Mittarfimmik sanaartorneq naammassineqartoq illoqarfiit pingaarnersaanni pitsaanerusunik aqqusinniornissamik kinguneqarsinnaasoq
Nuummi mittarfiliorneq asfaltiliorfimmut Kommuneqarfik Sermersuup pigilersimasaanut maannamut pingaarnerpaasimavoq. Maanna Nuummi aqquserngit nungullartut isumaginissaat piffissaqarfigineqarnerulerpoq.
Illoqarfiit pingaarnersaanni aqqusinikkut angallannerujussuaq aqqusinernik aserorterivoq.
Assi: Leiff Josefsen
Nuummi aqquserngit nungullarsimapput sumilu tamaani aqqusinerni putut biilertunut ilungersunarput.
Tamatumunnga atatillugu pitsanngorsaasoqartussanngortoq Kommuneqarfik Sermersooq maanna ilisimatitsivoq.
Mittarfiliorneq 2020-mili asfaltiliorfimmi kommunip Munckikkunniit pisiarisaani salliunneqarsimavoq, kommuni nittartakkamini allappoq.
Taamaammat illoqarfissuarmi biilit amerliartuinnartillugit kommunip aqqusernginik iluarsaasinnaaneq killeqarsimavoq:
- Assersuutigalugu nalunaarsuinermi takutinneqarpoq Sipisaq ullormut 19.000-riarluni angallavigineqartartoq, kommuni ilisimatitsivoq.
Kommunip maanna qaqugu sumilu asfaltilersuisoqassanersoq nammineerluni aqussinnaaleraa Teknikkeqarnermut Avatangiisinullu Ataatsimiititaliami siulittaasoq Uju Petersen (IA) oqarpoq.
- Aqquserngit iluarsaannissaannut periarfissaqarnerungaatsialerpugut, Uju Petersen oqarpoq.
Asfaltilersuineq Nuummi silap pissusia eqqarsaatigalugu ajornakusoorsinnaammat eqqaamaneqassaaq:
- Asfalti manissarneqaruni minnerpaamik 120 gradenik kissassuseqassaaq, silalu tallimat sinnerlugit kiappat aatsaat asfaltilersuisoqarsinnaavoq. Maajimi aput aamma juunimi juulimilu sialuk ullunut asfaltilersuiffiusinnaasunut ikilisaataapput, kommunimit nassuiaasoqarpoq.
