Arfininngorpat nalunaaqutaq unnuap-qeqqarpat akunnermik ataatsimik kinguartissavarput. Taamaalisarneralu ualikkut timersornissamut taarpallaalerneranik ukiorpassuani misigisarparput.
Ukiulli marluk matuma siorna Kalaallit Nunaata annersaani nalunaaquttap ingerlaaqatigiiffia UTC-2-mut allanngortinneqarpoq, tamatumalu kingunerisaanik ullaakkut sivisunermik taartalerluni ualikkut sivisunermik qaamanerusalerpoq.
Arfininngorpat nalunaaqutaq unnuap-qeqqarpat akunnermik ataatsimik kinguartissavarput. Taamaalisarneralu ualikkut timersornissamut taarpallaalerneranik ukiorpassuani misigisarparput.
Ukiulli marluk matuma siorna Kalaallit Nunaata annersaani nalunaaquttap ingerlaaqatigiiffia UTC-2-mut allanngortinneqarpoq, tamatumalu kingunerisaanik ullaakkut sivisunermik taartalerluni ualikkut sivisunermik qaamanerusalerpoq.
NUNATSINNI NALUNAAQUTTAP INGERLAAQATIGIIFFII
Kalaallit Nunaanni nalunaaquttap ingerlaaqatigiiffii assigiinngitsut pingasuupput.
Nunap annersaani UTC-2-uvoq.
Pituffimmi sakkutooqarfik Amerikap kangiata nalunaaqutaa malillugu UTC -4-miippoq.
Tunumi Nationalparkimi silasiorfik Danmarkshavn UTC +0-miippoq.
Kitaani Tunumilu nalunaaquttap ingerlaaqatigiiffia UTC -3-mit UTC -2-mut 2023-mi oktobarimi allanngortinneqarpoq.
Ittoqqortoormiit 2024-mi marsimi UTC-1-imit UTC-2-mut aamma nuuppoq.
Danmarkshavni Pituffillu Space Baselu kisimik pinnatik nunap sinnerani aasaanerani nalunaaqutaq atorneqarpoq.
Tamannalu timersornermut iluaqutaasimaqisoq Morten Jørgen Heilmann oqarpoq. Taanna sikkilernermiit ujakkaarnermut sungiusartartuuvoq.
- Ujakkaartartutut uppinnaveersaartussaalluni taartumi ingerlaanermiit qaamanerani tamanna ajornannginnerusarpoq, oqarpoq.
Naleqqamiilli Siumumiillu Kalaallit Nunaanni nalunaaquttap ingerlaaqatigiiffia UTC-3-mut uteqqinnissaa kissaatigineqarpoq, tamannalu ukiuunerani ualikkut taarsiaarnerusalerneranik kinguneqassalluni.
Akunnerli ataasiinnaq pineqaraluartoq uggornassaqisoq Morten Jørgen Heilmann isumaqarpoq.
- Nalunaaquttap akunnera ataaseq pingaaruteqartorujussuuvoq, akunnermi taanna ataaseq qaamanerusarmat, oqarpoq.
Inuusuttut timersornerulertut
Ukiuunerani sivikitsuinnarmi qaamasarmat qaqugukkut pisarnerat pingaaruteqartorujuuvoq. Ukiuni kingullerni ajunngitsumik sunniuteqarnera, angerlarsimaffimmi suliffimmilu, Morten Jørgen Heilmannip maluginiarsimavaa.
Qitornai ukiukkut atuareeraangamik angerlaannartarnikuugaluarlutik maanna silami apummi pinnguarnerusalersimapput.
Morten Jørgen Heilmann Pikkori Sportimik, Nuummi silami timersornermut atortuerniarfimmi, pilersitsisuullunilu pisortaavoq. Inuusuttullu ukiukkut timersornermi atortunik soqutiginninnerulersimanerat maluginiapaa.
- Ukiuni kingullerni marlunni inuusuttut eqeersimaarnerunerat ersarippoq.
- Silami timersornermi atortunik alakkaasarput. Taamaammat inuusuttut qaamanerusalerneranita kinguneranik timersornerulernerat ersarippoq, oqarpoq.
Akunnermi ataatsimi sivisunerusumik niuersinnaaneq
Nalunaaquttap ingerlaaqatigiiffiata maanna atuuttoq allanngortinneqannginnissaanut allanngortinnissaanullu tunngavilersuuterpassuaqarpoq. Seqerngup kingusinnerusukkut nuisalernera inuppassuit sungiunniapiloorpaat.
Illuatungaanillu Europamut akunnermik ataatsimik "qaninnerulernikuuvugut", inuussutissarsiortunullu taanna iluaqutaalluni.
Tamannalu Pikkori Sportip iluaqutigaa.
Europami niuertut Kalaallit Nunaannit siulliullutik soraartarput, taamaattumillu Europamut niueqateqarnissamut piffissaq sivikinnerusoq periarfissaasarluni.
- Akunnermik ataatsimik sivisunerusumik periarfissaqalerpugut, tamannalu pingaaruteqartorujussuuvoq. Nunanimi allani niuertartupilussuugama attaveqarfigisartakkama ilaat Europamiipput, Morten Jørgen Heilmann oqarpoq.
Inatsisartuni ilaasortat nalunaaquttap ingerlaaqatigiiffia maanna atuuttoq UTC -2 attatiinnarniarlugu aalajangissasut taassuma neriuutigaa.
Inatsisartut nalunaaquttap ingerlaaqatigiiffiata allanngortinneqarnissaanik siunnersuut oktobarip 14-ianni oqaluuseraat. Partiit tamarmik isumassarsiaq iluaraat, siunnersuullu Inatsisinut Ataatsimiititaliamut ingerlateqqinneqarpoq. Novembarip arfernani aappassaaneerneqassaaq.
