PAUL WATSON PILLUGU SULIAQ
Allatut aalajangertoqarnissaata tungaanut Watson Kalaallit Nunaanniiginnassaaq
Naleqqap siulittaasuata Pele Brobergip Danmark isornartorsiorpaa, avatangiisinik illersuiniaqatigiiffiutillip Paul Watsonip tigusarineqarneranut tigummigallarneranullu tunngatillugu. Maanna Naalakkersuisut akissuteqarput: - Paul Watson maani nunami tigusarineqarpoq taamaattumillu maani nunami politiit eqqartuussiviillu suliamik ingerlatsisussaapput, taama oqarpoq inatsisinik atuutsitsinermut naalakkersuisoq, Naaja H Nathanielsen.
Naleraq Watsonimik "Danmarkimut anisitsisoqarnissaa" piumasaqarpoq. Maannali Naalakkersuisut akissuteqarput. - Tamanna kinguneqassagaluarpoq suliap ingerlanneqarnerani Kalaalllit Nunaata Danmarkillu akornanni uteqattaartinneqassasoq, tassami taanna Kalaallit Nunaanni tigusarineqarpoq taamaammallu suliaq maani ingerlanneqassaaq, inatsisinik atuutsitsinermut Naalakkersuisoq, Naaja H. Nathanielsen (IA) oqarpoq.
Assiliisoq: Jørgen Chemnitz
OBS! Malugiuk allaaserisaq nutarterneqarpoq Pele Brobergip Danmarkimut anisitsinissamik piumasaqaataanut unnerluussisuunerup Mariam Khalilip qisuariaataanik.
- Pingaaruteqarpoq eqqaamassallugu inatsisit atuutsinneqarnerat danskinit akisussaaffigineqaraluartoq, taamaattoq Kalaallit Nunaat Danmarkimut "inatsisitigut immikkoortortaqarfiunngilaq".
- Assersuutigalugu uagut nammineq pinerluttulerinermut inatsiseqarpugut aamma tunniussisarnermut inatsiserput Danmarkimi atuuttumit allaaneruvoq, inatsisit atuutsinneqarnerannut Naalakkersuisoq, Naaja H. Nathanielsen Sermitsiamut oqarpoq.
Suliaq Kalaallit Nunaanni suliarineqassaaq
Naleqqap siulittaasua sakkortuumik tunngavilersuuteqarluni Paul Watson "Kalaallit Nunaanniit anisinneqassasoq" piumasaqaateqaraluarpoq:
- Danskit akisussaaffiannut Inuiaat Kalaallit akunnermiliuttunngortinneqarput. Politiit danskiupput. Inatsisit atuutsinneqarnerannut ministeriaqarfik danskiuvoq. Paul Watson qanoq pineqassaneranut danskit aalajangigassaraat, Pele Broberg tallimanngormat piumasaqarpoq.
Kisianni Naalakkersuisut, inatsisit atuutsinneqarnerannut ministeriaqarfiup suliamik ingerlatsineranik aammalu aalajangiisussaaneranik ataqqinninnermik ersersitsinikuusut, Brobergip piumasaqaataanut qisuariassallutik aalajangerput:
- Paul Watson maani nunami tigusarineqarpoq, taamaattumik suliaq maani nunami politiinit eqqartuussivimmillu ingerlanneqassaaq. Danmarkimi parnaarussivimmut nuunneqassagaluaruni Danmarkip Kalaallillu Nunaata akornanni uteqattaartinneqassagaluarpoq suliap aalajangiiffigineqarnissaata tungaanut, tassami inatsisitigut suliamik ingerlatsinissaq Kalaallit Nunaanniimmat.
- Taamaattumik nuutsinneqassagaluarpalluunniit tusagassiutinit samminninnermik annikinnerulernavianngilaq, tassami nuutsinneqassagaluaruniluunniit piffissami aggertumi uteqattaartinneqaannassammat, tamatumalu kingunerisaanik sammivilinnik oqallinnernik pilersitsissalluni.
Eqqartuussivik sisamanngornermi ulloq 15. aggusti nal. 12 aalajangiivoq Watsonip tigummigallarneqarnera sivitsorneqassasoq ulloq 5. septembarip tungaanut. Eqqartuussivimmilu ataatsimiinneq nutaaq pissaaq septembarip sisamaanni, tigummigallagaanerata sivitsoqqinneqarsinnaanera ilaatigut aalajangiiffigineqartussaalluni.
Paul Watsonip aalajangiussaq Kalaallit Nunaata Eqqartuussivianut suliassanngortippaa, tassanngaaniillu suliassanngortitsineq aalajangiiffigineqassaaq.
Naalakkersuisut qisuariaataannut unnerluussisuuneq ilumoorneraavoq
Kalaallit Nunaanni Poliitiit unnerluussisuisa pisortaata, Mariam Khalilip Naalakkersuisut qisuariarnerannut ilumoorneraavoq, tassalu Kalaallit Nunaata Politiivisa aammalu Eqqartuussiviata suliaq Paul Watsonimut tunngasoq suliassarigaat:
- Inatsisinik unioqqutitsisimasut tunniunneqarnissaannut inatsit nr. 249, 9. juni 1967-meersoq, Kalaallit Nunaannut atuuttoq naapertorlugu, ersersinneqarpoq qanoq najoqqutaqartoqassanersoq, inuk naalagaaffimmi allami ujaarineqartoq qaqugukkut tigummigallagassanngortinneqassanersoq, aammalu ersersinneqarpoq qanoq ilisukkut inummik pineqartumik tunniussisoqassappat tunniussineq pissanersoq.
- Tassani aamma ersersinneqarpoq inatsisit atuutsinneqarnerannut Ministeriaqarfik tassaasoq tunniussisoqassanersoq aalajangiisussaq. Taamatuttaaq ersersinneqarpoq, tunniussisoqassanersoq pillugu aalajangiineq eqqartuussivimmut tigusarineqarfimmi tigummigallagaaffigineqartumilu suliaq ingerlatsiseqqinneqasssappat tunniunneqartussaasoq, tassa inuup tigusarineqarsimasup sumiiffia tunngavigineqassalluni. Matumani pineqartumi Kalaallit Nunaanni Eqqartussiviit tassaapput suliamik ingerlatsisussat.
- Paul Watson Nuummi tigusarineqarpoq aammalu tigummigallagaanera Nuummi pineqaatissinneqarsimasunut isertitsivimmi isumagineqarpoq, tunniunneqarnissaanillu aalajangiisoqassappat sumiiffimmi tigummigallagaaffiani ingerlanneqartussaavoq, tassalu Kalaallit Nunaanni eqqartuussiviit suliassarivaat, taamaammat suliaq Paul Watsonimut tunngasoq Kalaallit Nunaanni inatsisit atuutsinneqarnerannut inatsit naapertorlugu Kalaallit Nunaanni eqqartuussivimmi Kalaallit Nunanni inatsisit naapertorlugit suliarineqartussaavoq.
Mariam Khalil naggataatigut erseqqissaavoq, Kalaallit Nunaanni inatsisit naapertorlugit, Paul Watson Danmarkimut anisinneqarsinnaanngitsoq, naalagaaffeqatigiiffiup iluani nunat akornanni anisitsisoqarsinnaanngimmat.
