NUNAT AVANNARLIIT MINISTERIISA SIUNNERSUISOQATIGIIFFIAT
Nunat avannarliit ministeriisa siunnersuisoqatigiiffianit alloriarneq isumallualersitsivoq
- Nuannaarutigaara maanna Nordisk Ministerrådimi qanoq iliornikkut tamakkiisumik ilaasortanngorsinnaanersugut suliniutigineqalermat inatsisitigut misissuinermik suliaqartoqarneratigut, Naalakkersuisunut siulittaasoq, Jens-Frederik Nielsen (D) Sermitsiamut oqarpoq.
- Ministerrådi aqqutigalugu nunat avannarliit suleqatigiinnerat peqataaffigissallugu assut kissaatigaarput, aamma piareersimavugut siunissamut aalaakkaasumik suleqatigiinnissatta patajaatsuunissaa pillugu sulissuteqassalluta, Naalakkersuisut siulittaasuat, Jens-Frederik Nielsen (D) taamak oqarpoq, Nordisk Ministerrådip pisortaanera, Karen Ellemann, Nordisk Ministerrådimut ilaasortaanissaanut sulissutiginninnissamut atatillugu.
Assiliisoq: Arnaq Nielsen
Nunatsinnut tusarluanartumik Nunat avannarliit siunnersuisoqatigiivisa allattaanerannit Nordisk Råds ministerrådianni pisortaanermut Karen Ellemannimit nalunaarutigineqartut, Nunatsinni Naalakkersuisunut kingumut neriuuteqartitsilerpoq nunatta tamakkiisumik ilaasortanngorsinnaanera pillugu:
- Ministerrådimi suleqatigiinneq avannarlermiut akornanni kissaatigaarput. Taamatuttaaq kissaatigaarput tamanna naligiilluni peqatigiinnermik aallaaveqassasoq. Kissaatigisara tassaavoq, inatsisitigut misissuisitsineq aallartinneqartoq inerneqarumaartoq Helsingforsimi isumaqatigiissutip allanngortinneqarneranik. Tamannami pissappat siunissami suleqatigiinnermut tunngavissaqalissagatta, pingaartumik Kalaallit Nunaat aamma Issittoq pillugit suliaqartoqarneranut atatillugu naligiissumik peqataasinnaanngussagatta, Naalakkersuisut siulittaasuat, Jens-Frederik Nielsen Sermitsiamut oqarpoq.
Jens-Frederik Nielsen ilaatigut innersuussivoq avannarlermiut akornanni qanimut ataqatigiinneq, taannalu aallaaveqartoq Kalaallit Nunaanni naleqartitanut assingusorujussuarmik, aammalu ataatsimoorussarineqarmat Issittumik aammalu Issittumut qanittumik nunaqarneq.
- Nunat avannarlerni issittumilu unammilligassagut imminnut assingullutillu attuumassuteqarput, qularutiginngilaralu immitsinnut qaninnerulersinnaagutta tamanna iluaqutigisinnaagipput, Jens-Frederik Nielsen naqissusiivoq.
Nunarsuarmi pissutsit nunat akornanni qanittumik suleqatigiinnissamik pisariaqartitsisitsipput
Naalakkersuisut siulittaasuat aamma innersuussivoq nunarsuarmi pissutsit, najummatsisimanartorsiornerit, sorsunnerit aporaannerillu annertummata, nunat imminnut qanimut suleqatigiittut akornanni attaveqaqatigiinnissap annerulernissaa pisariaqartoq:
- Politikkikkut suliassaqarfinni amerlasuuni, Nunat Avannarliit Ministerrådiata suliarisartagaanni aalajangiisarfigisartagaannilu, peqataarusuppugut. Tassami inuiaqatigiinni aaqqissuussinitsinni, atugarissaarnermut aaqqissuussinitsinni minnerunngitsumillu Nunat Avannarliit Issittullu eqqissisimasumik ineriartortinniarlugit sulissutigisatsinni, soqutigisagut assigiipput.
Naalakkersuisut siulittaasuat isertuarani ilanngullugu oqaatigaa, Nunat Avannarliit Ministerrådiata politikkikkut piumassuseqarnermik ersersitsinerunissaa kissaatigigini:
- Maannatut itsillugu, aammalu siunnersuisoqatigiit allattaanerata Karen Ellemannip, nalunaarutigisaa imatut paasivarput, "inatsisitigut ajornaatsuinnaanngitsutut" nalilerneqartoq. Neriuutigivara tamanna akimmiffinngussanngitsoq tamakkiisumik naligiissumillu ilaasortanngorusunnitsinnut tunngatillugu, qularutigineqassanngilarli maanna tigussaasumik suliniutiginnittoqalernera tungitsinniit nuannaarutigigipput, Naalakkersuisut siulittaasuat, Jens-Frederik Nielsen (D) naggataatigut oqarpoq.
