Mittarfiit pillugit immikkut ilisimasalik: Allami taamaattoqarsimaneranik eqqaamasaqanngilanga
Timmisartut akulikitsumik mittarlutillu aallartarput, ataatsimiinnerit pingaarutillit aallartinneq ajorput Angallannermullu Aqutsisoqarfik naammattumik ilisimatinneqarneq ajorpoq. Nuummi mittarfimmi killilersuinernut nutaanut annertuunut suut pissutaanersut Nakkutilliisut nalunaarusiaanni allaaserineqarput. Greenland Airportsip nammineq pisuussutigigaa, silaannakkut angallanneq pillugu ilisimasalik oqarpoq.
Nuummi mittarfissuup nutaap novembarip 28-ani 2024-mi ammarneqarnissaa sioqqullugu ammarneqareerneratalu kingorna unammilligassarpassuit nalaanneqarput.
Assi: René Christensen
– Nuummi pissutsit ilungersunartorujussuupput. Mittarfimmi malittarisassat siorna ingerlatsinissamut akuersissummi tunniunneqartumi allassimasut malinneqarsimannginnerat sianiilliorneruvoq. Qallunaat silaannakkut angallannermi suliaqarneranni assingusumik pisunik takusaqarnikuunngilanga.
Silaannakkut angallanneq pillugu immikkut ilisimasalik Hans Christian Stigaard, Nuummi mittarfimmi nakkutilliinermit nalunaarusiaq Sermitsiamit takutinneqarmat, oqarpoq.
Angallannermut Aqutsisoqarfiup ulluni 2025-mi 16.-23. septembar nakkutilliinera mittarfimmi pissutsit pillugit nutaanik aalajangersaasoqarpoq. Maanna timmisartuussinernut pilersaarusiornermi nalunaaquttap akunneranut amerlanerpaamik marloriarluni mittoqarsinnaalerpoq, amerlanerpaamillu timmisartunik sisamanik kiffartuussisoqarsinnaalerluni. Taakkununnga ambulancet timmisartuussinerat ilaanngillat.
Hans Christian Stigaard Københavnip mittarfiani ingerlatsinermut pisortaasimavoq, aamma timmisartortitseqatigiiffinni siunnersortitut sulivoq.
Assi nammineq pigisaq.
Greenland Airportsip timmisartut minutsinik 15-inik akunneqarlutik timmisinnaanerannut piumasaqaat qanittukkut tikillugu atuuttoq malippiarsinnaanngikkaat, Nakkutilliisut nalunaarusiaanni allassimavoq.
– TS-ip misissuinerani taakkunani ikinnerpaamik unioqqutitsinerit tallimat, taakkualu saniatigut GA-mit minnerpaamik unioqqutitsinerit qulit aamma FIC-imit nalunaarusiaq AFIS-ip aalajangiinermi piumasaqaatinik malinninnissaq silatusaarnerusorinngikkaa allassimanera, nakkutilliinermut nalunaarusiami atuarneqarsinnaapput.
FIC Kalaallit Nunaata silaannaanni timmisartunut paasissutissiisarpoq, AFIS-ilu Nuummi mittarfimmi timmisartut milerneranni aallarnerannilu paasissutissiisartuuvoq.
– Nuummi AFIS-imi sulisut malittarisassat suut maleruarneqassanersut Angallannermut Aqutsisoqarfimmiit ilisimasaqarfiginerullugit isumaqarnerat ajorpoq. Susoqaraluarpalluunniit nammineerluni malittarisassiortoqarsinnaanngilaq, Hans Christian Stigaard oqarpoq.
Ullormut ataatsimiinnerit, pilersaarutit naapertorlugit aqagumut angallanneq pillugu ataqatigiissaarisussatut aalajangersarneqarsimasut, aallartinneqanngisaannartut aamma Angallannermut Aqutsisoqarfik pissutsit pillugit ilisimatitsinissat amigaataasut taassuma aamma maluginiarpaa.
