Nuummi mittarfik pillugu nalunaarusiaq: Sermeq, aput, qaammaqqutit inuusallu ajornartorsiutaasut
Nuummi mittarfimmi ajornartorsiutit maannamut ilisimaneqanngitsut Angallannermut Aqutsisoqarfiup nakkutilliinermik nalunaarusiaani oqaluttuarineqarput. Apriilimi ukiuunerani silap ajornartorsiortitsilernera arlalinni allaaserineqarpoq. Aamma allagartat qaammaqquteqanngitsut, annaassiniarnermilu sungiusarneq kukkusumik ingerlanneqartoq oqaluttuarineqarput.
Apriilimi ilaannikkut nittaattarpoq. Nuummi ukiuunerani sila mittarfimmi piareersimaffigineqarnerusariaqaraluartoq Angallannermut Aqutsisoqarfimmit tikkuarneqarpoq.
Toqqorsivimmit: Leiff Josefsen
Nuummi mittarfiup arlalitsigut unammilligassaqarnera Angallannermut Aqutsisoqarfiup nakkutilliinermik nalunaarusiaani kingullermi atuarneqarsinnaavoq. Aaqqitassat assigiinngitsut 25-t eqqaaneqarput.
Nalunaarusiaq septembarip 24-ani allanneqarsimasutut ulluligaavoq, apriilimili nakkutilliinermi paasisat ilanngullugit allaaserineqarput. Taamaammat sermeq apullu nakkutilliisut maluginiagaanni arlalinni atuarneqarsinnaavoq. Ilaatigut mittarfiup ungalulersorneqarneranut tunngatillugu.
- Aput ungalut silataani iluatungaanilu portusoorujuummat inuit uumasullu annerit ajornaquteqanngitsumik iseriaannaapput. Aamma ungaloq anngajaamik putoqarpoq, Angallannermut Aqutsisoqarfimmi atorfilik allappoq.
Ukiuunerani ajornartorsiutit aappaat tassaavoq umiatsiat SØR-inik taaneqartartut. Taakku tassaapput timmisartut inuillu kangerlummiilissagaluarpata annanniutitut atorneqartartut. Ajoraluartumik umiatsit motooriilu apummik sermimillu qallorneqarsimanerat pissutaalluni arlaleriarlutik atorneqarsinnaajunnaarsimapput, nalunaarusiami allassimavoq:
– Umiatsiat sumiiffimmi suliaqarfissami angallataasinnaanissaannut piumasaqaammat naapertuutinnginnerat Angallannermut Aqutsisoqarfimmit nalilerparput, tassa Nuummi ukiup annersaani sermertarluni aputeqartarmat.
– Unnuakkut issinnera/apinerani umiatsiat angallataasinnaajunnaartassappata ullut tamaasa nakkutigineqartalernissaat aputaajarneqartalernissaallu Angallannermut Aqutsisoqarfiup kaammattuutigaa.
Aputaajaaneq eqqortumik suliarinngikkaanni ajornartorsiutaalersinnaasoq, nalunaarusiami aamma erseqqissarneqarpoq.
Mittarfimmi sulisut allat ilisimateqqaarnagit aputaajaalluni aallartittoqartoqartoq Angallannermut Aqutsisoqarfimmit maluginiarneqarpoq. Aputaajaasarnerup aaqqissuunneqannginnera mittarfeqarfiup iluani attaveqatigiinnerup amigaataaneranit assersuutinut ilaavoq:
- Pisoq mittarfimmi immikkoortortat assigiinngitsut akornanni paasissutissiinikippaallaarnerit naammaginannginnerannut uppernarsaataapput, Angallannermut Aqutsisoqarfik inerniliivoq.
