INNARLUUTILINNUT INATSIT
Naalakkersuisut ilalerneqanngillat - siunnersuut ataatsimiititaliamut suliassanngortinneqarpoq
Inuit innarluutillit tapersersorneqarnissaat pillugu Inatsisartut inatsisissaattut siunnersuut maanna tusarniaassutigineqaleruttorpoq. Inatsisissatut siunnersuummi ilanngullugu inatsisitigut qulakkeerniarneqarpoq innarluutilimmut qanimut qanigisaasut akissarsiaqarlutik innarluutilittaminnut paarsisinnaanngirnissaat. Taamaattorli partiit aalajangiusimavaat angajoqqaanut akissarsiassat annaasat taarsiissutigineqarsinnaalertariaqartut, angajoqqaat/angajoqqaatut oqartussaassusillit meeqqamik immikkut pisariaqartitsisumik paaqqutarinninnerminni tamakkiisumik sulisinnaanngikkaangata, taamaammallu ataatsimiititaliamit suliarineqartariaqartoq.
Inatsisartut ilaasortaatitaat Anna Wangenheim (D) anguniarlugu periarfissiivoq angajoqqaat/siulersuisut akissarsiaqartinneqarsinnaanissaat piffissami suliffissarsiuussisarnermi tamakkiisumik sulisinnaanngikkaangamik, Naalakkersuisullu siunnersuutigaat piffissami killiligaanngitsumi tamakkiisumik akissarsiaqartinneqassasut innarluutilimmik angerlarsimaffimminni isumaginnittussamik.
Toqqorsivimmit assiliartaliussaq: Leiff Josefsen
Meeqqanut inuusuttunullu Naalakkersuisoq, Aqqaluaq Biilmann Egede (IA) innarluutillit oqaaseqartartuannik aammalu meeqqat oqaaseqartartuannik qisuariartitsivoq, Anna Wangenheimip siunnersuutaa, meeqqanut immikkut pisariaqartitsisunut angajoqqaat/angajoqqaatut oqartussaassusillit tamakkiisumik sulisinikkut isertitsisinnaajunnaartartunut taarsiisoqartalernissamik siunnersuutaa itigartinneqassasoq innersuussutigimmagu.
Sakkortuumik qisuarartariaqalernerannut pissutaarpasippoq naalakkersuisoq siunnersuuteqartumut akissutimini erseqqissuliunngimmat, aammalu erseqqissaatiginngimmagu inatsisissatut siunnersuummi "piffissami killilikkami pissutigalugu akissuteqarnera naammaginartumik nassuiarneqanngitsoq aamma nassuiaatissaqanngitsoq, tassami tusarniaaneq ingerlanneqarmat, tassanilu "piffissami killilikkami qanigisaasunik akissarsiaqarluni paaqqutarinnittoqarsinnaalernissaa" inatsisissatut siunnersuummi ilanngunneqarsimammat.
Tusarniaaneq 21. maaji 2024 tikillugu ingerlanneqassaaq. Anna Wangenheinillu siunnersuutaa 22. maaji aappassaaneerneqassaaq.
Partiit tamarmik Wangenheimip siunnersuutaa ataatsimiititaliamut ingerlateqqippaat
Naalakkersuisuni ilaasortap oqallinnermi siullermi oqallinnerup nalaani nassuiaateqarnermini, ilaatigut oqaatigaa "eqqaamanerlunngikkuniuk" tusarniaaneq ingerlanneqartoq, taamaattorli tusarniaasoqarpat tusarniaasoqanngippalluunniit Inatsisartuni partiit Wangenheimip siunnersuutaa aappassaaneerneqartinnagu ataatsimiititaliami suliassanngortippaat.
Partiit qanoq annertutigisumik Wangenheimsip taarsiifiginnittoqartalernissaanik siunnersuutaanut qanillattorsinnaatigiumaarnersut ataatsimiititaliap isumaliutissiissummik suliaqareerluni isumaliutissiissutaatigut takuneqarsinnaajumaarpoq.
