Namminersorlutik Oqartussat erngup nukinganik nukissiorfissuassarsuarnut suliariariumannittussarsiornissamut piareersartut
Suliffeqarfiit soqutiginnittut neqerooruteqarnissaannut 2025-mi aggustip 22-at piffissaliussaavoq.
Tasersiap tasia eqqaani imeq nukissiorfiusinnaasoq suliassat ilaat maanna neqeroorutigineqartussanngorpoq.
Foto: Privat
Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoqarfiup nukissiutinut immikkoortortaqarfia Tasersiami aamma Tarsartuup Tasersuani erngup nukinganik nukissiorfissuassarsuarnut suliariumannittussarsiornissamut piareersaleruttorpoq.
Taamaammat immikkoortortaqarfiup suliffeqarfiit soqutiginnittut paasissutissanik neqerooruteqartitsinermi peqataanissamut tunngaviusinnaasunik nassiussinissaannut kajumissaarpai.
Namminersorlutik Oqartussat suliffeqarfinnik soqutiginnittunik suliarinnittussarsisinnaaqqullugit piukkussaasalu nunatta ineriartorneranut qanoq sunniuteqartigisinnaanerannik naliliisinnaaqqullugit taamaaliorpoq. Nunatsinnilu pissutsit asseqanngitsut nunanilu tamalaani niuffaffiit naatsorsuutaat suliariumannittussarsiornermi aallavigineqarnissaat aamma siunertaasoq, Namminersorlutik Oqartussat kajumissaarumminni allapput.
Piffiussaliussaq kinguartinnesivitsorneqarataannaasoq
Paasissutissanik tunniussinissamut aggustip 22-at piffissaliussaavoq, suliffeqarfiilli ulloq taanna nallertinnagu neqoruuteqarnissamut periarfissaqanngippata sivitsorneqarataannaavoq.
Immikkoortortaqarfimmik aggustip qiteqqunneraniit qaammatip ataatsip ingerlanerani ataatsimeeqateqarnissaq aamma periarfissaajumaarpoq.
Ataatsimeeqateqarnissamullu sapaatit akunneraajunnaartinnagu ataatsimiinnermi oqaluuserisassatut siunnersuuteqartoqarsinnaasoq paasisaqarnerorusukkaannilu apeqquteqartoqarsinnaasoq, naalakkersuisoqarfik allappoq.
Suliffeqarfiit paasissutissiissutaat suliffeqarfiup piginnaasaanut, neqeroorutaanut erngullu nukinganik atuinissamut akuersissuteqarnermut tunngasortaqassapput
Erngup nukinganik nukissiorfissuassaliornermut aningaasaleerusuttut nukimmillu taakkunanngaanneersunit atuisunngorusuttut quliusut, siusinnerusukkut nalunaarutigineqarpoq.
Suliniummut tassunga suliariumannittussarsiornermut piareersartoqartoq, Namminersorlutik Oqartussat tusagassiorfinnut arfininngornermi nalunaarput.
