Naluttarfiup Maliup iluarsartuunneqarnissaa aallartingajalerpoq
Naluttarfiup Maliup iluarsartuunnissaanut suliariumannittussarsiuussineq sivisungaatsiartumik utaqqineqareerluni naammassingajalerpoq. Piffissaq qanoq sivisutigisoq atorlugu suliarineqassanersoq qanittukkut paasineqassaaq.
Naluttarfik iluarsaanneqareeruni ima isikkoqassaaq.
Kommuneqarfik Sermersooq
Nuummi Naluttarfik Malik iluarsartuunneqassaaq. Taamaattumillu ukiup ataatsip tungaanut matuneqassalluni.
2023-mi novembarimi iluarsartuussisoqarnissaa nalunaarutigineqarpoq, maannalu suliariumannittussarsiuunneqaleruttorluni.
Kommuneqarfik Sermersooq tusagassiuutinut nalunaarummi allappoq.
- Suliarujussuunikuuvoq, maannali kiisami pisussanngorpoq.
- Suliniut kinguartinneqaqattaaginnarpat suliassartaa annertunerulerlunilu piffissartornarnerulissaaq. Maanna pilersaarusiaq aallaavigalugu naluttarfiup matoqqanissaa qaammatit arfinillit aqqaneq-marlullu akornanni sivisussuseqassaaq – kinguarsaqqissimagutsigu matoqqatitsineq sivisunerusimassagaluarpoq, Teknikkeqarnermut Avatangiisinullu Ataatsimiititami siulittaasuugallartoq Uju Petersen tusagassiutinut nalunaarummi oqarpoq.
Naluttarfik qaqugu matuneqarumaarnersoq suli aalajangerneqanngilaq. Kikkulli suliarinnittussarsiuussinermi ajugaanersut apeqqutaalluni aasaru juulip aallaqqaataanniit aappaagu juulip aallaqqaataata tungaanut pisinnaavoq.
Iluarsartuussinissamik suliaq sivisusimavoq, Teknikkimut Avatangiisinullu Ataatsimiititaliap kommunalbestyrelsillu suliaq arlaleriarlutik suliarisimavaat, aamma innuttaasut siunnersuutaat tusarniaanermilu akissutigineqartut misissorsimallugit.
Piffissamut pilersaarut, aningaasanut missingersuutit aamma suliassap annertussusaa pillugit susassaqartut tamarmik pitsaanerpaamik piareersimasinnaaqqullugit kommunimi Suliniutinut immikkoortortaqarfik aamma misissueqqissaarsimavoq.
Iluarsartuussineq annertusoq
Iluarsartuussinissaq maanna suliariumannittussarsiuunneqarpoq, suliffeqarfiillu soqutiginnillutik neqeroorusiullattaarput. Neqeroorusiornermi periarfissat assigiinngitsut ilanngunneqarput, tassa imaappoq suliarinnikkusuttut assigiinngitsunik ilanngussaqarusukkunik neqeroorusiaminni ilanngussisinnaapput.
Suliarineqartussallu arlaliupput, soorlu naluttarfiit naqqaniit iluarsartuullugillu ikuallattoqarnerani isumannaallisaarnermi malittarisassat nutarterneqassallutik.
Suliassat pingaarnerpaat ilaatigut ukuupput
- Naluttarfinnik tamanik naqqaniit iluarsartuussineq, soorlu naqqit iikkallu qalliutaannik ukiuni 30-ni atasinnaasunik taarsersuineq
- Naluttarfimmi qullernik taarsersuineq
- Inunnut innarluutilinnut isaarissanik pitsanngorsaaneq
- Silaannarissarfinnik taarsersuineq
- Ikuallattoqarnerani isumannaallisaanermi malittarisassat atuuttut malillugit nutaamik aaqqissuussineq
- Atisaajartarfinnik tamakkiisumik iluarsartuussineq
- Illutap iluanik aaqqissuussaaneranillu tamakkiisumik nutarterineq
- Naluttarfiup tamakkiisumik siunissami ingerlanissaanik atuuffeqarnissaanillu qulakkeerinninneq
Malik Nuummi naluttarfituaavoq, taamaattumillu nalunnermik nuannarisaqartut timersortartullu inuusuttut, piffissarujussuaq atorlugu naluttarfimmiittartut, eqqugaassapput.
- Taama sivisutigisumik matoqqanissarput soorunami ajuusaarnarpoq. Innuttaasulli aamma naluttarfimmut pitsaanerusumut, kusanarnerusumut atorneqarnissaminullu tulluarsagaanerusumut tikilluaqqunissaat qilanaareqaarput, Malimmi aqutsisoq Carla Villadsen oqarpoq nangillunilu:
- Naluttarfiup iluarsartuunneqarnerata nalaani sulisutta ilaat kommunip iluani suliffinni allani suligallassapput, ilaallu atortorissaarutit nutaat atuutilertussat pikkorissarfigissavaat. Matoqqagallarnissaq sulinitsinnut pitsaanerulersitsinissatsinnut atussavarput.
Iluarsaaqqinnerit taakku annikitsualuinnarnut tunnganngitsut, pisariaqartullu annertuumillu iluarsaaqqinnerit pineqartut Uju Petersenip aamma erseqqissarpaa.
Iluarsaaqqinnermut tunngatillugu piffissaliussat kingusinnerusukkut saqqummiunneqassapput.
