KILLEQARFINNIK NAKKUTILLIINEQ
Nunatsinnukarniaraanni pas aamma visum ajoquteqassanngillat
Timmisartuutileqatigiiffiit timmisartullu naalagaasa killeqarfimmik nakkutilliinermik pisussaaffiliisumik suliaqarnissaannik qulakkeerinninniarluni nalunaarut nutaaq Kalaallit Nunaannut atuuttussaq suliarineqarpoq. Naalagaaffik killeqarfinnik nakkutilliisuugaluartoq nunarput sillimasariaqarpoq suliassap ilaanik kivitsinissaminut.
Timmisartuutileqatigiiffiit, soorlu Air Greenland, nunatta iluani nunattalu avataanut timmisartuussissisartut timmisartuutileqatigiiffiillu allat tikilaaginnartartut siunissami pisussaaffilerneqassapput inatsisitigut akisussaaffiusumik qulakkiissallugu angalasut Kalaallit Nunaannut isersinnaanermut piumasaqaatinik naammassinninnissaminnut.
Asseq toqqorsivimmit: Leiff Josefsen
Kalaallit Nunaata nunarsuarmi tamarmi attaveqarnerulernera Nuup mittarfittaavara nunat tamalaat akornanni angallannermut atulerneratigut, assigiinngitsunik malitseqarpoq.
Nuup nunani tamalaani mittarfittaavata ammarneqarnerani nunatta piginnaasaanut sanilliullugu, soorlu nunanit allaniit Kalaallit Nunaannut soqutiginninnerup aqunneqarsinnaanerannut tunngatillugu, sukkavallaamik ingerlarsortoqarsimanersoq akissutissarsinngilarput suli.
Taamaattorli Sakiusi Biiniamiillu (innuttaaasut) ernumassuteqalersimasut ilisimaneqarpoq, tassami innuttaasut akornanni apeqquserneqaqqajaasarpoq nunatsinnut matut qiveqqaannalersimanersut aammalu kikkut nunatsinnut tikittarnersut taakkulu sunik siunertaqartarnersut.
Nunanit allaneersunik pinerlunniarnermik siunertaqartunik imaluunniit unioqqutitsillutik nunatsinni nunasinissamik isumapiloqartut ikinnerpaatinniarlugit Kalaallit Nunaanni Politiit Nuup mittarfittaavata ammarneqarnera sioqqullugu atuutilereerneranilu piareersimallutillu inerisaapput.
Tamatuma saniatigut nalunaarut nutaaq maanna aalajangerneqarnissaminut piariingajalerpoq, taanna nunani allamiunut akuunerulersitsinissamillu ministereqarfiup nunatsinnut nassiunnikuuaa, aggustillu aallaqqaataata tungaanut tusarniaassutigineqarpoq.
Angalatitseqatigiiffiit nakkutiginnittussanngorput
Nalunaarut taamatut iluseqarluni akuersissutigineqassappat, tamannalu ilimanaateqarpoq, Kalaallit Nunaanni aammalu Kalaallit Nunaannut Kalaallit Nunaanniillu angalatitseqatigiiffiit tamarmik ilaasunut tamanut nakkutiginnittussanngussapput.
Nalunaarut pineqartoq atuuttussanngortinniarneqartorlu, malitseqartussaavoq timmisartuutileqatigiit inatsisitigut pisussaaffilerneqassasut angalasussat angalanermi uppernarsaatinik kinaassutsimillu uppernarsaataannik aallannginnermi misissortalissagaat.
Timmisartuutileqatigiit angalasumik visumimik imaluunniit isersinnaatitaanermik piumasaqaatinik naammassinnissimanngitsumik ilaasoqarsimappata, taava timmisartuutileqatigiiffimmut tamanna akiliisitaanermik kinguneqarsinnaalissaaq, tamatumalu saniatigut angalasup angerlaanneqarnissaa isumagisassarisalissavaat.
Isumannaallisaaneq nakkutilliinerlu annertusineqassapput
Allagartanik angalanermut tunngasunik misissuisarneq sakkortusineqassaaq, tamannalu pingaartumik nunatsinnukartut, nunanit nunatta Danmarkillu isumaqatigiissuteqafigisat (EU aamma Nunat Avannarliit) avataaneersut annertuumik malugissavaat, taakkumi visumimik (isersinnaanermut uppernarsaammik) peqarnissamik pisussaaffeqarmata, immikkut ittumik eqqugaassapput.
Nunani allamiut akuunerulersitsinissamullu ministeriaqarfik taamaasilluni piumasaqaatinik sakkortusaanissanik siunnersuuteqarpoq, Kalaallit Nunaannut anngiortumik isertitsiniartunut pinaveersaartitsinissutaasussamik.
