Oqaluttuarisaanerup qulaajarnera: Misissuinissaq ukiuni pingasunngulersuni suli aallartinneqanngitsoq
Danmarkip Kalaallit Nunaatalu akornanni oqaluttuarisaanermi pisimasut qulaajaaffigineqarnissasut alajangerneqarneranit ukiut pingasunngulersut suliaq suli aallartinneqanngitsoq DR allappoq.
Kalaallit Nunaata Danmarkillu akornanni oqaluttuarisaanermi pisimasut qulaajarneqarnissaannut isumaqatigiissut Múte B. Egedep Mette Frederiksenillu 2022-mi juunimi atsioqatigiissutigaat.
Assi: Selvstyret
Danmarkip Kalaallit Nunaatalu oqaluttuarisaaneranni pisimasut qulaajaaffigineqarnissaasa aallartinniarnerat annertuumik ajornartorsiorfiuvoq.
Suliniut taanna Naalakkersuisut siulittaasorisimasaannit Múte B. Egedemit (IA) ministeriunermillu Mette Frederiksenimit saqqummiunneqarmat ukiut pingasungajaat qaangiuttut suliaq suli aallartinneqanngilaq.
DR misissuinermi aqutsisut aappaata, oqaluttuarisaaneq pillugu ilisimatuup Daniel Thorleifsenip, paasissutissiinera tunngavigalugu sisamanngornermi allappoq.
Suliap siornali aallartinnissaanut piareersimasimalluni DR-imut oqarpoq. Suliaq Ilisimatusarfiup immikkoortortaqarfiani pisortaq Tenna Jensen peqatigalugu siuttuuffigisussaavaa.
- Naluara sooq taama sivisutiginersoq, Daniel Thorleifsen DR.dk-mut mailikkut akivoq.
Oqaluttuarisaaneq pillugu lisimatooq Nunatta Katersugaasiviani Allagaateqarfianilu pisortaq, Ilisimatusarfimmilu immikkoortortaqarfimmi pisortaq Tenna Jensen, februaarimi 2024-mi misissuinermi aqutsisussatut toqqarneqarput.
Motzfeldt nutaamik siunnersuusiussasoq
Suliap ingerlaqqinnissaanut Ilisimatusarfik apeqqutaavoq Thorleifsen DR-imut oqarpoq. SNaalakkersuisut nutaat suliaq pillugu nalunaaruteqarnissaat utaqqineqartoq Ilisimatusarfimmit ilisimatitsissutigineqarpoq.
Oqaluttuarisaaneq pillugu misissuineq Kalaallit Nunaanniit qanoq aaqqissuunneqarnissaanut nutaamik siunnersuuteqartoqassasoq Ilisimatusarnermut naalakkersuisup Vivian Motzfeldtip (S) naalakkersuisoqarfia DR-imut ilisimatitsivoq.
Qulaajaanissamut sinaakkutit suliamut tunngaviusussat juunimi 2023-mi saqqummiunneqarput. Sorsunnersuup aappaata kingorna piffissami Kalaallit Nunaata siuarsarneqarnerani maannamullu pisimasut imaluunniit, suliassaqarfiit pineqartut Kalaallit Nunaata akisussaaffigisai qulaajarneqassasut suliakkiissummi allassimapput.
Assersuutigalugu sumi inunngorsimaneq tungavigalugu akissaasersuinermi suliat ingerlanerallu, kalaallit najugaqarfiinik inuerusaaneq,
1950-1980-illu akornanni kalaallit meerartaasa meeravissiartaarineqarneranni sulisaaseq pillugu suliat, kalaallit meerartai Danmarkimut nassiunneqartut, Danmarkimit sulisussanik tikisitsineq.
Misissuineq pereersut pillugit saammaateqatigiinnissap tunngavilerneqarneranut iluaqutaanissaa suliakkiissummi aamma allassimavoq.
