Naalakkersuisut Bidenimut qujassuteqarput Trumpilu pilluaqquaat
Joe Bidenip præsidentiunerani Kalaallit Nunaata USA-llu suleqatigiinnerat arlalitsigut pingaarutilimmik siuariarpoq, Naalakkersuisut taama oqaaseqarput, Donald Trumpilu qinigaanerani pilluaqquaat.
Trump Floridami pingasunngornermi katersorsimasuni oqalugiarpoq, tassanilu præsidentinngornissaminik suaarutiginnippoq. Præsidentinngortussamik taassumalu aqutsisuinik Naalakkersuisut suleqateqarnissartik qilanaaraat.
Assiliisoq: Jim Watson/AFP/Ritzau Scanpix
Donald Trumpip Det Hvide Husimut qinigaaqqinneranut atatillugu maanna præsidentiusoq Joe Biden, ukiumi nutaami pissaanermik tunniussisussaq, suleqatigisimanera pillugu Naalakkersuisut qutsavigaat.
Bidenip aqutsisuunerani pitsaasumik ajunngitsussarlu anguniarlugu suleqatigiilluartoqarsimasoq, tusagassiuutinut nalunaarummi Naalakkersuisut allapput.
Naalakkersuisut naapertorlugit Kalaallit Nunaata USA-llu akornanni pingaarutilinnik arlalinnik suleqatigiiffiusunik siuariartoqarpoq, soorluttaaq Bidenip aqutsisoqarfianit sinniisut arlallit tikeraarsimasut, tassanilu amerikamiut nunanut allanut ministeriata Anthony Blinkenip nunatsinnut tikeraarnera Naalakkersuisut pingaartumik nuannaarutigaat.
Blinken Kangerlussuarmut 2021-mi maajimi tikeraapallappoq, tassanilu USA-p nunanut allanut ministeriata ilaatigut Naalakkersuisut siulittaasuat Múte B. Egede (IA) aamma taamani nunanut allanut tunngasunut naalakkersuisoq Pele Broberg (N) ataatsimeeqatigai.
Suleqatigiinnissaq niuernerlu nukittorsarniaraat
Kalaallit Nunaata Nunanut Allanut, Sillimaniarnermut Illersornissamullu Politikkianut Tunngatillugu Periusissiaq tunngavigalugu Donald Trump suleqatigalugu suleqatigiinnerup ingerlateqqinnissaa Naalakkersuisut maanna qilanaaraat.
Tassani USA-mik suleqateqarnerup nukittorsarneqarnissaa ilaavoq, ilaatigut Amerikami Avannarlermi issittumi oqalliffimmik pilersitsinissaq aammalu nunat taakku marluk akornanni niuernikkut aqqutissat pitsaasut ujartornissaannut suleqatigiinnissaq Naalakkersuisunit ukkatarineqarniarluni.
Sillimaniarnikkut nunarsuatsinni unammillernartumi inissisimanitsinni iligisat, soorlu Issittup sakkulersuuffiunnginnissaanut suleqatigiinnerup ingerlatiinnarnissaanut USA aalajangiisuulluinnassasoq, Naalakkersuisut nalunaarummi allapput.
- Naalakkersuisut sinnerlugit Præsident Donald Trumip qinigaaneranut pilluaqqusivugut. USA nunarujussuuvoq, qanimullu suleqatigaarput sanileralugulu pingaarutilik.
- USA-mik attaveqarnerup ineriartortittuarnissaata ingerlatiinnarnissaanut qilanaarpugut, taamatullu akornatsinni niuernikkut ineriartortitsinissamut sulinerup ingerlateqqinnissaanut qulanaarluta, Naalakkersuisoq Vivian Motzfeldt taama oqaaseqarpoq.
