Naalakkersuisut nittartakkatigut sulisussarsiortarfittaassamik suliniutaanni ilimaginngisamik pisoqarlunilu akimmiffeqarpoq.
Naalakkersuisoq suliaq pillugu utoqqatsernera aamma sulisussarsiornermi nittartakkamut nutaamut 4,9 millionit koruuninik qinnuteqaat itigartitsissutigineqarnera, Aningaasaqarnermut Akileraartarnermullu ataatsimiititaliap aalajangiinera pillugu saqqummiunneqaqqammertumi atuarneqarsinnaavoq.
Naalakkersuisut nittartakkatigut sulisussarsiortarfittaassamik suliniutaanni ilimaginngisamik pisoqarlunilu akimmiffeqarpoq.
Naalakkersuisoq suliaq pillugu utoqqatsernera aamma sulisussarsiornermi nittartakkamut nutaamut 4,9 millionit koruuninik qinnuteqaat itigartitsissutigineqarnera, Aningaasaqarnermut Akileraartarnermullu ataatsimiititaliap aalajangiinera pillugu saqqummiunneqaqqammertumi atuarneqarsinnaavoq.
Naalakkersuisut sulisussarsiornermut nittartagartik Suli.gl upernaaq atorunnaarsillugu sulisussarsiornermik allagarsiussat CV-llu tamaasa danskit sulisussarsiortarfiannut Jobindex.gl-imut nuummassuk suliaq maluginiarneqartorujussuanngorpoq.
Taamaattoqarnera Nunatsinni sulisussarsiortarfiutilinnit isornartorsiuisoqarpoq, aamma Aningaasaqarnermut Akileraartarnermullu Ataatsimiititaliamit politikkikkut akerlilerneqarluni. Ataatsimiititaliap Naalakkersuisut sulisussarsiortarfimmik nutaamik pilersitsinissamut 4,9 millionit koruuninik kissaateqarnerannut aalajangiinissat siusinnerusukkut kinguartinnikuuaat.
Utoqqatserneq tusaatissatut tiguneqartoq
Aningaasaqarnermut Akileraartarnermullu Ataatsimiititaliaq aalajangiinermini ima allappoq:
- Suliamik matuminnga suliarinninnerup tukanneranik ataatsimiititaliap Naalakkersuisuit isumaqatigaat. Naalakkersuisut ajuusaarnerat ataatsimiititaliamullu ummammik pisumik utoqqatsernerat tusaatissatut tiguneqarput.
- Suliassanik ataasiakkaanik saqqummiussassanik pilersaarusinermik suliassap pisariaqartumik naammattumillu pitsaassuseqarnissaanik qulakkeerinnittarnissap pitsanngortinneqarnissaanik Naalakkersuisut ataatsimiititaliamit kaammattoqarput, taamaaliornikkut paasissutissanik kukkusunik ataatsimiititaliamut nassiussisarneq pinngitsoortinneqarsinnaammat.
Ataatsimiititaliami siulittaasoq: Kalaallit Nunaanni suliarineqassaaq
Pisumut ataatsimiititaliap allakkatigut aalajangiinera ataatsimiititaliami siulittaasup Erik Jensenip (S) Sermitsiamut innersuussutigaa, suliarli tamanut ajornaatsuinnaanngitsoq itisilersinnaallugu:
- Suliassaq Kalaallit Nunaanni suliaqartunit suliarineqassasoq politikerit kissaatigimmassuk ataatsimiititaliami ilaasortat isumaqatigiillutik qinnuteqaat itigartippaat:
- Suliassaq maani Kalaallit Nunaanni najugaqartumit suliarineqassaaq. Tamanna pingaartinneqarpoq aalajangiinermullu tunngaviulluni, Erik Jensen oqarpoq, nangipporlu:
- Aningaasaqarnermut Akileraartarnermullu Ataatsimiititaliami politikerit aalajangiinerat tunngaviullunilu pingaaruteqarpoq.
Sulisussarsiortarfiup ineriartortinnissaanut ingerlanneqarnissaanullu Nunatsinni suliallit peqataatinneqarnissaannut Naalakkersuisut iliuuseqarnerusimannginnerat ataatsimiititaliamit ajuusaarutigineqartoq ataatsimiititalip aalajangiinermini ilaatigut allappoq. Suliamullu tunngatillugu apeqquteqartoqassasoq aamma ilanngullugu eqqaaneqarpoq.
