KNR: Ukiup ataatsip ingerlanerani uippakajaarlutik sulinngiffeqartut 13-it

KNR-imi sulisut ukiup ataatsip ingerlanerani napparsimanermut atatillugu sulinngikkallarnerit taavalu sulinngiffeqarnerit 17-iupput. Taakkunannga 13-it uippakajaarnermik pissuteqarput, sisamat perulunnartumik nappaateqarnertik pissutigalugu sulinngiffeqarlutik. Tamanna Sermitsiap allagaatinik takunnissinnaaneq atorlugu pissarsiarisaani atuarneqarsinnaavoq.

Tusagassiorfiup sulisut naammagisimaarinninnerannik misissuineranni aamma suliffimmik nalilersuinera (MTU aamma APV) 2023-meersoq naapertorlugu kisitsisit ajorput, ingammik KNR-ip nutaarsiassaqartitsiviani. Tassani sulisut sulinermi atugassarititaasut eqqarsaatigalugit naliliineranni 100-nit 54-iupput. 2018 minillugu 2017-imiilli aningaasarsiat atorfininnermilu atugassarititat saniatigut aqutsisut sulinermilu atugassarititaasut naammaginanngitsumiilerput. Radiomi aqutsisunilu sulinermik nuannarinninneq qaffasippoq nutaarsiassaqartitsivimmi tamanna annikinnerpaasoq.

Napparsimalluni sulinngiffeqarneq sulisullu naammagisimaarinninnerat pillugit Sermitsiap KNR-ip pisortaa Annga Lynge arlalinnik apeqquteqarfigaa, taannalu sulinerminut atatillugu angalalluni nalunaaruteqarpoq. Taamaattumik aviisip saqqummernissaanut killiliussap iluani apersorneqarsinnaasimanngilaq. Annga Lynge siorna septembarip aallaqqaataani pisortanngorpoq, tassanilu sulinermi avatangiisit misissorneqarnissaat aallartippaa.

AAMMA ATUARUK

KNR: Ukiup ataatsip iluani soraarniutit 35-t

- Suli misissuivugut. KNR-ip iluatsinnerpaaffia tassaavoq atorfiit imarisaat. Inuit suliatik nuannaraat, kisianni suliassat amerlavallaarput immikkoortortallu akornanni assigiinngiiaarlutik. Tamanna naammaginanngilaq, Annga Lyngep Sermitsiamut siusinnerusukkut oqaatigaa.

Annertuumik tatineqartut

KNR-imi sulisut 35-t qaammatini aqqanilinni kingullerni soraarsimasut Sermitsiap allagaatinik takunnissinnaatitaaneq atorlugu sapaatit akunneri arlalialuit qaangiuttut pissarsiaa aallaavigalugu allaaserisaani atuarneqarsinnaavoq. Taakkunannga 15-it tusagassiortuupput, arfinillit pisortaallutik aaqqissuisuullutilluunniit.

Tamanna sulisunut sinneruttunut suliat tungaasigut tatineqarnerulernerannik kinguneqarpoq, ”ajornartorsiullu” nutaarsiassaqartitsiviinnarmi atuukkaluartoq maannakkut illup sinnerani immikkoortortaqarfinnut allanut siaruaassimavoq. Tusagassiuinermi Suliaqartut Peqatigiiffianni (TP) siulittaasoq Arnaq Nielsen oqaluttuarpoq.

- Radiomi aamma ernumapput. Radiomi pisortap soraarniuteqarnera malugineqarsinnaavoq. Tamanna KNR-imi eqqissiviilliornerulernermik nalorninerulernermillu kinguneqarpoq, Arnaq Nielsen oqarpoq.

Dansk Journalistforbundip, TP-p KNR-imilu sulisut KNR-imi sulinermi atugassarititat sulisoqarniarnerlu pillugit ernumanartoqartoq siusinnerusukkut qaqinnikuuaat.

