Nuup eqqaani nuna annikitsumik ikuallattoq
Nuup kangerluisa ilaanni illuaqqap eqqaani nuna annikitsumik ikuallattoq paasineqarpoq. Ikuallanneq kingorna qaminneqarpoq. Aasaanerani seqinnarissumi silami ikumatitsineq mianersuutigineqassasoq Kommuneqarfik Sermersuumi upalungaarsimanermut pisortap kaammattuutigaa.
Innuttaasunut aasaanerani pinngortitami angalasussanut Nuummi qatserisartut biilii paasissutissanik atorluarneqarsinnaasunik ulikkaarput. Paasissutissiisarneq aasaq tamaat ingerlassaaq.
Kommuneqarfik Sermersooq
Nuummi kangerlummi illuaqqap eqqaani annikitsumik ikuallattoqarnera ataasinngornermi juulip 22-ani paasineqarpoq. Ataasinngornermi unnukkut politiinut nalunaarutigineqartoq, suliarlu qatserisartunut tunniunneqartoq Kalaallit Nunaanni Politiini pigaartut pisortaat Anette Ostenfeldt Sermitsiamut ilisimatitsivoq.
Kommuneqarfik Sermersuumi upalungaarsimanermut pisortap Jes Damgaard Andersenip uppernarsarpaa qatserisartut nunami annikitsumik ikuallattoqarneranik suliaqarsimasut.
- Paasitinneqaraat qatserisartut ikuallattup siaruaatinnginnissaa anguniarlugu qamisaajartortinneqassasut aalajangerpugut. Sulili aallarata paasitinneqarpugut inuit allat ikuallattoq qamissimagaat, upalungaarsimanermut pisortaq Jes Damgaard Andersen Sermitsiamut oqarpoq.
Kaammattuut: Atortut eqqortut pigikkit
Kommuneqarfik Sermersooq innuttaasunik qanoq ajutoornaveersaartoqarsinnaaneranik, ingammik illuaqqamiitsilluni pinngortitamiitsilluniluunniit ikuallattoqarsinnaaneranik pinaveersaartitsinissamik, paasititsiniaaqqammerpoq.
Kommunip paasissutissiilluni suliniuteqarnermini innuttaasut kajumissaarpai illuaqqani atortorissaarutit soorlu kissarsuutit qapuusalimmillu qatserutit ajunnginnersut qulakkeernissaat. Illuaqqanilu ikuallattoqartillugu kalerrisaaruteqarnissaq kaammattuutigineqarluni.
Kaammattuutit tamaasa uani atuakkit:
