Nunatta Eqqartuussisuuneqarfiata Paul Watsonip tigummigallarneqarnera aalajangersaqqikkaa
Sermersuup Eqqartuussiviata Paul Watsonip tigummigallarneqarnerata septembarip tallimaanut sivitsorneqarnera Nunatta Eqqartuussisuuneqarfiata akueraa.
Paul Watson suli tigummigallarneqassaaq. Tamanna Kalaallit Nunaanni Eqqartuussiviup marlunngornermi aalajangerpaa.
ABACA
Paul Watson Nuummi tigummigallarneqaannassaaq. Sermersuup Eqqartuussiviani sisamanngornermi aggustip 15-ani aalajangiineq ullumi marlunngornermi aggustip 20-ani Nunatta Eqqartuussiviani atuutsinneqalerpoq.
- Tunniussinissamik suliap misissorneqarnerata nalaani avatangiisinik illersuiniaqatigiiffimmik Captain Paul Watson Foundationimik pilersitsisoq, Paul Watson, tigummigallarneqaannarallassasoq, Kalaallit Nunaanni Eqqartuussivik sisamanngornermi aggustip 15-ianni 2024-mi aalajangerpoq.
Tunniussinissamik kissaat
Nunanit tamalaanit tigusarinninnissamik peqqussut tunngavigalugu Paul Watson sapaammi juulip 21-ani Kalaallit Nunaanni Politiinit tigusarineqarpoq.
Paul Watsonip nunamit anisitaanissaa siusinnerusukkut piumasarineqarsimavoq, Naalakkersuisulli aamma Kalaallit Nunaanni Politiini unnerluussisussaatitaasoq nassuiaapput Paul Watson pillugu suliaq Kalaallit Nunaanni suliarineqartussaasoq tassani tigummigallarneqarmat, aamma nunamit anisitaaneq naalagaaffeqatigiinnerup iluani pisinnaanngitsoq.
- Septembarip tallimaanni 2024-p tungaanut tigummigallarneqarnissaa Kalaallit Nunaanni Eqqartuussiviup aalajangerpaa, tamannalu Paul Watsonip illersuisuata Nunatta Eqqartuussivianut suliareqqitassanngortippaa. Nunatta Eqqartuussiviata ullumi suliaq isummerfigisimavaa Paul Watsonillu tigummigallarneqarnissaanik eqqartuussiviup aalajangernera atuuttussanngortippaa. Taamaattumik Nuummi pineqaatissinneqarsimasunut inissiisarfimmiiginnassaaq, politiit oqarput.
