Nuna allanngutsaaliugaq WILD Nature Foundationimit Andreas Mogensenimillu alakkarneqassaaq

WILD Nature Foundationimi assiliisartut qaammammuliartartorlu angerlaqqammersoq, Andreas Mogensen Qeqqata Kommuniani Kommune Qeqertalimmilu nuna allanngutsaaliugaq alakkartussanngorpaat.

Qeqqata aamma Qeqertalik kommunit kiisalu Avatangiisinut naalakkersuisoqarfiup WILD Nature Foundation taassumalu nittarsaassisua silaannarsualiartartoq Andreas Mogensen Kitaani nuna allanngutsaaliugaq nutaaq pillugit suleqatigiipput

Qeqqata Kommunia, Kommune Qeqertalik, Avatangiisinut naalakkersuisoqarfik, WILD Nature Foundation kiisalu Andreas Mogensen Kitaani nuna allanngutsaaliugaq nutaaq pillugit suleqatigiipput. Pingasunngornermiit sapaatip tungaanut nuna allanngutsaaliugaq alakkarteriffigissavaat.

Nuna allanngutsaaliugaq nutaaq Kangerlussuup avannaaniit Qeqertarsuup tunuanut siammarsimavoq, tikeraallu Qeqqata Kommuniani borgmesteri Malik Berthelsen (S) peqatigalugu nunap allanngutsaaliukkap kujataatungaa aammalu Kommune Qeqertaliup borgmesteria Ane Hansen (IA) peqatigalugu nuna allanngutsaaliukkap avannaatungaa alakkartissavaat.

WILD Nature Foundation pinngortitami assiliisartut Uri & Helle Løvevild Golman kiisalu direktør Irene Greve siuttoralugit ineriartortitsilluni suliniummik pissanganartumik aallartisaanermi pisariusumi kommunit siulersorlugit ilitsersorlugillu ikiornikuuaat. Maannakkut siullermeerlutik nuna allanngutsaaliugaqarfik alakkartissavaat aammalu nittarsaassisutik aamma silaannarsuarmiit angerlaqqammersoq Andreas Mogensen angalanermini ilaquttaminik ilagisaqartoq ilagissallugit.

Innuttaasunik ataatsimiisitsinerit

Kommunini marluusuni innuttaasut tikeraat naapinnissannut nunamillu allanngutsaaliukkamik suliniut aamma silaannarsualiartartup silaannarsuarmi angalaneranik naapitsinissamik periarfissaqarput.

Qeqqata Kommunia naapertorlugu taakku pissapput

  • Pingasunngorneq 19. Juni nal. 16:30 Kangerlussuarmi Illu tamatigoortumi
  • Sisamnngorneq 20. juni nal. 19.30 Sisimiuni KTI kantinani
  • Sapaat 23. juni nal. 12.30 Qasigiannguani Katersortarfimmi.

Avatangiisinut naalakkersuisoqarfimmiit aamma WILD Nature Foundationimit nuna allanngutsaaliugaq pillugu naatsunik saqqumiisoqassaaq kiisalu Andrea Mogensen oqalugiaateqassalluni. 

Sisimiuni Aasiannilu inuiattut ullorsiornermut atatillugu tikeraat takunissaannut innuttaasut periarfissaqassapput. 

Aasianni Aasiaat Midnight Run ukiunik 30-nik nalliuttorsiornerannut atatillugu pissaaq.

Qeqqata Kommuniani Kangerlussuarmi Nuna allanngutsaaliukkami alakkarterinerup saniatigut tikeraat aammattaaq nunap timaani nunarsuarmioqataasunut kingornussassaqarfimmik Aasivissuit-Nipisat ATV-nullu aqqutissaq pillugit Qeqqata Kommuniata suliniutai pillugit tusagaqarnissap saniatigut Sisimiut teknologimik ilisimatusarnermilu qiterisaqarfiunera pillugu tusagaqarnissamut periarfissaqassapput. 

Kommune Qeqertalimmi Angutiviup aamma Juunarsip Atuarfiata Mission ULTRA SPACE-imik kommunip suliaqarneranik ukkataqartoqassaaq.

Powered by Labrador CMS