Nordafar suli aseroriartorpoq

Kalaallit Nunaata Savalimmiullu sumiginnagaat Kommuneqarfik Sermersuup pigiinnarumavaa.

Savalimmiormiut aalisartut Kangerluarsussuarmi minnerusumik tunitsiveqarsimapput.

Sermitsiaq

Kurt Kristensen Kurt Kristensen Tusagassiortoq

Saqqummersinneqarpoq 7. Septembari 2024 - 08:11

Aviisimi sulisoq Nuup kujataanut umiatsiarnermi kangerlunnut marlunnut, Kangerluarsussuarmut Kangerluarsorusermullu tikippoq.

Sumiiffiit marluk 52 kilometerinik imminnut ungasitsigisut assigiimmik oqaluttuassartaqarput: Aalisartut savalimmiormiut 1900-kkuni pisatik kangerlunni tulaattarpaat, taakkunanilu tunisassiorfiusimasut najugaqarfiusimasullu maanna qimanneqarsimallutillu aseroriartortut Kalaallit Nunaata oqaluttuassartaata ilaannut immikkuullarissumut eqqaassutissaapput.

NERIORSUUT UNIOQQUTINNEQARTOQ

Aksel V. Johannesenip Savalimmiuni naalakkersuisut siulittaasuattut Kim Kielsen Múte B. Egedelu naapinnikuuai

Savalimmiormiut aalisartui 1900-kkunni Kitaata sineriaani aalisariutinit arlalinnit aalisartarput – 1926-mi Ravns Ø-miit 1989-imi Nordafarimut. Savalimmiormiut suliffissuarpassuit ineqarfiillu iluarsaassinngiivillutik qimappaat, suliffissuillu qimatat, ilaatigut Nuup kujataani Nordafarimiittut, naalagaaffeqatigiinnermi Atlantikup avannaani suleqatigiinnermut akornutaapput.

Tórshavnimi 2016-imi ataatsimiinnermi lagmand Aksel V. Johannesenip saliineq akilerniarlugu Kim Kielsen neriorsorpaa.

Savalimmiormiut nunatsinniinnerminni kalaallit pisuussutaat inoroorsaarnerallu iluaqutigisimavaat. Taamaammat saliisimannginnatta illut uagutsinnut savalimmiormiunut kanngunarsaataasut oqartoqarsinnaavoq. Tamanna kalaallinut tunniuttariaqaripput isumaqarpunga, Savalimmiuni naalakkersuisut siulittaasuat oqarpoq.

Neriorsuut tamanna eqquutsinneqanngisaannarpoq.

Savalimmiormiu ilisimaneqartoq Kalaallit Nunaanniittoq

Neriorsuutiminik unioqqutitsisuuvoq Aksel V. Johannesen, 1972-imi inunngortoq, partiimi socialdemokraatinut ilaasortaasumi Javnaðarflokkurinimi siulittaasoq. Marloriarluni naalakkersuisuni amerlanerussuteqartuni Tjóðveldi saamerlermik isumaqartut aamma Framsókn socialliberaliusut peqatigalugit siulittaasuusimavoq.

Siullermeerluni 2015-imi septembarip 15-ianniit 2019-imi septembarip 16-iannut siulittaasuuvoq, piffissamilu tamatumani Kalaallit Nunaanni saliinissaq pillugu Kim Kielsenimut neriorsuivoq.

Aappassaanik 2022-mi decembarip 22-aniit.

Aksel V. Johannesenip Savalimmiuni naalakkersuisut siulittaasuattut Kim Kielsen Múte B. Egedelu naapissimavai; kingullermik 2023-mi Nuummi naalagaaffeqatigiit ataatsimiinneranni sapaatillu akunnerani kingullermi Ålborgimi. Naalakkersuisut siulittaasuisa kingulliit marluk siulittaasoqatertik Savalimmiormioq 2016-imi Kalaallit Nunaannut neriorsuutaanik eqqaasinnissaanut periarfissaqarluarnikuupput.

Nordafarimi savalimmiormiullu tunitsiviini allani saliinissaq Ålborgimi naalagaaffeqatigiit ataatsimiinneranni oqaluuserineqarnersoq Sermitsiap Múte B. Egede aperaa, aaqqissuisoqarfimmili piffissaliussap killinga nallermat suli akineqanngilagut.

Piffissamilu tassani Nordafari isajartuinnarpoq.

Aviisimi sulisoq Nuup kujataanut umiatsiarnermi kangerlunnut marlunnut, Kangerluarsussuarmut Kangerluarsorusermullu tikippoq.

Kangerluarsussuarmi tunitsivik, pinngortitami kusanarluinnartumiittoq, ikitsuinnarnik aserorsimaqisunillu najukkami aalisartut piniartullu suli ullumikkumut unnuiffigisartagaannik illutaqarpoq. Uuliamik mingutsitsisoqarsimaneranik imaaliallaannaq takussutissaqanngilaq. Kangerluarsorutsimi, Nordafarimi Gl. Færingehavnimilu, tunitsivik anginerujussuuvoq, aseroriartorneralu ersinarneruvoq.