Nunakkut uniarneqartoq
Sermeq apullu sammineqaannanngillat. Ikuallattoqarnerani qamisaanermut sungiusarneq nakkutilliisoqarfimmit aamma malinnaavigineqarpoq. Inuusat atorneqartut inuttut ajoqusersimasutut ikiorneqartarialittut pineqartussaapput. Sungiusarnermili taamaaliortoqanngitsoorpoq:
- Inuusat ikiorniarneqarnerat inunnut ajoqusersimasunut ikiuunnermi naleqqutinngitsutut pineqarput. Inuusaq kingulleq annaanneqartoq nunakkut uniarlugu qatserisartut biilisa eqqaannukaanneqarpoq qimaannarlugulu, tassani ajutoorfiup ungataanukaateriarlugu uummarsarneqartussaagaluarpoq.
Isornartorsiutigineqartut allat tassaapput qaammaqqutit. Qulliit ilaat aqqutalugineqarsimallutik atorsinnaajunnaasimasut Angallannermut Aqutsisoqarfimmit nalunaarsorneqarpoq. Nakkutilliineq aallartimmat allagartanut qulliit ilaat aamma qulleqanngillat. Allagartat pingaaruteqarnerpaat qaammaqqutinik batterilertartunik mittarfeqarfimmit ikkussiffigineqarput. Angallannermulli Aqutsisoqarfimmeersut suli aallanngitsut taakku batteereerupput.
Ajornartorsiutit tamakku pissutigalugit mittarfiup biilii timmisartunut aqqutsissamik ilitsersuisartut "Follow Me"-mik (malinnga, aaqq.) qaammaqqutilinnik allagartaqarnissaat Angallannermut Aqutsisoqarfiup kissaatigaa. Mittarfeqarfiit allagartaateqaraluarput, sermersimatillugulu aputeqarlunilu taakku ikkukkuminaassinnaasarput.
Nalunaarusiami immikkoortuni 25-ni taakkartorneqartut pilersaarusiornermi isumannaallisaanermilu ajornartorsiutinut mittarfimmut sukaterinermik kinguneqartunut, Sermitsiap arlaleriarluni aallaasereriingaanut, tunngassuteqanngillat. Ajornartorsiutit taakku nakkutilliinermi allami sammineqarput.
Pitsaanerusumik iliuuseqarfigineqarsinnaagaluartoq
Sermitsiap Greenland Airportsimi pisortaaneq Jens R. Lauridsen apersorumallugu saaffiginnissutigaa.
Apersuisoqarsinnaanngikkallartoq Greenland Airportsimi attaveqaqatigiinnermut pisortaq Mikkel Bjarnø Lund paasissutissiivoq. Pisortaanerup allakkatigut akissutai Greenland Airportsimit nassiunneqarput:
- Ukiukkut angallassinermi ajornartorsiutaasut pitsaanerusumik iliuuseqarfigineqarsinnaasunik iliuuseqarfigineqartariaqartunillu peqarnera nassuerutigaarput - ilaatigut nittaarujussuarsimatillugu umiatsiamik annaassiniarnermi atugassamik inissiisarneq, aamma ungalut silarliit eqqarsaatigalugit. Pissutsit taakku ilikkagaqarfigaavut.
- Mittarfik suliffeqarfiuvoq ulapaarfik. Atortorissaarutit nungullariartortarput, aserfallatsaaliorneqartuartariaqarlutik taarserneqartartussaallutillu – soorlu mittarfiup qaammaqqutaanit annaassiniarluni atortut eqqarsaatigalugit.
– Angallannermut Aqutsisoqarfiup maluginiagai tamaasa pimooruppavut. Siulersuisunngortut aqutsisullu suliniutit arlallit aallartereerpaat, pissutsillu peqqissaartumik piffissarlu eqqorlugu suliarineqarnissaat qulakkeerniarlugu Angallannermut Aqutsisoqarfik Air Greenlandilu qanimut oqaloqatigineqarlutillu suleqatigineqarput.
- Aamma suliffeqarfiup avataaneersut suleqatigalugit isumannaallisaanermut tunngasuni misissuineq sukumiisoq tamatumunnga ilaavoq.
– Suliaq tamanna pingaartinnerpaavarput. Isumannaallisaanermut, sulisunut mittarfinnillu atuisartunut tamanut pitsaanermik suleriuseqalernissatsinnut iluaqutissatut periarfissatut pingaarutilittut isigaarput, Jens R. Lauridsen erseqqissaavoq.
