Oqartussat uuliakoorneq suminngaanneernersoq suli misissorpaat
Sermersuumi upalungaarsimasut pinerluuteqarsimasunut inissiisarfiup eqqaani uuliakoortoqarnera nalilersorniarlugu drone atorlugu tallimanngornermi assilisaarissapput. Mingutsitsisoq suli kinaassusersineqanngilaq.
Mingutsitsineq killilersimaarniarlugu upalungaarsimasut assiaqutinik puttasunik assersuipput.
Toqqorsivimmit assilisaq: Walter Turnowsky
Nuummi pineqaatissinneqarsimasunut inissiisarfiup eqqaani uuliamik kikkut imaluunnit suna pissutaalluni mingutsitsosoqarnera oqartussat suli paasiniarpaat.
Pigaartut pisortaat Jeppe Andsager tallimanngornermi ullaakkut taama paasissutissiivoq.
Kommuneqarfik Sermersuumi upalungaarsimasunit uuliakoorneq isumagineqarpoq, taakkualu pisortaata Jes Damgaard Andersenip dieseli 9.000 literit missaat katersorneqarsimasoq oqaatigaa.
- Ippassaq annertunngitsumik uuliaajaasoqarpoq sunalu pissutaanersoq suli misissorlugu, Jes Damgaard Andersen oqarpoq.
Tallimanngornermi sumiiffimmi tassani suli sulisoqassasoq upalungaarsimanermut pisortaq oqarpoq.
- Unnuaq tassani nakkutilliisoqarpoq. Ulittarnera pissutigalugu puttasumik assiaqutsiineq nikeqattaaginnavippoq, Jes Damgaard Andersen oqarpoq, ilanngullugulu paasissutissiissutigalugu upalungaarsimasut tallimanngorpat dronemik assiliissasut tassani annertunerusumik mingutsitsisoqarsimanersoq imaluunniit mingutsitsineq sarfamik siaruaassimnersoq misissorneqassalluni.
