Naalakkersuisut: Inuit innarluutillit atugaat ernumanarluinnarput
Avannaata Kommuniani inuit innarluutillit atugaat isornartorsiornangaartut Nakkutilliinermik Ingerlatsiviup qulaarpaa, tamannalu “innuttaasunut qanigisaannullu, kisiannili aamma innuttaasut inatsisitigut isumannaatsuunerannut ernumanarluinnartuuvoq”, Meeqqanut, Inuusuttunut, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq Aqqaluaq B. Egede isumaqarpoq.
- Innuttaasutta pisinnaatitaaffiisa qulakkeernissaannut tunngatillugu eqqortumik sulianik suliarinnittarneq pingaaruteqarluinnarpoq, Aqqaluaq B. Egede oqarpoq.
Leiff Josefsen
Nakkutilliinermik Ingerlatsiviup Avannaata Kommunianut nakkutilliiartornerat inassuteqaatinik peqqussutinillu arlalinnik kinguneqarpoq, sulianillu ingerlatsineq inatsisitigut piumasaqaatinut naapertuutinngilluinnartoq nakkutilliinerup qulaarpaa.
Naalakkersuisut tusagassiutinut nalunaarutaanni naqissuserneqarpoq “innuttaasup eqqortumik ikiorneqarnissaa inuiaqatigiit pisussaaffigigaat, aamma sulianik suliarinninnermut tunngatillugu. Inuit innarluutillit inuit allat assigalugit inuinnartut, naalakkersuinikkut, aningaasaqarnikkut, inooqataanikkut kulturikkullu peqataasinnaanerisa siuarsarnissaa pingaaruteqarpoq.”
Inuunermik isumaqarluartumik inuuneqarneq
“Inuunermik nammineq toqqakkamik inuuneqarsinnaanissamut inuiaqatigiinnilu tapersiisinnaanissamut peqataasinnaanissamullu periarfissalimmik inuunermik isumaqarluartumik inuuneqarnissamut” inuit innarluutillit kommunimit ikiorneqarnerat kiisalu ilitsersorneqarlutillu siunnersorneqarnerat qitiulluinnartuusoq, aamma naqissuserneqarpoq.
- Innuttaasutta pisinnaatitaaffiisa qulakkeernissaannut tunngatillugu eqqortumik sulianik suliarinnittarneq pingaaruteqarluinnarpoq. Kommunini sulianik suliarinnittartunik amigaateqarneq aamma piginnaasanik ineriartortitsineq eqqarsaatigalugu kommunit assigiinngitsut annertuumik ilungersunartoqartitsisut ilisimavarput, Aqqaluaq B. Egede oqarpoq.
Sulisunut pikkorissartitsineq
Ukiamut sulianik suliarinnittartunut piginnaasanik ineriartortitsiviusunik pikkorissaanissanik kiisalu septembarip aallartinnerani isumasioqatigiissitsinissamik Naalakkersuisut pilersaarusiorsimasut taanna ilisimatitsivoq, taakkulu Meeqqanut Inuusuttunullu Naalakkersuisoqarfik suleqatigalugu Pissassarfimmit aamma Isumaginninnermut Aqutsisoqarfimmit ingerlanneqassapput, Pissassarfiup kommunillu pitsaanerusumik suleqatigiinnerulernissaat siunertarineqarluni.
