Siumut mianersoqqusivoq: Ivaaqqami pissutsit pitsanngorsarneqartariaqarput

Sulisussaaleqineq najugaqartunullu sullissinerup pitsaassusaa pillugit nakkutilliinerup naammaginartuunnginnera, tassaapput Siumumut saaffiginnissutaasimasut ilaat, pingaartumik angajoqqaanit ernumassuteqarlutik politikerinut saaffiginnissutigisimasaat.

Pingaartumik inuit annertuumik innarluutillit aammalu meeqqat inuusuttullu ulloq unnuarlu innarluutilinnut angerlarsimaffimmi Ivaaqqami najugaqartut, tassanilu arnaq inuusuttunnguaq annertuumik innarluutilik kinguaassiutitigut atornerlugaasimanerup kingorna tassanngaannaq ernisimanera innersuussutigalugit, Erik Jensenip naqissuserpaa taamatut pisoqaqqinnginnissaa pingaaruteqartoq. Taamaattumillu partiip aalajangiussimagaa ernumassutigineqartut iliuuseqaqqusilluni saaffiginnissutaasut qisuariarfigissallugit.

AAMMA ATUARUK

Nakkutilliisoqarfik: Kommuni arlalinnik peqqussuteqarfigineqarpoq

Siumut isumaqarpoq, Ivaaqqami siornatigut ajornartorsiutigineqartarsimasut takutikkaat innarluutilinnut sullissinerup nakkutigineqarnera naammaginartumik ingerlanneqanngitsoq, maannalu nukittorsarneqartariaqartoq. 

Oqartussaasut iliuuseqanngippata tamanna najugaqartunut qanigisaasunullu pitsaanngitsumik sunniuteqartarsimavoq. Taamaattumik nutaamik periuseqarnissaq pisariaqarpoq, taamaalilluni taamatut pisoqaqqinnginnissaa qulakkeerniarlugu. 

Sulisut ikippallaartut

Siumut isumaqarpoq maanna ersarilluinnartumik takutinneqartoq, nakkutilliisoqarneq Naalakkersuisuni inissisimasinnaajunaartillugu allatut aaqqiisoqartariaqalersoq.

- Inuit pineqartut illersorniarlugit pisariaqarpoq ingerlatsiviit avataaniittumik nakkutilliisoqarfimmik pilersitsinissaq, inatsisit erseqqissumik aalajangersagallit tunngavigalugit sulisussamik. Erseqqissumik aalajangersarneqassapput suliassat pisinnaatitaaffiillu, aalajangersimasumik piffissaliilluni nakkutigineqartussat, aaqqissuussamik misissuinerit aammalu Naalakkersuisut inassuteqaatigineqartunut malinnittassasut.

Nakkutilliisoqarfik pituttorsimaneqanngitsoq

Siumup isumaqarpoq, pissutsit ersarissumik takutikkaat nakkutilliineq Naalakkersuisut kisimiillutik isumagisinnaanngikkaat. 

- Inuit pineqartut illersorniarlugit, nakkutilliisoqarfimmik namminersortumik akisussaaffigisat avataatigut pilersitsisoqartariaqarpoq. Nakkutilliisoqarfik taanna inatsisitigut suliassamik aalajangersimasumik nassuiaateqartariaqarpoq, nakkutilliinissamut piffissaliussat aalajangersimasut, misissuinissat aaqqissuussamik ingerlanneqartariaqarput kiisalu Naalakkersuisut innersuussutinut malinnaasariaqarput.

Nakkutilliineq immikkut inissisimasoq pisinnaalluarlunilu ingerlanneqartoq pisariaqarpoq, Ivaaqqatut ittuni najugaqartunut isumassuineq, toqqissisimaneq inunnillu pineqartunik ataqqinninneq qulakkeerneqaqqullugit, tamakkumi pisinnaatitaaffigaat, Siumut tikkuaavoq.

- Inuiaqatigiittut ataatsimoorluta pisussaaffeqarpugut innuttatsinnut immikkut pisariaqartitsisunut pitsaanerpaamik atugassaqartitsinissatsinnut. Taamaattumik Siumut isumaqarpoq pisariaqartoq, nakkutilliinermut akisussaaffik allanngortinneqassasoq, taamaalillutik pineqartut pisinnaatitaaffii eqqarsaatigalugit eqqortitsisoqarniassammat, Erik Jensen (S) oqarpoq.