- Pissutsit ukiorpassuarni ajornartooqqapput, maannali ajorluinnarput, Arnaq Nielsen oqarpoq.

KNR-imi siulersuisut, aqutsisut politikkerillu sulinermi avatangiisinik pitsaanerusunik sulisunillu attassilluarnerusinnaasunik aaqqiissutissarsinissaat neriuutigaa.

AAMMA ATUARUK

Politikerit KNR pillugu: Tamanna akuerineqarsinnaanngilaq

Allatut eqqarsartoqartariaqartoq

Rosannguaq Rossen apriilip aallaqqaataani siulersuisut siulittaasunngorpoq. Siulersuisut KNR-ip pisortaa pisut pillugit qanimut suleqatigigaa, taannalu assigiinngitsunik piumasaqaateqarlunilu naatsorsuuteqartoq taassuma oqaatigaa.

- Isumalluarpunga, taamaanngippat siulersuisuni siulittaasunngornissannut akuersisimassanngikkaluarpunga. Siunissarli isiginiassavarput, Kalaallit Nunaannilu tusagassiuutit atugarissaarnerulernissaannut pilersaarutit misissorlugu. Tamanna ajornartorsiutaavoq tamatta akisussaaffigisariaqagarput, Rosannguaq Rossen oqarpoq.

KNR-imi tusagassiortut 36-usussaapput. Kalaallit tusagassiortut maajip aallartinnerani 18-iupput qallunaallu tusagassiortut arfineq-marluusut taakkunannga pingasut taartaapput. KNR tamaat eqqarsaatigalugu atorfiit aqqanillit taamani inuttaqanngillat.

KNR-ip siumut aallaqqinnissaanut nutaamik eqqarsartoqarlunilu oqaloqatigiittoqartariaqarpoq. Aqutsisut politikerillu nunami tusagassiorfiup innuttaasunut kiffartuussisup ajornartorsiorneranut aaqqiissutissanik tigussaasunik saqqummiussaqannginnerat taamaattumik pakatsinarluinnarpoq, Dansk Journalistforbundimi (DJ) siulittaasoq oqarpoq. - Tamanna ajorluinnartumik ingerlavoq. KNR-ip siumut aallarnissaanut aningaasanik immikkoortitsinissaq aqutsisut kalaallillu politikeriisa akisussaaffigaat, aqutsisulli aamma piumasaqarfigineqartariaqarput, Tine Johansen oqarpoq.

Politikkikkut sammineqartoq

KNR-i inuiaqatigiinnik pitsaasumik kiffartuussissappat tusagassiuuteqarneq politikkikkut pingaarnersiulertariaqarpaat KNR-illu inuiaqatigiinnut pingaaruteqarnera, tassa tamat oqartussaaqataanerat eqqarsaatigalugu, nassuerutigisariaqarpaat. KNR-ip siulersuisui tusagassiutinut taama nalunaaruteqarput.

- Ajoraluartumik KNR-ip atugassarititaanut soqutiginninneq amigaataasoq, tusagassiivinnullu politikkimik amigaateqarneq pissutigalugu nalaatsornerinnakkut soqutiginnittoqartartoq oqaatigisariaqarparput, allapput.

Tusagassiortunngorniarnissap qanoq soqutiginarsarneqarsinnaanera Inatsisartut marlunngormat oqallisigaat.

- Tusagassiortunngorniarfik naleqqussarneqarsinnaavoq ilinniartitsissutigineqartartullu nunami maani atugassarititaasunut tunngasunngorlugit, Aqqalu C. Jerimiassen siunnersuuteqarpoq.

- Aamma inuusuttut kajumissaarusuppakka tusagassiortutut ilinniagaqarnissartik eqqarsaatigeqqullugu. Ilinniagaq taanna pissaanerit agguataarnerisa sisamaattut inissinnissamut periarfissaqartitsivoq, Aqqalu C. Jerimiassen oqarpoq.