Oqaaseqartartut Naalakkersuisut itigartitseqqusinerannut akerliupput
Inatsisartuni ilaasortaq Anna Wangenheim (D) siunnersuuteqarpoq meeqqat immikkut pisariaqartitsisut angajoqqaavi/angajoqqaatut oqartussaassusillit meeqqap paaqqutarineqarneranut atatillugu ilaannakortumik sulisariaqartarnerminni imaluunniit sulinermit isertitaaruttariaqarnerminni taarsiiffigitinneqarsinnaalissasut. Naalakkersuisulli innersuussipput siunnersuut itigartinneqassasoq. Innarluuteqartut oqaaseqartartuat aamma Meeqqat oqaaseqartartuat Naalakkersuisut innersuussutaannut tunngatillugu sakkortuumik akerliliipput.
Meeqqat innarluutillit angajoqqaavi illersuisui piffissamik atuisarput meeqqatigut pitsaasumik inuuneqarnissaannik qulakkeerinninniarlutik, ilaallu suliffeqarnissaq tunilliuttariaqartarpaat. Kisianni isertitassatigut annaasaqaatigisarpaat. Inatsisartuni ilaasortaq, Anna Wangenheim (D) siunnersuuteqarpoq siunissami aningaasaqarnikkut qulakkeerinninneq annertusarneqassasoq angajoqqaanut tassunga ilaasunut. Naalakkersuisut siunnersuut itigartitsissutiginiarpaat, tamannalu innarluutillit meeqqallu oqaaseqartartuinik pakatsisitsivoq. (Assimi takuneqarsinnaasuni meeqqat oqaluuserisamut attuumassuteqanngillat.)
Toqqorsivimmit assiliisoq: Leiff Josefsen
Anna Wangenheim siunnersuutimi aqqutigalugu qulakkeerinnikkusuppoq angajoqqaat meeqqamik innarluutilimmik immikkullu pisariaqartitsisumik perorsaasut siunissami isertitassaraluaminnik annaasaqartarnerminnut taarsiiffigineqarsinnaalissasut, meeqqap innarluutaa pisariaqartitsineralu pissutigalugu sulinermit isertitaqarnikkut ajornartorsiuteqalersarmata. Tamanna meeqqap angerlarsimaffimmi najugaqartup qassinilluunniit ukioqarnera apeqqutaatinnagu.
Taanna erseqqissaavoq angajoqqaat amerlasuut nukissatik tamaasa atorlugit meeraq isumagisaraat, aamma atuarfimmi atugassarititaasut pitsaasut qulakkeerniarlugit. Tamatuma kingunerisaanik pineqartut tamakkiisumik suliffeqarsinnaanerminnik killeqartitsilertarput. Angajoqqaat taakku ikiorsiiffigineqartariaqarput tapersersorneqartariaqarlutillu ullumikkornit annertunerungaartumik, siunnersuuteqartoq isumaqarpoq.
Naalakkersuisut itigartitsinissamik innersuussuteqarput
Siunnersuulli taanna itigartinneqassasoq Naalakkersuisut itigartinneqassasoq innersuussutigaat, innersuussutigalugulu ukiaru inatsisissatut siunnersuummik saqqummiussinissartik:
- Meeqqat aamma inuusuttut piginnaanikillisimasut angajoqqaavisalu Kalaallit Nunatsinni innuttaasuupput inuit pisinnaatitaaffiinik annerpaamik sumiginnagaasut. Meeqqamut piginnaanikillisimasumut angajoqqaajusut suliffeqarnermi aamma isumassuisutut annertuumik unamminiagaqarput, kisianni aamma pisinnaatitaaffiit tunngaviusut eqquutitinneqarnissaanut naaffeqanngitsumik sorsuuteqartuupput.
- Tilioq aamma MIO aalajangiiffigisassatut siunnersuut inuiaqatigiinni naligiinnerusumut aamma peqataanerusumik pilersitsinissamut aalajangiisuulluinnartutut isigaat taamaattumillu siunnersuut tamakkiisumik taperserneqarluni. Tilioq aamma MIO, Naalakkersuisut inatsisissatut siunnersuummut innersuussutaannut, tassalu qanigisaasunut suliffeqarnermut attaveqalernissamut assigiimmik tapersiijumaartussatut isiginngilaat. Piffissamik annertuumik killiliivoq aamma kommunimit innarluutillip nammineq angerlarsimaffiani atorfinitsitsinissamik periarfissaqarnera nalorninartorujussuuvoq, taamaattumillu siunnersuutigineqartumut matumunnga arlaatigulluunniit sanillersuunneqarsinnaanngilaq, taakku tunngavilersuipput.
