PISORTAT ULLOQ UNNUARLU ANGERLARSIMAFFIUTAAT
Nakkutilliisut pisortaat nakkutilliiviup nukittorsarneqarnissaanut qilanaarpoq – ulloq unnuarlu angerlarsimaffinni ernumanaateqartut arlaqarput
Nunatsinni ulloq unnuarlu angerlarsimaffinnik nakkutilliisut kommunillu ingerlatsinerannut nakkutilliisut pisortaat, Susanne Frandsen, paasinnissinnaavoq, pingaartumik meeqqanik inuusuttunillu ulloq unnuarlu angerlarsimaffinni najugaqartunut angajoqqaajusut ernumassuteqartarmata. - Nakkutilliisoqarfimmi ilanngullunga inuit tallimaavugut pisortat ulloq unnuarlu angerlarsimaffiinik 30-it sinnerlugit amerlassusilinnik nakkutilliisussat. Suliassarpassuaqarpugut, allaallu ilaanni nakkutilleereernerup malitsigisaanik nangittumik nakkutilliinerit ajornakusoortarlutik, taamaammat qilanaarpugut nakkutilliisoqarfiup annertusarneqarnissaanut, nakkutilliisut pisortaat Susanne Frandsen Sermitsiamut oqarpoq.
Nakkutilliisut pisortaata Susanne Frandsenip assersuutigivaa meeqqanut inuusuttunullu innarluuteqartunut ulloq unnuarlu angerlarsimaffik Ivaaraq: Angajoqqaat arlallit Ivaaraq pillugu pissutsit ernumanartutut nalunaarutigivaat. Erngerluta nalunaarutiginninnerit tunngavigalugit ilisimatitseqqaarata nakkutilliiartorpugut, tassanilu paasivarput Ivaaqqami sulisut sulinermi atugassarititaasut naammaginagit soraakaasimasut, kisianni aamma paasivarput kingusinnerusukkut utikaasimasut, pingaartumik najugaqartut ernumagalugit pisussaasutut misigisimanertik pillugu.
Asseq toqqorsivimmit: Leiff Josefsen
Politikkikkut eqqumaffigineqarpoq, Kalaallit Nunaanni Namminersorlutik Oqartussat nakkutilliisoqarfia, tamannalu nakkutilliisoqarfiup pisortaa Susanne Frandsenip nuannaarutigaa, kisianni aamma qilanaarpoq nakkutilliisoqarfiup nukittorsarneqarnissaa sulisullu amerlineqarnissaat pillugit:
- Ikittunnguuvugut, tassa ilanngullunga tallimaavugut, taakkuinnannguullutalu nakkutilliineq ingerlaavartumik isumagisussaavarput taamatuttaaq nakkutilleerneerup malitsigisaanik nakkutilleeqqittartussaalluta. Tamaviaarluta sulissutigaarput nakkutilliinerup ingerlaavartumik ingerlanneqarsinnaalernissaanut, kisianni massakkut ajornartorsiutaavoq ikittuinnannguunerput, taamaammat uagutsinnut nutaarsiassatsialaavoq Naalakkersuisut nakkutilliisoqarfiup nukittorsarneqarnissaa sulissutigissanerarmassuk, nakkutilliisoqarfiup pisortaa Susanne Frandsen, oqarpoq nangillunilu:
- Nakkutilliineq nukittorsarneqarpat qularinngilluinnarpara tamanna najugaqartunut, najugaqartut qanigisaannut, sulisunut pisortaqatigiinnullu pitsaasumik kinguneqassasoq. Massakkummi pissutsit imaapput, sakkortuumik pingaarnersiuisariaqarluta aammalu nakkutilliiartortarnigut agguaqatigiissillugu ukiut pingasukkaarniartariaqarlutigit, nakkutilliinitsinnilu aalaakkaasumik ingerlatsinata ernumanaatillit salliuttariaqartarpagut, taamaattoqarneratigullu aalaakkaasumik inatsisillu malillugit ingerlatsivinnik tamanik tulleriaarilluta nakkutilliisarnissarput killilerneqartarpoq.
Assersuut ataaseq: Ivaaqqami eqqissiviilliorneq sulisullu soraararnerat
Susanne Frandsen oqaluttuarpoq nakkutilliiartorlutik orniguttarnermik saniatigut aamma saaffiginninnerit ingerlaavartumik apuuttartut, pingaartumik najugaqartunut angajoqqaat qanigisaasullu. Matumani assersuutigalugu meeqqat inuusuttullu innarluutillit ulloq unnuarlu angerlarsimaffiat Ivaaraq Qaqortumiittoq pineqarpoq.
Ivaararmi tassarpiaavoq arnap inuusuttup annertuumik innarluuteqartup sulisumit kinguaassiutitigut atornerlunneqarsimanermi kingunerisaanik ilisimaneqanngitsumik naartulersinneqarfigisimasaa, tassa naartunera kikkut tamarmik arajutsisimavaat ernimallu uissuumminermik annertuumik tamanna pilersitsivoq.