"Atorfinitsitsineq killiligaanngitsoq qanigisamik qaninnerpaamik isumaginninnissaq"
Naalakkersuisut inatsisissatut siunnersuummut oqaaseqaataanni ima tunngavilersuutigineqarpoq:
- Siunnersuummi inuup suliffinnut attuumassutillip innarluutilimmik
qanigisaasumik paarsaqarnissamik kissaatillip angerlarsimaffimmi paarsinissamut
taarsiullugu angerlarsimaffiup avataani ulloq unnuarlu najugaqarnerussappat
imaluunniit paarsinissamut pisariaqartitsineq ulloq naallugu sulinermut
naapertuuppat inuk kommunalbestyrelsip atorfinitsissinnaavaa.
Angerlarsimaffimmi paaqqutarinninnermi akissarsiat (inatsisissatut siunnersuummi § 67)
§ 67. Inummut, inuup innarluutillip nammineq angerlarsimaffimmini
najugaqartup ulluinnarni isumassorneqarneranik isumaginnittumut, inuttullu
tapersersorneqarnissamik isumassorneqarnissamillu
aningaasaliiffigineqarsimasumut, kommunalbestyrelse aningaasatigut
tapiissuteqartassaaq.
Imm 2. Imm. 1 malillugu tapersiineq,
kommunalbestyrelsip inummik isumassuisumik atorfinitsitsineratigut pissaaq.
Inuup innarluutillip pisariaqartitsinera tunngavigalugu sapaatip akunneranut
nalunaaquttap akunnerisa atorfeqartitsiviusussat amerlassusissai, kommunalbestyrelsip
aalajangersaaffigissavai.
Imm. 3. Imm 2
malillugu atorfinitsitsinermi inuup siusinnerusukkut tamakkiisumik
isertitarisimasai tunngavigalugit inuk akissarsiaqartinneqassaaq. Akissarsiat piffissaq tamakkerlugu atorfinitsinneqarnermut
naleqqiullugu, nalunaaquttap akunnerinut innersuussivigineqartunut
annikillisinneqassapput. Akissarsiarisimasanut uppernarsaat pigineqanngippat,
taava akissarsiat SIK-p isumaqatigiissutai malillugit suliamik
ilinniagaqanngitsup nalunaaquttap akunnermusiaatut minnerpaatut
amerlassuseqartillugit allaavittut aalajangerneqassapput.
- Inuup siusinnerusukkut aningaasarsiai tamarmiusut tunngavigalugit
akissarsiaqartitsisoqassaaq. Akissarsiat
piffissaq tamakkerlugu atorfinitsinneqarnermut naleqqiullugu, nalunaaquttap
akunnerinut innersuussivigineqartunut annikillisinneqassapput.
Akissarsiarisimasanut uppernarsaat pigineqanngippat, taava akissarsiat SIK-p
isumaqatigiissutai malillugit suliamik ilinniagaqanngitsup nalunaaquttap
akunnermusiaatut minnerpaatut amerlassuseqartillugit allaavittut
aalajangerneqassapput.
Qanigisaasup paarineqarnissaa siunertaralugu inuk qaammatit 6-it
tikillugit atorfinitsinneqarsinnaavoq. Piffissaq paarsinermut atorneqartoq
tamatumunnga pissutsit immikkut ittut pisariaqartissimappassuk qaammatit
3-t angullugit
sivitsuiffigineqarsinnaavoq.
Maanna ataatsimiititaliap naliliiffigissavaa, Anna Wangenheimip siunnersuutaa Naalakkersuisut inatsisaannut naapertuutinnginnersoq, tassami Naalakkersuisut anguniagaat tassaavoq akissarsiaqartitsilluni angerlarsimaffimmi paarsineq piffissaliussaq sivikitsumik, Anna Wangenheimillu siunnersuutaa immikkut ittoq tassaavoq akissarsiaqartitsinermut taarsiullugu aningaasarsiaqartitsineq angajoqqaanut, meeqqanik inuusuttunillu innarluutilinnik paarsinermik isumaginninnermillu peqataasinnaanngitsunut.
