Siumup Nunat Avannarliit Siunnersuisoqatigiivini ajornartorsiut naalagaaffinngornissamut toqqaannartumik maanna atassuserpaa.
Vivian Motzfeldtip (Siumut) nunanut allanut politiki pillugu nassuiaat Inatsisartunut saqqummiutereeraalu, partiip oqaaseqartartua Doris J. Jensen Nunat Avannarliit Siunnersuisoqatigiivi aamma Issittumi Siunnersuisoqatigiit pillugit oqaluttarfimmit ima oqaaseqarpoq:
Siumup Nunat Avannarliit Siunnersuisoqatigiivini ajornartorsiut naalagaaffinngornissamut toqqaannartumik maanna atassuserpaa.
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat
ilaanni allaaserisaavoq.
Allaaserisat pisartagaqartunit siunissami taamaallaat
atuarneqarsinnaajumaassapput.
Atuarluarna.
Vivian Motzfeldtip (Siumut) nunanut allanut politiki pillugu nassuiaat Inatsisartunut saqqummiutereeraalu, partiip oqaaseqartartua Doris J. Jensen Nunat Avannarliit Siunnersuisoqatigiivi aamma Issittumi Siunnersuisoqatigiit pillugit oqaluttarfimmit ima oqaaseqarpoq:
- Nunatta tamakkiisumik ilaasortanngornissaa, naligisatut pineqarnissarput aamma periusitoqqat piffissami sivisuumi periaaserineqartut allanngortinneqarnissaat kissaatigaarput. Nunatta naalagaaffiunnginnera pissutigalugu piumasaqaativut itigartinneqartarput, Kunngeqarfiup Danmarkip ilagimmatigut. Taamaattumik Siumut isumaqarpoq kingusinaarnata §21-p (Namminersornermut inatsimmi, aaqq.) atuutilersinneqarnissaa anguniarlugu suliniarnerit aallartinneqartariaqartut. Naalakkersuisut taamaalillutik pisinnaatinneqassammata isumaqatigiinniarnerit aallarnisarnissaannut, Nunatta naalagaaffinngornissaa siunnerfigalugu, Doris J. Jensen partip oqaaseqartartuatut oqaaseqarnermini oqarpoq.
Pingaarnertut oqaatigisaminut tamatumunnga ima ilassuteqarpoq:
- Naalagaaffinngornissatsinnut ingerlaarpugut. Maannangaaq naalagaaffittut eqqarsalertariaqarpugut. Nunanut allanut tunngasutigut tamakkiinerusumik aaqqissuussinissaq eqqarsaatiginerusariaqarparput. Kiffaanngissuseq tassaniippoq, tamatumani naqisimaneqarata nuna naalagaaffittut inuiaqatigiittullu ineriartortissavarput.
Tapersersuineq nipangersimanerlu
Múte B. Egedep Nunat Avannarliit Ministeriisa Siunnersuisoqatigiivisa ataatsimiinnerannut peqataajumannginnera, Inatsisartut ataatsimiittarfianni aamma Nuummi Namminersorlutik Oqartussat allaffeqarfianni sapaatip akunnerini kingullerni oqallisigineqangaatsiarsimavoq.
Christiansborgimi aamma arlaleriarluni oqallisigineqarpoq. Savalimmiormiut Mútep aalajangernera tapersersorpaat, namminersorlutillu oqartussaqarfiit pingajuat Åland Kalaallit Nunaata nunani avannarlerni suleqatigiinnermik isornartorsiuinera pillugu paasinninnerminik ersersitsivoq. Ålandimi nunani avannarlerni suleqatigiinnermut ministerip Annika Hambruddip Altinget.dk-mut oqaatigaa, Sverigep siulittaasuutitaqartutut Kalaallit Nunaat, Savalimmiut aamma Åland Nunat Avannarliit siuttuisa Stockholmimi maajimi ataatsimiinnissaannut aggersarsimanngimmagit »ajorluinnartoq«.
