NAALAGAAFFEQATIGIINNERMI ATAATSIMIINNEQ 2024
Múte: – Anguniakkamut qaninnerulerpugut – kisianni piffissamik suli atorfissaqartitsivugut
Naalakkersuisut siulittaasuat, Múte Bourup Egede (IA), suli isumalluarpoq issittumi aallartitaq pillugu isumaqatigiinniarnerni naammassisaqarrnissaminnut, naak manna tikillugu Kalaallit Nunaata tungaanit angorusutaq suli anguneqanngikkaluartoq.
Naggatissaa tikillugu Kalaallit Nunaata tungaanit isumalluartoqaraluarpoq issittumi aallartitaq pillugu isumaqatigiinngissutit qaangerneqassasut. Kisianni kingullermisut, naalagaaffeqatigiinneq pillugu ataatsimiinnertut 2023-p aasaanerani ingerlanneqartutut, isumaqatigiissuteqartoqanngilaq. - Kisianni ataatsimiittarnerit siuliinut sanilliullugu immitsinnut qaninnerulernikuuvugut. Kissaatigaara neriuutigaaralu suliaq pilertortumik naammassineqassasoq Danmark Kunngeqarfik sinnerlugu Issittumi Siunnersuisoqatigiinni siulittaasutut tigusinnginnerani. (Danmark 2025-mi siulittaasutut inissisimalissaaq, aaqq.)
Assiliisoq: Naalakkersuisut
Naalakkersuisut Siulittaasuat, Múte Bourup Egede (IA), kissaateqaraluarpoq issittumi aallartitaq pillugu isumaqatigiissuteqartoqarsinnaassasoq ataatsimiinnermi matumani, taamaalillunilu Kalaallit Nunaata piumasaqaataanut naapertuuttumik suliaq naammassineqassasoq, taamaattorli utaqqeqqilaartariaqarpoq.
- Aap, neriuutigisimavarput isumalluarlutalu, aaqqiissuteqarfigisinnaassagipput. Kisianni akuersaarparput suliaq pillugu suli naammassiniagassaqartoq. Tassunga killikkaluarluta, qularinngilara maanna qaninnerulertugut, aamma aaqqiissuteqarfigiumaaripput, neriuutigalugu ukiaq manna, imaluunniit kingusinnerpaamik Kalaallit Nunaata Arktisk Rådimi siulittaasunngornissaa sioqqullugu piumaartoq, Naalakkersuisut Siulittaasuat, Múte Bourup Egede Sermitsiamut oqarpoq.
Suna pissutaava maanna aaqqiissutissarsisoqannginneranut?
- Tamanna oqaaseqarfigisinnaanngilara aamma oqaaseqarfigiumanngilara. Kisianni aamma, neriuutigaara aaqqiissutissamik piaartumik angusaqarumaartugut, Naalakkersuisut siulittaasuat akivoq.
Ritzau naapertorlugu, statsministerip oqaatigaa, issittumi aallartitaq Kalaallit Nunaannit aallaaveqassasoq, Kalaallit Nunaata tamanna kissaatigimmagu pissusissamisoortoq.
- Uanga isumaqarpunga, issittumi aallartitap, pingaarnertut suliassaqarfigimmagu issittoq, naallu naalagaaffeqatigiinnni nunat tamaasa sullittussaagai, aallaavigisai tassaasariaqartut inuiaqatigiit Kalaallit taamaammallu Kalaallit Nunaat aallaavigisariaqaraa.
- Taamaattumik tamanna naammassiniarlugu kissaateqarpugut, statsministeri oqarpoq.
Kalaallit Nunaat Arktisk Rådimi inissisimaffeqarnerulersoq
Issittumi aallartitaqarnermut tunngatillugu suliaq suli naammassineqanngikkaluartoq, aamma suli piffissaliisoqarsinnaanngikkaluartoq qaqugu nunanut allanut ministeriaqarfiup pujoorfianit pujoq qaqortoq takuneqarumaarnersoq, naalakkersuisut siulittaasuat aaqqiissuteqarnissamik sulissutiginninneq ingerlaqqissasoq naqissusiivoq.
Kisianni Kalaallit Nunaat maannamut angusaqarsimalereerpoq, tassami Issittumi Siunnersuisoqatigiinni Danmarkip siulittaasuunerata nalaani Kalaallit Nunaat immikkut inissisimaffeqassammat.
- Danmarkip 2025-mi Issittumi Siunnersuisoqatigiinni siulittaasuuffik tiguguniuk isumaqatigiissutigaarput, Kalaallit Nunaat, naalagaaffiup issittortaa, aamma immikkut inissisimaffeqassasoq, tamannalu pissusissamisuuginnarpoq, tassami uagut naalagaaffiup issittortarivaatigut.
Naalakkersuisut siulittaasuat uani erseqqinnerusumik oqaaseqarusunngikkallarpoq, Kalaallit Nunaata immikkut inissisimanissaa nunatsinnut qanoq iluaqutissiiumaarnersoq.
