik piginnaasatigut ineriartortitsineq Meeqqat atuarfiannut naleqqussagaassaaq aalajangersimasunik sakkussaqarluni periuseqarlunilu
- Piginnaasatigut inerisaallattaartarneq aamma ilitsersuisartunik suleqateqarneq kiisalu sakkussanik sungiusaatinillu nutaanik saqqummiisarneq
Ingerlatsivimmit innersuussutigineqarpoq atuarfinni mindfulnessimik atuiniarnerlutik atuarfinni ataasiakkaani aalajangerneqassasoq, taamaalilluni sumiiffinni assigiinngitsuni pisariaqartitsineq unammilligassallu eqqumaffigineqarsinnaaniassammata.
- Atuarfinni ilinniartitsisut atuartullu pisariaqartitaannut naapertuuttunik atuarfiit piginnaasatigut ineriartortitsinissamik salliutitsisinnaasariaqarput. Qitiusumik aalajangikkamik ilusiliisoqaraluarpat atuarfinni ajornartorsiutaasunut aaqqiissutissatut naapertuutinngitsunik pisussaaffiliisoortoqarsinnaammat, meeqqanut atuarfeqarnermullu ingerlatsiviup aningaasaqarnermut inuussutissarsiornermullu ataatsimiititaliamut inassuteqaataani tamanna allassimavoq. Inassuteqaat kommunalbestyrelsip tamarmiusup suliamut tunngasumik naliliinnginnerani ataatsimiititaliaq isummerfiginnissaaq.
