Nuuk: Peqatigiiffiup pilersinneqaqqammersup ooqattaasarfeqalernissaa ujartorpaa
Aallaasartut peqatigiiffiat pilersinneqaqqammersoq Nuummi ooqattaasarfimmik, assersuutigalugu isumannaatsumik ooqattaasarluni sungiusarfissamik, pilersitsisoqarnissaa ujartorpaat. Siunnersuutigineqartoq kommunimit ikiorserneqarluni piviusunngussanersoq Kommuneqarfik Sermersuumi politikerit oqaluuserisussanngorpaat.
Nuummi piniartut ooqattaasartartullu ooqattaasarfimmik peqalernissaa ujartorpaat.
Assiliisoq: Thomas Emil Sørensen/Jyllands-Posten/Ritzau Scanpix
Nuummi ooqattaasarfimmik
pilersitsinissamik innuttaasut siunnersuutaat ima taperserneqartigaaq - 284-inik - Kommuneqarfik Sermersuup Aningaasaqarnermut Inuussutissarsiornermullu ataatsimiititaliaani oqaluuserineqartussanngorluni.
Innuttaasut takornariallu Nuup eqqaani qaqqani angalaartartut amerliartuinnarmata ooqattaasarfimmik pilersitsinissaq pisariaqarnerulersimavoq, taamaattumillu aavarfinngortinnagu isumannaatsumik ooqattaasarluni sungiusartoqarsinnaalernissaa pisariaqartinneqalersimalluni.
Peqatigiiffik nutaaq
Innuttaasut siunnersuutaat tunuliaqutarinagu kommuni aamma peqatigiiffimmit pilersinneqaqqammersumit saaffigineqarpoq. Peqatigiiffik sisorartarfiit nerisarfiani novembarip 21-ani ataatsimiinnermi pilersinneqarpoq, tassani ooqattaasartartut 19-it peqataasut siulersuisunik qinersillutik.
Peqatigiiffik nutaaq Aallaasartut Peqatigiiffianik / Skytternes Forening taaguuteqalerpoq, ataatsimiinnermilu immikkoortut arfineq-pingasut peqatigiiffiup siunertai akuerineqarput:
- Ooqattaasartarneq soqutigineqalersinniarlugu Nuummi eqqaanilu ooqattaqasartarfimmik sungiusarfissamik ineriartortitsinissaq.
- Ooqattaasartarnerup isumannaannerulernissaa.
- Nuummi ooqattaasarfiliornissaq peqatigiiffiup ilaasortaasa soqutiginnittullu allat atugassaannik.
- Ooqattaasartarfik inatsisitigut piumasaqaatinik tamanik malinnittoq, isumannaatsoq tamanullu atorneqarsinnaasoq.
- Ooqattaasarnermik aaqqissuussinerit, unammisitsinerit ilaasortanullu sungiusarnerit aaqqissuunneqartarnissaat.
- Peqatigiiffiup ilaasortaasa ataatsimoornerannut suleqatigiinnerannut siuarsaanissaq kiisalu ooqattaasartarnerup toqqissisimanartumik akisussaassuseqartumillu avatangiiseqarnissaa.
- Peqatigiiffiup ataani ooqattaasoqartillugu imigassartorsimanani ikiaroornartunik allanik sunnerneqarsimanani pissaaq.
- Peqatigiiffik partiimut attuumassuteqanngilaq ilaasortanillu immikkoortitsisuunani.
Siulersuisut qinerneqartut
Aallaasartut Peqatigiiffiani siulersuisut qinerneqarput. Anders Lee Jørgensen siulittaasutut, Jesper Rex Andersen aningaaserisutut Bruno Heilmannilu allatsitut qinerneqarluni.
Peqatigiiffik kommunimut saaffiginnissutimini ima allappoq:
- Nutaamik mittarfissuartaarnerup kingunerisaanik inuit suli amerlanerit qaqqanut illoqarfimmut
qanittunut pisunnerusalissapput . Pingaartumik inuit Nuup timaani angalaarneq ajortut
piniariaatsitsinnillu sungiusimasaqanngitsut. Annilaanngatigaarput inuit piffissap arlaatigut qaqqani
angalaartillutik aallaasimik seqqortunik naammattuuinissaat, taamaattumik aallaasarfimmik
nutaamik pilersitsinissaq sulissutigaarput, piniariartut illoqarfimmi najugallit aallaasiminnik
nakersaaffigisinnaasaannik, akuerisaasumik aaqqissuussat iluanni.
Aningaasaqarnermut Inuussutissarsiornermullu Ataatsimiititaliap decembarip 17-ani ataatsimiinnerminni innuttaasunit siunnersuut Aallaasartut Peqatigiiffianniillu saaffiginnissut oqaluuserissavaat.
