Nunatsinni partiit siuttui: Trumpip pissusilersornera akuerineqarsinnaanngilaq
Inatsisartuni partiit tamarmik siulittaasuisa ataatsimut nalunaarumminni USA-p præsidentiata Kalaallit Nunaannik tiguaaniarneranik aqutsiniarneranillu oqaaseqaateqattaarnera akuersaarsinnaannginnerarpaat.
- Kalaallit Nunaat ataasiuvoq ataatsimoorfiusoq, partiit allapput.
Leiff Josefsen
USA-p præsidentiata aammaartumik Kalaallit Nunaanik tiguaaniarnermik aammalu aqutsiniarnermik isumaqarnini 13. marts 2025 NATO-mi Generalsekretærip naapinneranut atatillugu tusagassiortunik katersortitsinermi oqaatigeqqippaa.
Kalaallit Nunaani partiit Inatsisartuni qinersinerup kingorna ilaasortaatitaqartut – Demokraatit, Naleraq, Inuit Ataqatigiit, Siumut aamma Atassut - siulittaasuisa oqaatigineqartut pillugit ataatsimoorussamik imatut oqaaseqarumapput:
- Uagut - Partiit siulittaasui - Kalaallit Nunaanik tiguaaniarnermik aammalu aqutsiniarnermik siunertaqarnermik oqaaseqartoqarnera akuerinngilarput.
- Partiini siulittaasutut akuerinngilarput nunat ikinngutigiit aammalu illersornissakkut ataatsimooqatigiit akornanni taamatut pissuseqartoqarnera.
- Kalaallit Nunaani politikkikkut partiini siuttuttut erseqqissaatigissavarput Kalaallit Nunaata maannamut nunat tamat akornani suleriaatsit malillugit suliani nangillugit ingerlatiinnarmagit tassanilu nunat tamat akornani inatsisit isumaqatigiissutillu malillugit ingerlatsisoqarluni.
- Kalaallit Nunaani partiit tamarmik tamanna ataatsimoorfigaarput aammalu avissaartuutsiniaanermik nipeqartitsineq sakkortuumik akerlilerparput akuersaarnagulu.
- Kalaallit Nunaat ataasiuvoq ataatsimoorfiusoq.
