KNR-IP PISORTAA
Napparsimalluni sulinngiffeqarnerit eqqumaffigaagut
Tusagassiorfimmi innuttaasunik kiffartuussivimmi immikkoortortaqarfiit tamarmik sulerusussuseqarnerulernissaq anguniarlugu iliuusissatut pilersaarusiorsimasut KNR-imi pisortaq oqarpoq
Tusagassiorfimmi immikkoortortaqarfinni assigiinngitsuni sulinermi atugassarititat eqqumaffigineqartut KNR-ip pisortaata Annga Lyngep oqaatigaa.
Foto: Leiff Josefsen
KNR-imi ukiup kingulliup ingerlanerani 13-it stresserneq pissutigalugu napparsimallutik sulinngiffeqarsimasut Sermitsiami sapaatip akunnerani kingullermi saqqummertumi allaaserineqarput. Sulisussaaleqinerujussuup nalaani tamanna pivoq, tassa tusagassiortutut atorfiit minnerpaamik aqqanillit inuttaqannginneranni, suliffeqarfimmilu ukiup kingulliup ingerlanerani soraarniuteqartut 35-iusut aamma KNR-imi aqutsisut sivitsortumik naammaginanngitsumik inissisimaneranni. Allagaatinik takunnissinnaaneq aqqutigalugu pissarsiarineqarsimasuni arlalinni tusagassiorfiup sulisunik naammagisimaarinninnerannut sulinermilu atugassarititat pillugit misissuinermi akissutini takuneqarsinnaavoq.
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat ilaanni allaaserisaavoq.
Allaaserisat pisartagaqartunit siunissami taamaallaat atuarneqarsinnaajumaassapput.
Atuarluarna.
Misissuinermi 2023-meersumi KNR-ip nutaarsiassaqartitsiviani inernerit ajorluinnartut paasinarsivoq. Tassani sulisut sulinermi atugassarititaasut eqqarsaatigalugit naliliineranni 100-nit 54-iinnat naliliissutigineqarput. 2018 minillugu 2017-imiilli aningaasarsiat atorfininnermilu atugassarititat saniatigut aqutsisut sulinermilu atugassarititaasut naammaginanngitsumiilerput. Radiomi aqutsisunilu sulinermik nuannarinninneq qaffasippoq nutaarsiassaqartitsivimmi tamanna annikinnerpaalluni.
Tusagassiorfiup immikkoortortaqarfiini assigiinngitsuni sulinermi atugassarititaasut eqqumaffigineqartut KNR-imi pisortaq Annga Lynge oqarpoq. Sermitsiamut allakkatigut akissuteqarnermini erseqqissarpaa 2023-mi MTU-mi akissuteqartut procentii ukiunut siuliinut sanilliullugit appasinnerusut, misissuinerli pitsaanerpaamik ingerlanngitsut misissornissaannut aaqqiissutissanillu ujartuinermi atorneqarumaartoq ilanngullugu oqaatigalugu.
- Sulisoqarnermut immikkoortortaqarfiup sulisut naammagisimaarinninnermik ukiumoortumik misissuinerat tunngavigalugu suliffimmik pitsaasumik pilersitsinissaq anguniarpaa.
- Naleqartitanik tunngaveqartumik aqutsineq KNR-imi pingaartinneqarpoq, suliffeqarfiup naleqartitai ammasuunerlu, Annga Lynge oqarpoq.
"Immikkut iliuuseqarneq"
Naak immikkoortortaqarfiit arlallit aalajangersimasunik pitsanngorsaasimagaluartut, sulerusussuseqarneq tunniusimanerlu apperiarsimasut sulisut naammagisimaarinninnerannik misissuinerup 2023-meersup takutippaa. Tamanna immikkoortortaqarfiit tamarmik sulerusussutsip pitsanngorsarniarniarlugu annertusarniarlugulu iliuusissatut pilersaarusiornerannik kinguneqarsimasoq Annga Lynge oqaluttuarpoq. Tamatuma saniatigut suliffeqarfimmi ataatsimoorluni sammisassaqarnerit aamma aallartinneqarsimapput.
- Napparsimalluni sulinngitsoortarneq eqqumaffiginiarlugu 2023-mi napparsimalluni sulinngitsoortartut amerlassusaat naatsorsorpakka tamanullu saqqummiullugit. Taamaalilluni immikkoortortaqarfiit sulinngitsoortarneq ukkatariniassavaat, sulinermilu atugassarititanut ataatsimiititaliap sulinngitsoortartut amerlassusaat allarpassuillu misissorsimavai, Annga Lynge oqarpoq.
Misissuinerup inernera nutaarsiassaqartitsivimmi immikkut ittumik suliniuteqarnermik kinguneqarpoq, tassani siunnersorti suleqatigalugu workshoppertitsisoqarpoq, immikkoortortamilu sulerusussuseqarnerulernissaat anguniarlugu iliuusissatut pilersaarusiortoqarluni, Annga Lynge oqaluttuarpoq.
2023-mi sulisut naammagisimaarneqarnerannik misissuinerup takutippaa KNR-imi sulisut sulianut suleqatigiinnermullu tunngatillugu pitsaasumik nalilerneqartut.
- KNR-ip siunissami uku eqqumaffiginerussavai, tassalu atorfiup imarisaa sulisut suliffimmiiginnarnissaannik aalajangiisuulluinnarnera. Suliffeqarfiup iluani attaveqatigiinneq annertunerusumik sammineqalissasoq, neriullutalu 2024-mi suliniutit arlallit aqqutigalugit pitsaanerulersitsisoqassasoq, pisortaq erseqqissaavoq.
