Amerlasuut nalunngilaat: Timmisartoqarfimmi nikorfallutit aallartussat allattorsimaffiat isigeruttorit timmisartup qulimiguulilluunniit ilaaffissat taamaatiinnarneqarpoq.
Napparsimasut katsorsarneqarniarlutik allamukarlutik angalasariaqartut taamatuttaaq atugaqarput.
Amerlasuut nalunngilaat: Timmisartoqarfimmi nikorfallutit aallartussat allattorsimaffiat isigeruttorit timmisartup qulimiguulilluunniit ilaaffissat taamaatiinnarneqarpoq.
Napparsimasut katsorsarneqarniarlutik allamukarlutik angalasariaqartut taamatuttaaq atugaqarput.
Tamanna pissutigalugu Naleqqami Inatsisartunut ilaasortaq Jens NapãtôK §37 naapertorlugu peqqissutsimut innarluutilinnullu naalakkersuisumut Anna Wangenheimimut (D) apeqquteqarpoq.
Napparsimasut qassit avannaani sinerissamilu qulimiguulimmik kinguaattoornernit eqqugaasarnersut aperaaq.
Anna Wangenheimip akissutaa naapertorlugu angallannermik pissuteqartumik napparsimasut qassit kinguaattoortarneranut kisitsisinik paasissutissaqanngitsoq Peqqinnissaqarfimmit ilisimatitsissutigineqarpoq. Peqqinnissaqarfiulli angallannermi ajornartorsiutit soorunami napparsimasunut sulisunullu sunniuteqartartut nassuerutigaa.
- Napparsimasut avannaani najugallit, aallarfissat amerlannginneri pissutaallutik uniffissatut aqqusaagassat eqqarsaatigalugit, taamaatitsisoqartarneranut eqqugaanerpaasartut nalilerneqarpoq, taanna allappoq.
Kinguartinneqartut ullut arlallit qaammatinik arlalinnik
Air Greenlandip Avannaani qulimiguulimmik angallassisarnera ukiup matuma aallartinneraniilli unammillernartoqarpoq. Uummannamut timmisartuussinissat katillugit 217-it, Upernavimmut 228-t Qaanaamullu 187-it 2025-mi qaammatini pingasuni siullerni taamaatiinnarneqarput.
Sila timmisartuussinerup taamaatiinnarneqartarneranut pissutaanerpaasarpoq, kisianni ingammik Uummannamut timmisartuussisarneq teknikkikkut ajornartorsiuteqarfiusimavoq.
Anna Wangenheimip akissutaa naapertorlugu napparsimasup angalanissaa taamaatiinnarneqaraangat peqqinnissaqarfimmi sulisut allamik aaqqiissutissarsisarput.
Tassani arlallit isiginiarneqartarput, ilaatigut angallannermut atugassarititat, napaatip suussusersineqarnera, aningaasartuutissat peqqinnissaqarfimmilu tigusinnaasaat apeqqutaasarput.
- Ilaatigut tunngaviusumik katsorsaasoqarnissaa malinneqartarpoq, ilaatigullu katsorsaasoqarnissaa misissuisoqanissaalu ullualunni qaammatialunniluunniit kinguartinneqartarpoq, Anna Wangenheim allappoq.
Aammattaaq nunatsinni katsorsaasoqarnissaanut misissuisoqarnissaanulluunniit sivisuallaartumik utaqqisoqarnissaa nalilerneqarsimagaangat Danmarkimi napparsimmavissuarmi allatut katsorsaasoqarnissaanut ilaatigut neqeroortoqartarpoq.