AFIS-ip Angallannermut Aqutsisoqarfimmut naammattumik paasissutissiisannginnera isorineqartut ilagaat. Aamma nalunaarusiat Greenland Airportsimit naammattumik malinnaavigineqarneq ajorput, nalunaarusiami allassimavoq.
2024-miilli kajumissuseqartoqartoq
Angasat ilisarnarput. Akunnerup ataatsip iluani tikissinnaasut killilerneqarnerannik aalajangiisoqarneranik kinguneqarpoq. Tamanna timmisartuussinissanik allannguuterpassuarnik kinguneqassaaq, ilaasorpassuarnut ajoqutaassalluni, ingammik nunap iluani timmisartuussinissami, Air Greenland sapaatip-akunnerani kingullermi taamannak nalunaarpoq.
– Aap, killilersuinerit sukannersuupput, tamannali soorunami mittarfiup malittarisassanik malinninnginneranik pissuteqarneratut isigineqassaaq. Greenland Airports pissutsinut atukkaminut nammineq akisussaasuuvoq, Hans Christian Stigaard oqarpoq.
– Angallannermut Aqutsisoqarfik Nuummi mittarfissap nutaap taama siusitsigisumik ammarnissaanut 2024-mi immikkut akuersissuteqarnermigut iliuuseqareersimavoq. Taamaammat piumasaqaataasut malinneqarnaveersaarneqarsimanerat paasiuminaappoq, oqarpoq.
Greenland Airports maanna ajornartorsiutinut taaneqartunut pissutaasunik misissuissaaq aaqqiissutissanillu pilersaarusiussalluni. Timmisartortarnerit pillugit kisitsisit nutaat Angallannermut Aqutsisoqarfimmit aamma tunniunneqassapput. Tamatuminnga malinninnginneq timmisartuussisoqaqqusaajunnaarneranik kinguneqarsinnaanera Aqutsisoqarfimmit eqqumaffigeqquneqarpoq.
– Tamanna Greenland Airportsimut ersarissumik mianersoqqussutaasutut paasivara, tassa ajornerusumik kinguneqaqqunagu sapaatip-akunnerini aggersuni pissutsit aaqqiivigeqquneqartut, Hans Christian Stigaard oqarpoq.
Pissutsit ilungersunarnerat siulittaasup uppernarsaraa
Greenland Airportsip siulersuisuini siulittaasua Jens Wittrup Willumsenip allakkatigut pisoq pillugu oqaaseqarpoq:
– Isornartorsiuineq ilungersunartutut isigaarput. Nuummi ingerlatsinissamut akuersissummik malinninnermut tunngatillugu kukkusoqarsimasoq nassuerutigaarput. Pissutsit ilungersunarluinnarput, ernumassutigineqartorlu paasisinnaavarput.
- Pisut piaaraluni malittarisassanik akisussaaffimmillu sumiginnaanermut takussutissiinnginnerat naqissuserusupparput. Timmisartornermik ingerlatsineq teknikkikkut pisariullunilu assigiinngitsorpassuartigut piumasaqaatitaqarluni aaqqissuussaavoq, nassuerutigisariaqarparpulli akisussaaffitsinnik naammassinnissimanata. Tusaatissatut tiguarput.
– Siulersuisut aqutsisullu nutaat pissutsit pimooruppaat. Nakkutilliisup "nassaarisimasai" piaartumik peqqissaartumillu suliarineqarnissaat qulakkeerniarlugit suliniutit arlallit aallartereerpavut, aamma Angallannermut Aqutsisoqarfik Air Greenlandilu qanimut suleqatigaavut aaqqiissutissarsiorlutalu oqaloqatigisarlugit.
– Mittarfiup Kalaallit Nunaanni attaveqarnermut ataqatigiinnermullu pingaaruteqarnera nalunngilluinnarparput, patajaatsumillu ingerlanissaq piaarnerpaamik pilerseqqinniarlugu suliniuteqarpugut, Jens Wittrup Willumsen oqarpoq.
Jens Wittrup Willumsen Greenland Airportsip immikkut ittumik ataatsimeersuarnerani septembarip sisamaani siulersuisuni siulittaasutut toqqarneqarpoq.