Kommunit angerlarsimaffinnik nakkutilliisarput, taamatuttaaq Naalakkersuisut kommunit nakkutilliinerannik nakkutilliisarput

Kingullermik ulloq unnuarlu innarluutilinnut angerlarsimaffik Ivaaraq pillugu nakkutilliinermit nalunaarusiaq Naalakkersuisut saqqummiuppaat november 2022-mi. Tassa arnaq annertuumik innarluutilik qitornartaareermat qaammatit marluk qaangiunneranni. Tamatuma kingorna nakkutilliinermut nalunaarusiat saqqummersinneqarsimanngillat.

Kommune Kujallermi kommunalbestyrelse siulliulluni nakkutilliisussaavoq inunnut sammisumik ingerlatsinermullu tunngasumik nakkutilliinermik kommunimi ulloq unnuarlu angerlarsimaffinni inissisimasunik, inuit innarluutillit tapersersorneqarnissaat pillugu inatsit naapertorlugu. Kommunip innarluutilinnut sullissinermut tunngatillugu innarluutilinnut ataqatigiissaarisumik atorfilittaqarpoq sulisut allat peqatigalugit suliamik ingerlatsisumik.

Taamatuttaaq Naalakkersuisut inatsit taanna naapertorlugu nakkutilliinermut immikkoortortaqarput, kommunalbestyrelsip ingerlatsineranik maleruagassanillu aqutsineranik nakkutilliinermik ingerlatsisussaq aammalu innarluutilinnut ulloq unnuarlu angerlarsimaffinnut ataasiakkaanut nakkutilliinermik ingerlatsisussaallutik.

Aaqqissuussaaneq taanna tassaavoq partii Siumup allanngortikkusutaa.

Bentiaraq Ottosen: Naalakkersuisut isumaqataapput

Isumaginninnermut, suliffeqarnermut, nunamullu namminermut avatangiisinullu Naalakkersuisoq, Bentiaraq Ottosen (A) Siumup qaqitaanut isumaqataavoq nassuiaallunilu Naalakkersuisut sulissutigissagaat nakkutilliinermut suliassaqarfiup avissaartinneqarnissaa arlaannaannullu attuumassuteqarunnaarsinneqarnissaa:

- Naalakkersuisutut nakkutilliinermut akisussaasutut Siumup siunnersuutaanut tapersersuillunga oqarsinnaavunga nakkutilliinermik suliassaqarfik attuumassuteqanngitsunit siunissami isumagineqartariaqartoq. Tamanna nakkutilliinermik ingerlaavartumik qulakkeerinnittussaavoq, uannullu pingaaruteqarpoq innuttaasut toqqissisimasinnaanerat qulakkiissallugu ilisimassagaallu pisortat ulloq unnuarlu paaqqinnittarfiisa sulinerannut pissusissamisoortumik nakkutilliisoqartoq, tassunga ilanngullugu innarluutilinnut ulloq unnuarlu angerlarsimaffinnut, meeqqanut inuusuttunullu ulloq unnuarlu angerlarsimaffinnut kiisalu utoqqaat illuinut tunngavoq.

Taamaattumik nakkutilliinermut suliassaqarfiup allanngortinnissaa arlaannaannullu attuumassuteqarunnaartinneqarnissaa pillugu suliaqarlusi aallartippisi?

- Tamanna sulissutigissavarput, aap, kisianni siullermik qulaajaqqaartariaqarparput qanoq ililluta tamanna naammassiniarsinnaanerlutigu, kisianni nakkutilliinermik suliassaqarfimmik qaffassaanissarput pingaaruteqarpoq, aammalu pisortat ulloq unnuarlu paaqqinnittarfiisa nakkutilliiffigineqartariaqartut arlalissuummata.

Tassunga tunngatillugu Bentiaraq Ottosenip oqaatigaa nunatsinni inatsisitigut illersugaaneq pillugu inatsimmik (retssikkerhedslov) amigaatigineqartoq, tassami Danmarkimi inatsit Kalaallit Nunaannut atuutinngimmat. 

- Aamma tamanna pillugu Naalakkersuisut sulissuteqassapput, tassami inatsisip taamaattup qulakkiissavaa innuttaasut naapertuilluartumik eqqortumillu inatsisit naapertorlugit innuttaasunik sullissisoqartarnissaa, suliat suliarineqartarneranni ersarissumik assigiissaartumillu suliarineqartarnissaat, oqartussaasullu piaartumik eqqortumillu iliuuseqartassasut.

Naalakkersuisunut ilaasortap suliniutit aallartinneqartussat nakkutilliinermillu allannguinissat pillugit suliaqarneq anguniagaasoq qinigaaffiup matuma ingerlanerani isumaginninneq pillugu aaqqissuusseqqinnermik suliaqarnissamut atatillugu suliarineqassasut.