Angajoqqaat arlallit qanittumi ernummateqarlutik kingumut Ivaaqqami pissutsit ernumanarnerarlugit nakkutilliisoqarfimmut allakkatigut saaffiginnipput, tamatumalu malitsigisaanik nakkutilliisoqarfimmit siumut ilisimatitseqqaaratik Ivaaqqqamut nakkutilliiartorput. Tassanilu ingerlaannaq paasinarsivoq ernumassuteqartoqarnera pissutissaqartoq.
- Paasinarsivoq Ivaaraami sulisut suliffimminnit soraararsimasut, suliffimmi pissutsit naammaginanngitsut pissutigalugit, kisianni soraareeraluarlutik sulisut taakku nammineq uteqqinnissartik toqqarsimavaat, nalunnginnamikku najugaqartut isumagineqarnissaminnik pisariaqartitsisut, taamaattumik sulisut amerlanerit uteqqipput, imaanngitsoq pissutsit tassanngaannaq naammaginarsisimammata, kisianni sullitatik najugaqartut pissutigalugit, taakkumi sulisunit isumagineqarnissaminnik pisariaqartitsilluinnartuummata.
- Nakkutilliinermut nalunaarusiaq nalunaaruteqaqqaarata ornigunnitsinnut tunngasoq takkuttussaavoq, kisianni assersuutigiinnarlugu matumani oqaatigissavara, ersarissumik takutillugu nakkutilliinernut atatillugu malitseqartitsilluni nakkutilliineq qanoq pisariaqartitsigisoq.
- Nakkutilliisoqarfimmi pisortatut inissisimaffinni nutaajuvunga, nakkutilliisoqarfimmilu sulisut piginnaasaqarluartuupput suliassaminnillu aallussilluarlutik, kisianni ikittunnguuvugut amerlineqarnissarpullu annertuumik pisariaqartipparput.
- Ivaaqqami arnap inuusuttup annertuumik innarluuteqartup uissuummissutaaqisumik ukiakkut 2022-mi erninerata kingorna, nakkutilliisoqarnerata malitsigisaanik nakkutilliineq ingerlanneqarsimanngilaq. Taamatullu aamma siumoortumik nalunaarugeqqaarnagu nakkutilliiartornitsinni aatsaat paasivarput sulisut soraarsimasut, immaqa tamanna pinngitsoortinneqarsinnaasimassagaluarpoq, nakkutilliineq nakkutilliiartoreernermilu malitseqartitsisarneq nukissaqarfigineqarsimagaluarpat, tassaavorlu taanna angorusutarput, Susanne Frandsen naqissusiivoq, ilanngullugulu oqaluttuaraa Ivaaqqap saniatigut ulloq unnuarlu angerlarsimaffiit allat arlallit ernumanartumik inissisimasut.
Inatsisinik unioqqutitsisoqannginnissaa qulakkeersimasussaavaat
Qitiusumik nakkutilliiviup ulloq unnuarlu angerlarsimaffiit nakkutigisussaavai, tamatumalu saniatigut aamma nakkutigisussaavaat inatsisit malillugit ulloq unnuarlu ingerlatsinermi iluamik kommunit nakkutilliinersut.
- Innuttaasut, nunatsinni ulloq unnuarlu angerlarsimaffittut neqeroorutaasuni najugaqartut sullinneqarnissaminnillu pisariaqartitsisut, inatsisit malillugit sullinneqarnersut nakkutilliinitsigut.qulakkeerinnittussaavugut aamma inatsisit unioqqutinneqannginnissaat soorunami nakkutigisussaavarput.
Taamaattumik Susanne Frandsen naammagisimaarinnippoq nakkutilliisoqarfiup allilerneqarnissaanik pisariaqartitsineq pillugit politikkikkut tusaaniarneqaramik:
- Periarfissinneqarpunga politikerinut nassuiaatissatsinnik saqqummiussinissannut, aammalu qujamasuppunga politikkikkut aalajangiisartunit tusaajumaneqarluaratta, kisianni qilanaarinerpaavara annertusaavigineqarnissatta piviusunngortinneqarnissaa aammalu taamaalilluta pitsaanerusumik ingerlaavartumik nakkutilliinitsinnik ingerlatsinissarput periarfissaqarfigilissagatsigu.
Qitiusumit nakkutilliisoqarfik 2016-imi pilersinneqaramili sulisunik amerliisoqarani taamanili ingerlavoq, taamaasillunilu maanna periarfissaqalerpoq nukittorsarneqarnissaminut ullutsinnullu naleqqunnerusumik nakkutilliinermik ataavarnerusumik inatsisillu malillugit ingerlatsinissaminut, taamaalilluni meeqqat inuusuttullu, innarluutillit utoqqaallu nunami tamarmi najugaqarfigisaannik 30-t sinnerlugit amerlassusilinnik nakkutilliinermik sulinerup ataavarnerusumik ingerlatsisinnaanissaanut nakkutilliisut isumalluarnissamut pissutissaqalersinneqarput.
