Qeqertalimmi borgmesteri Ilulissani GUX-itaarusunnerannut: - Piviusorsiornerusariaqarpusi

Takorluukkat oqaluttuarigaanni, inuimmita qanoq oqaaseqassappat?

Torragissavaat - imaluunniit akerlianik?

Ilulissat ilinniartoqarfinngorusulluni GUX-itaarusulluni inuussutissarsiornermillu ilinniarfittaarusummat, Kommune Qeqertalimmi borgmesterip, Simigaq Heilmannip nuannarinngilaa. Ernumaammertitsivormi.

- Kommune Qeqertalimmi borgmesteritut pisussaavunga Ilulissani GUX-liornissamik takorluuinermut qisuariaateqassallunga. Isumaqataavunga nunatsinni ilinniarnissamut periarfissat amerlanerusariaqartut, tamanna ataatsimoorfigisinnaalluarparput. 

- Taamaattoq Aasianni GUX-qareersoq qaavatigut Ilulissani GUX-mik pilersitsinissaq kommunitsinnut annertuumik eqquinerluttussaammat ernumassutigaara.

Oqaluuserineqartoq

Avannaata Kommuniata kissaatigaa Ilulissat illoqarfittut ilinniartoqarfinngussasoq, GUX-eqalernissamut inuussutissarsiornermullu ilinniarfeqalernissamut pilersaarutit kommunimi oqaluuserisassanngortinneqareerput.

Siumumi Paarnannguaq Mathiassen, Avannaata Kommuniani kommunalbestyrelsimi Piorsarsimassutsimut, Atuartitaanermut, Meeqqeriveqarnermullu Ataatsimiititaliami siulittaasoq malillugu pilersaarutit siunissami qaninnerpaami piviusunngortinneqassasut kissaatigineqarpoq.

Ilulissat GUX-imik inuussutissarsiutinillu ilinniarfimmik peqassaaq

- Ilaatigut pilersaarutit pillugit Nivi Olsenip atorfilittaanik oqaloqateqarluarsimavugut, taamaattumillu neriulluaateqarpugut.

Taassuma oqaluttuaraa aappaagu Ilulissani mittarfiup nutaap atugarilernera illoqarfik ilinniagaqarfittut illoqarfigisatut suli kajungernarsaaqqissasoq.

- Taamaattumik siunissami qaninnerpaami suliniutip millionilikkaanik akillip piviusunngortinnissaanut piffissanngorpoq.

Taassuma ilanngullugu oqaatigaa Ilulissani mittarfiliornermik isumaginnittumik Munck Gruppenimik borgmesterip Lars Erik Gabrielsenip, Siumut, oqaloqateqareersimasoq. Tassanilu Ilulissani GUX-imik inuussutissarsiutinillu ilinniarfimmik sanaartornernut atatillugit mittarfiliornermi sulisorpassuarnut sanaartugaasunik inissiaqarfittut atortorissaaruterpassuarnik taakkuninnga tigusaqarnissamut periarfissat oqaluuserineqarsimapput, taamaalillutik taakku ilinniagaqartut najugaqarfiitut atorneqarsinnaassammata.

Qeqertalik: Annertuumik eqquissaaq

Kommune Qeqertalimmili borgmesteri, Simigaq Heilmann isumaqataanngilaq.

- Kommune Qeqertalimmut aningaasatigut, suliffissaqarnikkullu eqqorneqartussaavoq, pinngittoorani ilinniartukkillippat sulisussat atorfissaqartinneqartut ikilissapput. Qarasaasiatigut atuarneq periarfissanngormat ilinnialerlutik tikittartut ikilereernikuupput, tamannalu innuttaqassutsikkut aningaasaqarnikkullu malugineqareernikuuarput taamaattumik pissutissaqarpunga uparuassallugu. 

Nutaamik eqqarsartoqartariaqartoq

Simigaq Heilmannip Avannaata Kommunia kajumissaarpaa ilinniarnertuunngorniarfimmik nutaamik pilersitsinissaq eqqarsaatiginagu ilinniartitaanermi periarfissat nutaat eqqarsaatigineqqullugit.

- Nunarput tamaat isigalugu ilinnialernissamut kajumissaarineq periarfissanillu amerlanerusunik ujartuinissaq aqqutissiortariaqarparsi. Inunngortartut amerliartunngillat, GUX-mullu qinnuteqartartut ikaliartoratik, taamaattoq kikkut tamarmik ilinnialernissaminnut inissaqartuaannanngimmata teknologi ineriartuinnartoq atorluartariaqarpoq. 

- Ullumikkut qarasaasiatigut najugaq qimanngikkaluarlugu ilinniarsinnaaneq periarfissaavoq, isumaqarpunga iluliarmiut kisiisa pinnagit nuna tamaat innuttaasunut ilinniarnikkut periarfissiinissaq sulissutigineqartariaqartoq. Nunattami ilinniarsimassutsikkut qaffassarnissaa pisariaqartipparput, Simigaq Heilmann oqarpoq.