Nivi Olsen: Ilulissani GUX-iinnaq piviusorsiornerunngilaq
Inuussutissarsiutinik ilinniarfik ilinniarnertuunngorniarfiutigisoq pilersinneqarsinnaasoq Naalakkersuisut isumaqarput. Taamaaliornikkut ilinniarsimasunngortoqarsinnaavoq, ilinniarnertuunngortoqarsinnaalluni imaluunniit akulerullugit naammassineqarsinnaallutik.
Assi: Trine Juncher Jørgensen
Ilulissani GUX-imik pilersitsisoqarnissaa pillugu oqallinneq aallarteqqippoq. Jens NapãtôK-p Naleqqameersup siunnersuutaa oktobarip arfineq-aappaanni oqallisigineqarpoq.
Ilulissani nutaamik GUX-eqalernissaa pisariaqartinneqanngitsoq, ilinniartitaanermut naalakkersuisoq Nivi Olsen isumaqarpoq.
Tusagassiuutitigut taama nalunaaruteqarpoq.
Taamaattumik Inatsisartuni oqallinnermi allannguutissatut siunnersuuteqarpoq.
- Allannguutissatut siunnersuuteqarnikuuvunga ilinniarfimmik inuussutissarsiornermik ilinniarfimmik ilinniarnertuunngornissamik periarfissiisumik naammassigaannilu ilinniarsimasunngortoqarsinnaasoq, ilinniarnertuunngortoqarsinnaasoq akulerullugilluunniit pilersitsinissamik misissuisoqassasoq. Siornatigummi misissuinerit takutippaat Ilulissani GUX-iinnarmik pisariaqartitsisoqanngitsoq, Nivi Olsen oqarpoq.
Aasiannut kingunerlussasoq
Aasianni GUX-ip pingaaruteqarnera Kommune Qeqertalimmi borgmesterip Simigaq Heilmannip (D) tusagassiuutitigut nalunaarummi saqqummiuppaa.
- Ilulissani GUX-imik pilersitsinissamik suliniuteqarneq Avannaani ilinniarnertuunngorniarfeqareersumut kingunerluttussaammat, ilinniarfigerusutamik nammineq qinigassaqarsinnaaneq tapersersoraluarlugu inatsisartut apererusuppakka ilinniarfinnik allanik eqqarsarnissaq piffissanngunnginnersoq? allappoq.
Inuusuttut ilinniagaqarniarlutik angajoqqaaminnik qimatsisariaqartarnerannik tunngavilersuut atorsinnaanngitsoq taanna isumaqarpoq, meeqqammi nunaqarfinneersut atuariartorniarlutik angajoqqaatik qimallugit aallartareermata.
Nunami arfinilinnik ilinniarnertuunngorniarfeqarnissaa piviusorsiornerunngitsoq taanna isumaqarpoq, ingammik innuttaasut amerliartornerat eqqarsaatigalugu.
- Ukiut ingerlaneranni GUX-it nunatta iluani amerliartorneranni aammalu attaveqaatit atorlugit ilinniartitaaneq piulermalli Aasianni ilinnialertartut ikiliartornikuupput, taamaammat naatsorsuutigilluinnarsinnaavarput Ilulissani GUX-imik pilersitsisoqarpat suli Aasianni ilinnialersartut ikilisinnaanissaat. Tamanna ernumassutigaara. Aasiaammi ilinniartoqarfiunera illoqarfitsinnut kommunitsinnullu iluaqutaammat ilinniartukillineratigut sunniutissaat pitsaanavianngitsut kialluunniit takorloorsinnaavaa.
Suliamut peqataatinneqassasut
Naalakkersuisut Aasianni GUX-ip atorunnaarsinneqarnissaa kissaatiginngikkaat Nivi Olsen oqarpoq. Taakkualu suliamut peqataanissaannik qaaqquneqarsimapput.
- Naalakkersuisunit ilinniarnertuunngorniarfinnik pisariaqartitsineq kisiat isiginianngilarput, kisiannili aamma inuussutissarsiutitigut ilinniartitaanertigut pisariaqartitsineq Avannaata Kommuniani inuiaqatigiinnut naleqqussagaasoq ilanngullugu isiginiarparput, aammalu sulisut ilinniarsimasut ilinniarsimanngitsullu pikkorissartinneqarnissaat ilinniaqqinnissamullu periarfissiilluta, Nivi Olsen oqarpoq.
Ilulissani inuussutissarsiornermik ilinniarfimmik ilinniarnertuunngornissamik periarfissiisumik suliaqarnermi, Kalaallit Nunaannit inuussutissarsiortut aamma kommunit qanimut suleqatiginissaat, Naalakkersuisoqatigiinni nutaani taamaammat pingaartinneqarpoq.
Ilulissani GUX-imik pilersitsinissamik siunnersuut novembarip tallimaanni oqallisigineqaqqitsinnagu Kulturimut, Ilinniartitaanermut, Ilisimatusarnermut Ilageeqarnermullu Ataatsimiititaliamut ingerlateqqinneqarpoq.