Ussassaarut

Tunitsiviit tamarmik Kommuneqarfik Sermersuumiipput, kommunalbestyrelsimilu ilaasortat Qeqertarsuatsiaanukartillutik Nordafar Gl. Færingehavnilu aqqusaarpaat. Kommuunimi politiikerit savalimmiorliut tunitsiviisa oqaluttuassartaat ima soqutigitigaat maanna Nordafarimi tunisassiorfiup tulattarfimmut, »Kalaallit Nunaanni tulattarfiit takinersaattut« isannginnerani ilaa takornarissanut ornitassianngorlugu pigiinnarnissaanut periarfissanik ujartuilerlutik.

– Kalaallit Nunaanni aalisarnerup ineriartornerani oqaluttuaq pingaarutilik oqaluttuarissallugu Nordafar naleqqussoraarput, kommuunimi inuussutissarsiornermut ingerlatsisoq Mads-Daniel Skifte Sermitsiamut oqarpoq.

Umiatsiartorpassuit Nordafar aqqusaartarpaat, ilaallu niusarput. Imali aseroriartortigimmat illorsuit aserorsimanerit mianersoqqusissutinik kommuunimiit allagartalersorneqarsimapput.

Piginnittoq ujarneqarpoq

Kommuneqarfik Sermersuulli ajornartorsiut Kalaallit Nunaanni Savalimmiunilu oqartussat unittoorfigisimasaat iluarsiniaqqaartussaavaa. Aalisakkeriveqarfimmik kina piginnittuunersoq inissinneqarsimanngilaq, piginnittorlu paasineqartinnagu soqutigisaqartut nutaat illorsuit aalajangiiffigisinnaanngilaat – qanorluunniit isalertigigaluarpata.

Ingerlatseqatigiiffik Nordafar A/S, 1953-imi pilersinneqartoq, 1989-imi akiliisinnaajunnaarpoq, taamaammallu illorsuit pequttallu Nuummi 1990-imi oktobarip 15-iani pinngitsaaliilluni akitsorterinikkut ingerlatseqatigiiffimmut namminersortumut »Handelsselskabet Færingehavn ApS«-imut tunineqarput.

Piginnittunngortut suliffeqarfiit inuussutissarsiortut aalisakkeriveqarfitoqqamik soqutiginnilersinniaraluarpaat, misiliinerli iluatsinngilaq. »Handelsselskabet Færingehavn« 1994-imi juulip 19-iani nammineq kajumissutsimik sulianik unitsitsivoq. Taamanili Nordafar piginnittoqanngilaq. Savalimmiuni naalakkersuisut siulittaasuata Aksel V. Johannesenip saliinissaq akilissagitsik 2016-imi neriorsuutigaa, kinali piginnittuunersoq naluneqarmat savalimmiormiut isumartik allanngortippaat. Ukiaq kingulleq Savalimmiuni naalakkersuisut siulittaasuata allaffeqarfia Sermitsiamut ima nalunaaruteqarpoq:

– Naalakkersuisut pigisami nunami allamiittumi saliinissaminnut tunngavissaqanngillat. Naalagaaffeqatigiillu sapaatip-akunnera kingulleq Ålborgimi ataatsimeeqatigiimmata Savalimmiut siorna isumarisartik allanngortissimanngikkaat Savalimmiuni naalakkersuisup siulittaasuata allaffiani pisortap Pól Rosenmeyer Wollesip Sermitsiamut oqaatigaa.

Pisartagaqarneq

Allaaserisaq tamaat atuarniarukku atuisunngortariaqarputit! Iserit!

Sermitsiaq.gl – Nittartagaq

Sermitsiaq.gl-imi allaaserisat tamakkiisumik atuarsinnaalissavatit
Qaammammut kr. 59.00
Ukiumut kr. 650.00

ATUISUNNGORIT

Asasarput atuartartoq, Sermitsiaq.gl-imut – Kalaallit Nunaanni nutaarsiassanik isornartorsiuisumillu tusagassiornermik saqqummiussiffimmut – tikilluarit. Kiffaanngissuseqarluni tusagassiornerup siuarsarneqarneranik suliniuteqartuarsinnaajumalluta, itisiliillutalu isornartorsiuilluta tusagassiortuarsinnaajumalluta, allaaserisat aalajangersimasut akeqalersippavut. Tamanna iluaqutigalugu allaaserisat pitsaassusaat qulakkeersinnaavarput, tusagassiortuttalu pikkorissut oqaluttuanik pingaarnerpaanik saqqummiussinissaannut tapersersorsinnaavavut. Allaaserisat akillit qaammammut taamaallaat 59 koruuninit akeqarput. Pisineq ajornanngitsuararsuuvoq – ataaniittoq toorlugu saqqummiussavut tamakkiisumik iserfigisalersinnaavatit. Paasinninnerit tapersersuinerillu qujamasuutigaavut. Pituttorsimanngitsumik isornartorsiuisumillu Kalaallit Nunaannut tusagassiortarnissamik suliniuteqartuarnissamut akiliutivit ikiorpaatigut.