NUNAT AVANNARLIIT SULEQATIGIISSUT
Nunat Avannarliit Siunnersuisoqatigiiffianni silaannaq kissakkiartulerpoq
Naalakkersuisut siulittaasuat, Múte Bourup Egede (IA) oqaasertaleeqqammerpoq qanoq ajornakusoortigisoq Kalaallit Nunaat matup silataanut inissinneqaraangat, Nunat Avannarliit Ministerrådi ataatsimiittarnerini aamma nunani tamalaani pisussaaffiit aaqqissuunneqaraangata. Maannali silaannaq kissatsikkiartulerpasippoq.
Nunat Avannarliit ilaasortaasa Inatsisartuisa 2023-miilli Helsingforsaftalip allanngortinnissaanut siunnersuutertik naammasseqqammerpaat. Kisianni suli siusippallaarpoq oqaatigissallugu Kalaallit Nunaat Savalimmiullu namminneq ilumut ilaasortatut inissisimaffeqalerumaarnersut.
Assiliisoq: Louise Jeppesen/norden.org
Nordisk Råd-imi inatsisartunut juunip naanerani 2023 suleqatigiissitamik pilersitsipput, isumaqatigiissutip Helsingforsaftalenip 1962-meersup kingornalu allannguutaasimasup allanngortinnissaanut siunnersuutissanik saqqummiussassanik innersuussuteqassallutik.
Kalaallit Nunaata, Savalimmiut aamma Ålandip Nordisk Rådimi inissisimanerannut innersuussutit
- Nunat Avannarliit naalakkersuisuisa Helsingforsaftalip allanngortinnissaa isumagissagaat, taamaalilluni Nunat Avannarliit suleqatigiinneranni naligiissumik peqataaneq nunat akornanni tunngaveqassasoq, aamma Kalaallit Nunaata, Savalimmiut aamma Ålandip suleqatigiinnermi peqataanerat namminersulernermik ineriartornermik takutitsissasoq, aamma assigiinngissutsinik naapertuilluarnermik siunissamilu ineriartornermik periarfissiissasoq,
imaluunniit
- Nunat Avannarliit naalakkersuisuisa misissuissasut Helsingforsaftali qanoq allanngortinneqarsinnaanersoq, taamaalilluni Kalaallit Nunaata, Savalimmiut aamma Ålandip Nunat Avannarliit suleqatigiinneranni peqataanerat nukittorsarneqarsinnaasoq, Danmarkip Savalimmiullu akornanni aamma Kalaallit Nunaata, taamatullu Finlandip Ålandillu akornanni inatsisitigut sinaakkutit tunngavigalugit.
Ippassarlu innersuussutitik saqqummiuppaat. Taakkunani "Helsingforsimi isumaqatigiissut" Kalaallit Nunaannut Savalimmiunullu immikkut soqutiginartuupput. Tassami taakkua aqqutigalugit Kalaallit Nunaata Savalimmiullu siunnersuisoqatigiinni inissisimanerat eqqartorneqarpoq.
Immikkut sammineqartumut isumaliutissiissutit qimerlooraanni, ajornakusoortoq takuneqarsinnaavoq, tassami innersuussutinik marlunnik isumaliutissiissuteqartariaqarsimammata (takuuk paasissutissiissut sinaaniittoq).
Qisuariarnerit assigiinngillat
Ataaseq tassaavoq Nordisk Råd-imi nunat ilaasortat inatsisartuini ilaasortaatitaasut innersuussutaat, alla tassaavoq nunani avannarlerni ministerit siunnersuisoqatigiiffianni innersuussutigineqartut qanoq suliarineqarnerat. Taamaattumillu Naalakkersuisut siulittaasuat mianersortumik qisuariarpoq, illuatungaanili assersuutigalugu Doris Jakobsen Jensen (S) angusamik nuannaarutiginnilluinnarpoq, killiffimmilu angusaq taavaa "oqaluttuarisaanermi alloriarneq".
Naalakkersuisut siulittaasuat Múte Bourup Egede (IA) oqarpoq:
- Siumoortumik oqaatigineqarsinnaanngilaq Nordisk Råd-imi ilaasortanngussanersugut. Tassami assigiinngissuseqarpoq Nordisk Råd-imi Inatsisartutigut ilaasortat isumaqatigiissuteqarnerat aamma Nordisk Rådip Ministerrådiata, tassa nunat ilaasortaasut naalakkersuisuisa siunnersuisoqatigiiffianni qanoq aalajangertoqarumaarnersoq utaqqimaaqqaagassaavoq, kisianni ullumikkut killiffik soorunami naammagisimaarparput, tassami qanittumik attaveqarnissamik suleqateqarnissamillu ineriartortitsinissamik pimoorussilluta soqutiginnikkatta.
Nordisk Rådimi nunat ilaasortat maanna nalilersuisussanngorput
Reykjavik-imi Nordisk Rådip 76. ataatsimiinnerani, Nordisk Rådip ilaasortai nunat avannarliit naalakkersuisuinut isumaqatigiissutip Helsingforsaftalenip nutarterneqarnissaa innersuussutigaat. Tamanna isumaqarpoq Helsingforsaftalen nunani pineqartuni suliarineqassasoq, aamma naalakkersuisut Nordisk Ministerråd aqqutigalugu Nordisk Rådimut akissutissamik ataatsimut tunniussaqassasut.
- Nunat Avannarliit suleqatigiinnerat "inatsimmik tunngaviusumik" pisariaqartitsivoq, taannalu ullumikkut piffissamut naleqqussagaassaaq inuiaqatigiinnilu killiffigineqartunut naleqquttuussalluni. Uagut isumaqarpugut tamanna pingaaruteqarluinnartoq Nunat Avannarliit suleqatigiinnerisa ingerlaqqinnissaanut, Bryndis Haraldsdóttir, Nordisk Rådip siulittaasua oqarpoq.
Qaqugu nunat avannarliit naalakkersuisuisa akissutissartik tunniutissagaat ullulerneqanngilaq.
