Nuummi innuttaasut 20.000-inngorput
Illoqarfiit pingaarnersaanni innuttaasut amerliartupiloornerat nuannaarutigineqarlunilu unammilligassaqartoq borgmesteri oqarpoq.
Nuummi, ukiuni kingullerni sanaartorfioqisumi, najugaqarneq suliffeqarnerlu nuannarineqaleraluttuinnarpoq.
Assi: Leiff Josefsen
Nuummi innuttaasut kingullermik kisinneqarneranni 20.000-it anguneqarsimasut Kommuneqarfik Sermersooq paasissutissiivoq.
Ineriartorneq ukiuni qulikkuutaanni ingerlavoq. Nuummi innuttaasut 1980-imi 10.000-inngortut nalliuttorsiutigineqarput, taamaalillunilu illoqarfimmi innuttaasut ukiut 45-t ingerlaneranni marloriaatinngorsimapput.
- Soorunami amerliartornerput nuannaarutissaavoq, tamannali aamma piumasaqaatitaqarpoq. Meeqqat, utoqqaat innuttaasullu ajornartorsiutillit inissaqartinnissaat tapersersorneqarnissaallu qulakkiissavarput. Peqatigitillugu inuussutissarsiuteqartut takornarialerinermilu ingerlataqartut ineriartoqataaniassammata pitsaasunik atugassaqartillugit pilersitsiviussapput, borgmesteri Avaaraq Olsen (IA) oqarpoq.
Illoqarfiit pingaarnersaata siunissaanut periusissiamik, Nuuk 2035-mik taaguutilimmik, Kommuni siorna saqqummiussivoq. Illoqarfimmi innuttaasut, suliffeqarfiit kattuffiillu oqaloqatiginerisigut taanna suliarineqarpoq.
Kikkut tamarmik tunuliaqutaat inuunermilu atugaat apeqqutaatinnagit angerlarsimasutut misiginissaat pingaartinneqartoq borgmesteri oqarpoq.
- Periusissiami anguniakkat pingaarnerit ilagaat, Nuuk illoqarfiussasoq kikkunnut tamanut inissaqartitsisoq – maani inunngorsimasunut, aammali maanga nuuttunut. Illoqarfik, ataatsimoornermik tassungalu atassuteqartutut misigineq qitiutillugit, Avaaraq Olsen oqarpoq.
Nuummi innuttaasut 20 procentiisa missaat nunami allami inunngorsimapput. Sinneri 2011-mili taamaaginnarsimasut kommuni allappoq. Ukiunili kingullerni assigiinngiiaarnerulersimapput, ingammik Asiamiunik tunuliaqutallit amerliartorsimallutik.