Nunalli Avannarliit Ministeriisa Siunnersuisoqatigiivi, Sverigeluunniit siulittaasuutitaqartutut, peqataannginnermut pisortatigoortumik qisuariaaateqanngillat. Qisuariartoqanngivippoq. Nipaannersuarmut aportutut misinnarneruvoq.
AG-p tamatumunnga atatillugu Nunat Avannarliit Siunnersuisoqatigiivi attaveqarfigai, paaserusullugu Kalaallit Nunaata aalajangernera siunnersuisoqatigiit nittartagaanni sooq eqqaaneqannginnersoq, nutaarsiassanili aaqqissuisoq André Jamholt saaffiginnissutitsinnut akissuteqanngilaq. Nunat Avannarliit Siunnersuisoqatigiivi tusagassiuutinut nittartagaqarput, nalinginnaasumik pisunik annertuunik annikitsunillu allaaserisaqarfiusartumik. Nunalli Avannarliit suleqatigiinneranni pingaarutilimmik inissisimasup, Kalaallit Nunaata, Nunat Avannarliit Ministeriisa Siunnersuisoqatigiivini suleqateqarnerminik unitsitsigallarnera, maluginiarneqanngilaq.
Múte B. Egedep iliuuserisaa Inatsisartuni tapersersorneqarluarpoq. Pineqartoq Inatsisartuni siullermeerlugu oqaluuserineqarmat tamanna paasinarsivoq.
- Nunat Avannarliit Siunnersuisoqatigiivini, pingaarnernut pingaannginnerusunullu immikkoortitsilluni inissiineq naammalerpoq. Nunat Avannarliit Siunnersuisoqatigiivi uagutsinnut isumaqassappata, naligiimmik pineqartariaqarpugut. Tassa imaappoq, ataatsimiinnernut Issittumut tunngassuteqartunut tamanut peqataatinneqarluta, nammineq nunagisatsinni oqartussaaqataassariaqaratta. Iluaqutaanngilaq, ataatsimiinnerni, avataanut inissinneqartarnissaq, Nivi Olsen partip oqaaseqartartuatut saqqummiussinermini oqarpoq.
Kalaallisut oqaatsitta Siunnersuisoqatigiinni atorneqannginnerat aammattaaq naammaginngilaa.
- Nunat Avannarliit Siunnersuisoqatigiivisa oqaatsivut ataqqisariaqarpaat. Aallaqqaammut Nunat Avannarliit Siunnersuisoqatigiivisa tunngaviat – Helsinkimi isumaqatigiissut – kalaallisuunngortinneqartariaqarpoq, aamma nalinginnaasumik nutserisoqartariaqarpoq ilaasortaatitavut peqataasullu allat namminneq oqaatsitik atorlugit tunngavilersuisinnaaniassammata oqalussinnaaniassammatalu, taanna isumaqarpoq.
Oqaatsit assigiinngitsut arfinillit atorlugit
Nunat Avannarliit Siunnersuisoqatigiivisa nittartagaat iserfigigaanni quppernerup talerpiata tungaani oqaatsit assigiinngitsut arfinilinnit ikinnerunngitsut toorneqarsinnaapput: Qallunaatut, Svenskisut, Finlandimiusut, Islandimiusut, Norskisut Tuluttullu.
Assersuutigalugu EU-mi suleqatigiinnermi allaanerusumik ingerlatsisoqarpoq, tassani suut tamaasa nunat ilaasortaasut tamarmik immikkut oqaasiinut nutserneqartarmata. Aaqqissuussineq tamanna folketingimut ilaasortap Aki-Matilda Høegh-Damip (S) folketingimi sapaatip akunnerani kingullermi naggataarutaasumik oqallinnermi taallatsiarpaa.
- Europaparlamentimi pissutsit qiviarutsigit, tassani nunat ilaasortaasut mikinerpaartaalluunniit namminneq oqaatsitik atorlugit oqalussinnaapput. Toqqaannartumik nutserisoqarput. Tamanna inuinnaat naalakkersueqataanerannik ataqqinnilluni aaqqissuussineruvoq, oqarpoq.
