NAALAKKERSUISOOQATIGIILERNISSAMUT ISUMAQATIGIINNIARNERIT
Partiit tamarmik isumaqatigiinniarnernut suli ilaasut
Demokraatit siulittaasuata, Jens-Frederik Nielsenip, tallimanngornermi Sermitsiamut uppernarsarpaa naalakkersuisooqatigiilernissaq pillugu isumaqatigiinniarnerit suli ingerlanneqartut - tamannalu suli ingerlanneqartoq Inatsisartuni partiit tamaasa peqatigalugit. - Suli isumaqarpunga Kalaallit Nunatsinnut pitsaanerpaaq tassaasoq siammasissumik naalakkersuisooqatigiiliortoqarnissaa, taanna oqarpoq.
Inatsisartunut qinersinerup kingorna ullut qulit qaangiussimalereerput, suli takussutissaqanngilaq qaqugu isumaqatigiissuteqartoqarumaarnersoq. Qinersinermi ajugaasup, Jens-Frederik Nielsenip (D) neriuutigaa partiit Inatsisartuniittut suleqatigiillutik siammasissumik suleqatigiinnissamut isumaqatigiissuteqarsinnaassasut.
Assiliisoq: Oscar Scott Carl
Maanna ullut qulit qaangiupput Inatsisartunut qinersineq naammassineqarmat, kisianni suli takussutissaqanngilaq, nutaamik nutaata politikkikkut ukiuni tulliuttuni sisamani aqunneqarnissaa pillugu suleqatigiittoqarnissaanut qanoq qanillitigisoqarsimatiginersoq.
Inuit Ataqatigiit Siumullu siulittaasui Sermitsiamut sapaatip akunnerata matuma ingerlanerani oqaatigaat, namminneq isumartik naapertorlugu kigaatsumik ingerlasoqartoq, aammalu isumaqatigiinnissamut tunngavissaq suli annikippallaartoq.
Taamaakkaluartoq maanna paasinarsivoq isumaqatigiinniartut imminnut oqaloqatigiinnerat ingerlaqqittoq.
Demokraatit siulittaasuata tallimanngornermi Sermitsiamut uppernarsarpaa, Demokraatit Inatsisartuni partiit tamaasa suli isumaqatigiinniaqatigigaat:
- Isumaqatigiinniarnerit imarisat pillugit oqarsinnaanngilanga, kisianni Demokraatinit suli anguniagaraarput partiit akimorlugit suleqatigiittoqarnissaa. Suli Inatsisartuni partiit tamarmik oqaloqatigineqarput, Jens-Frederik Nielsen oqarpoq.
- Oqaluttuussinnaavisigummi Demokraatit isumaqatigiinniarnerni piumasaqaatitut aalajangiussaqarsimanersut allanngortinneqarsinnaanngitsunik piumasaqassallutik?
- Oqaqqissaanga, isumaqatigiinniarnerni oqaluuserineqartut pillugit oqaaseqarsinnaanngilanga, suli naammassinngimmat.
- Qaqugu isumaqatigiinniarnerit naapeqatigiinnermik kinguneqassasut naatsorsuutigineqarsinnaassava?
- Tamanna ullulerneqarsinnaanngilaq, pingaarnerpaavoq nunatta ineriartortinneqarnerata nanginneqarnissaanut nunatsinni innuttaasut pitsaanerpaamik tunngavissaqarnissaat.
Trumpip nunatsinni innuttaasunut ataqqinninnginnera Demokraatit USA-mut isiginninneranik allannguisoq
Sermitsiamit ippassaq allaaserivarput Demokraatit partiip qinersinermut pilersaarutaanni periarfissatut ilanngunneqarsimasoq Danmarkimut USA-mullu Kalaallit Nunaata namminersulernissaanut tunngatillugu isumaqatigiinniartoqarnissaa.
Politikkimi suna tamarmi piffissap sivikitsup ingerlanerinnaani allanngorsinnaavoq, tassungalu tunngatillugu Jens-Frederik Nielsenip erseqqissaatigaa partiip qinersinermut pilersaarutaa allanneqarsimasoq saqqummiunneqarsimasorlu Trump nunarput "pigisassatut aqutaassatullu" anguniagaqarnerminik sakkortuumik politikkikkut kimigiiseqqilinngikkallarmat:
- Qinersinermut pilersaarutivut aalajangiunneqarput allanneqarlutillu Donald Trumpip nunatta pigilerumallugu sakkortuumik anguniagaqarnerani nunatsinni innuttaasunut ataqqinninnginnermik annertuumik ersersitsisaqattaalinnginnerani.
- Ammasumik aporfilersugaanngitsumillu USA-mut suleqatigiinnerunissamut periarfissaqartoq isigisimagaluarparput, tassungalu atatillugu USA nunatta qanimut suleqatigisinnaasaatut isigisimagaluarparput. Allaallumi namminiilivinnissamik suliniutitsinni isumaqatigiinniarnernut ammaffigisimagaluarlugu. Taamaattorli anneruniarfigitinnermik ataqqinninngitsumillu pissusilersorfiginninnermik siunertarisaraluarput akineqaannartarpoq, tamatumalu malitsigisaanik periarfissatut isigisaraluarput sukkasuumik periarfissaajunnaartutut pisinnaanngitutullu nalilertariaqarnikuuarput.
- Taamaattumik naqissuserusuppara, Demokraatit Trumpip kimigiisernermini oqaasii pillugit ataatsimoorussamik nunatsinni partiit illuatungiliillutik ataatsimoornerat peqataaffigisarpullu aalajangiusimavarput, aammalu Inatsisartunut qinersineq sioqqullugu partiit ataatsimoornissamik isumaqatigiissutaat suli peqataaffigaarput, Jens-Frederik Nielsen Sermitsiamut naqissusiivoq.
