Nuummi mittarfissap Danmarkimut toqqaannartumik timmisartuussisalerniarnermi akuersissut suli amigaatigaa
Air Greenlandip Nuummiit Danmarkimut sapaatip-akunnerata tullianiit timmisartuussisalernissaanut Angallannermut Aqutsisoqarfimmit akuersissut kingulleq suli amigaatigineqarpoq. Piffissaq kingulleq atorlugu suut tamarmik inississasut Greenland Airportsip naatsorsuutigaa.
- Akuersissummik pissarsisoqarsimannginnera ilumoorpoq. Suliarli ingerlavoq isumalluarnarlunilu. Aqqut nutaaq pilersaarutit malillugit ammarneqarumaartoq naatsorsuutigaarput, Greenland Airportsimi attaveqaqatigiinnermut pisortaq Mikkel Bjarnø Lund oqarpoq.
Assiliisoq: René Christensen
Nuummi nunanut tamalaanut mittarfiup nutaap ammarnera, Københavnimullu toqqaannartumik timmisartuussisoqartalernera sisamanngornermi novembarip 28-ani nalliuttorsiutigalugu kaffillertoqassaaq, nipilersortoqarluni qummoroortartoqassallunilu.
Nalliuttorsiornissarli sioqqullugu isumagisassaq kingulleq amigaataavoq. Angallannermut Aqutsisoqarfik Nuummut tikeqqippoq mittarfissarlu misissorlugu.
Air Greenland Københavnimut Københavnimiillu toqqaannartumik timmisartuussisalertinnagu akuersissummik pissarsisoqaqqaassaaq.
- Akuersissummik pissarsisoqarsimannginnera ilumoorpoq. Suliarli ingerlavoq isumalluarnarlunilu. Aqqut nutaaq pilersaarutit malillugit ammarneqarumaartoq naatsorsuutigaarput, Greenland Airportsimi attaveqaqatigiinnermut pisortaq Mikkel Bjarnø Lund oqarpoq.
Nuummi mittarfiup nunanut allanut timmisartuussisarnissamut isumannaallisaanermut akuersissutaatini arsaarinnissutigineqarsimagaluartoq oktobarimi atulerseqqippaa, piffissamilu akuersissuteqarfiunngitsumi timmisartunik mikinerusunik timmisartuussisoqartuaannarsimavoq.
Suliaq annertooq ingerlasoq
Timmisartut annerit maanna akuersissuteqarfiginiarneqalerput, taakkuupput soorlu Danmarkimut USA-mullu toqqaannartumik ungasissumut timmisartuussisinnaasut. Mittarfik nutaaq tassa taakkununnga timmisartunut 2200 meterisut takitigisunut miffigineqartartussaavoq.
- Sanaartorneq qanittukkut naammassivarput, taamaalilluni angallannermut aqutsisoqarfik tikiulluni suut tamaasa misissorsinnaanngorlugit. Mittarfittaaniit, upalungaarsimasunut suleriutsillu ilanngullugit.
Qaqugu inaarutaasumik akuersissuteqalernissaq naatsorsuutigaasiuk?
- Sisamanngornermi piffissaq killiliussaq sioqqutitsiarlugu akuersissummik pissarsinissarput naatsorsuutigaarput. Tamanna marlunngorpat pingasunngornermiluunniit pisinnaavoq. Immaqa uippakajaarnartutut isikkoqarsinnaavoq. Kisianni timmisartuussinissat mittarfiup qaqugu piareernissaa aallaavigalugu pilersaarutaapput – isumalluarnissamut pissutissaqarluarpugut, Mikkel Bjarnø Lund oqarpoq.
Naatsorsuutigineqartutut pisoqanngippat, tassa mittarfiup misissorneqarnerani novembarip 28-ani sioqqullugu akuersissummik tunniussisoqanngippat, Air Greenland timmisartunut ilaasunullu pilersaarutinik nutaanik suliaqarnissaq ulapputigissavaa:
- Iluatsissasoq suli naatsorsuutigaarput. Iluatsissanngippalli allamik pilersaaruteqarpugut. Tamanna pisariaqalissappat uterfigissavarput, Air Greenlandimi attaveqaqatigiinnermut pisortaq Inga Dora G. Markussen oqarpoq.
Taama pisoqassappat Nuummi nalliuttorsiornerit aamma taamaatiinnarneqassasut Greenland Airports nalunaaruteqarpoq.
