NAALAKKERSUISOOQATIGIILERNISSAMUT ISUMAQATIGIINNIARNERIT
USA-mut tunngatillugu Demokraatit arlariinnik paasineqarsinnaasunik anguniagaqartut
Demokraatit siulittaasuat, Jens-Frederik Nielsen, siuttunut peqataavoq, Kalaallit Nunaat USA-mut akerliussutsimik takutitsimmat arfininngornermi marsip 15-iani.
Demokraatit siulittaasuat, Jens-Frederik Nielsen, Donald Trumpimut USA-mullu akerliussutsimik takutitsilluni oqaasissaminik noqitsinngilaq. USA-p, pingaartumillu Trumpip, pilersaarutaanut "piginnittuulernissamut aqutsilernissamullu" taanna akerliunerminik ersarissuliorpoq. Illuatungaanili Trumpip qinersinermi ajugaasimaneranik nersualaarlugu pilersaarutini ingerlateqqissinnaanera naatsorsuutigalugu akissuteqarfigaa.
Foto: Oscar Scott Carl
Partiinit aammalu Namminersorlutik Oqartussanit isumaqatigiittoqarsimaneranik ilisimatitsisoqarnissaata utaqqinerani utaqqiisaa piffissaq atorlugu qimerloorsinnaavarput Donald Trumpip nunatsinnik "aqutsilerlunilu piginnittunngornissamik pilersaarutaanut tunngatillugu partiit qanoq inissisimanersut.
Donald Trumpip kimigiisernerminik nangitsineranut sakkortusaaneranullu atatillugu, Inatsisartuni partiit ataatsimoorussamik siunnerfeqarneranni Demokraatit partiit sinneri tamaasa peqatigalugit Trumpimut siunertaanullu akerliuneranni peqataapput.
"Qallunaat
Nunaata saniatigut suleqatigineqarsinnaasutuaq tassaavoq USA"
Taamaattorli Demokraatit Inatsisartunut qinersinermut 2025-mut pilersaarutaat qimerlooraanni, paatsoorneqarsinnaanngilaq Demokraatit isumaat naapertorlugu "Qallunaat Nunaata saniatigut suleqatigineqarsinnaasutuaq tassaasoq USA".
Taamatut oqariartuuteqartoqarsimanera Donald Trumpimut apuussimasoq qularutissaanngilaq. Inatsisartunummi qinersinerup naammassinerata kingorna ullut marluk qaangiutiinnartut, Trumpip Jens-Frederik Nielsen pillugu ilaatigut imatut oqaaseqarpoq:
- Qinersineq uagutsinnut pitsaasumik inerneqarpoq. Inuk pitsaanerpaamik qinersinermi angusaqarluartoq ajunngitsuuvoq.
Trumpip Kalaallit Nunaata tigunissaanut pilersaarutini pillugit apersorneqarnerani kingullermi nunatsinnut tunngasortaa tamaat uani takuuk.
Qularutissaanngitsumik Donald Trumpip taassumalu allaffeqarfiata nunatsinni partiiit Kalaallit Nunaanni USA-mut tunngatillugu anguniagaat suunersut misissorluaqqissaarsimassagaat.
Aammalu tamannarpiaq pissutaasinnaavoq Donald Trumpip taama ersaritsigisumik nersualaarinninneranut, tassami Demokraatit pilersaaruteqarput qanoq nunatta namminiilivinnissaanut piareersarneqassanersoq - tamannalu USA-p ikiuunneratigut pissasoq ilanngullugu allanneqarsimavoq.
Danmarkimik USA-millu isumaqatigiinnianerit aallartinneqassappat?
Partii isumaqarpoq free associationimik taasaq tunngavigalugu nunatta namminiilivinnissaa aaqqissuunneqarsinnaasoq. Tassunga atatillugu partii nassuiaavoq tamanna kalaallit namminneq piumasaqaatai aallaavigalugit pissasoq. USA-p Kalaallit Nunaannut qanoq ikiuussinnaanera pillugu partii qinersinermut pilersaarummi ilaatigut imatut allappoq:
- Periarfissat eqqarsaatigalugit ammasariaqarpugut aammalu piviusorsiortariaqarluta. Qallunaat
Nunaat saniatigut suleqatigineqarsinnaasutuaq tassaavoq USA, taamaattumik pisariaqarluinnarpoq
taakku unneqqarissumik ataqqinnittumillu oqaloqatigalugit aallartinnissaat.
- Oqaloqatiginninnerit
suleqatigiinnermik pilersitsisussat - immaqalu isumaqatiginninniarnernik kinguneqartussat,
namminiilivikkiartornitsinnut qanoq tunniussassaqarnersut pillugit. Taamaattorli aamma uagut
piumasagut tassani aallaaviussapput. Nunarput nunat allat pissaaneqarniuunneranni inukkatut
atugassanngortinneqassanngilaq. Naligiimmik pineqassaagut, innuttaasunut pitsaanerpaamik
anguniagaqartut.
- Qallunaat Nunaannik USA-millu isumaqatiginninniarnerit ataqqinninnermik suleqatigiinnermillu
toqqammaveqassapput. Siunnerfik ersarissumik aammalu suliap ingerlarnga piviusorsiortariaqarpoq,
taamaasilluta namminiilivikkiartornerup sukkassuusa aammalu piumasaqaatigut aallaavigalugit
nammineq ingerlassinnaaniassagatsigu, Demokraatit qineqqusaarutaanni allassimavoq.
Taamaattumik Demokraatit Nalerarlu (immaqalu Atassut) suleqatigiilissappata naatsorsuutigineqarsinnaassaaq namminiilivinnissamut suliniut aallartisinneqassasoq, tassanilu USA pisinnaatitaaffilerneqassasoq Kalaallit Nunaanni nunap iluani pissutsinut akuunissaminut.
"Kalaallit Nunaat tuniniagaanngilaq"
Taamaattorli Danmarkimik USA-millu namminiilivinnissaq pillugu isumaqatigiinniarnissamik siunertaqarnerminnik Demokraatit qineqqusaarumminni pilersaaruteqarnertik nalunaarutigiinnanngilaat.
Tassami qineqqusaarummi immikkut qulequtsersimasamik partii nalunaaruteqarpoq Kalaallit Nunaat tuniniagaanngitsoq.
- Nunarput nioqqutissaanngilaq, pisiarissalluta isumassarsineq naleqartitatsinnut
ataqqinninnginnerujussuarmik takutitsineruvoq. Nunatut tulluusimaartuuvugut,
kiffaanngissuseqarnissamut siunissaqarnissamullu annertuumik sulissuteqartut.
Nunarsuarmi suleqateqarusuppugut niuerniaqateqarlutalu – aamma USA – kisianni uagut
piumasaqaatigut malinneqassapput aamma kinaassuserput ataqqineqassaaq.
- Kalaallit Nunaat
angerlarsimaffigaarput, akisussaaffigaarput siunissaralugulu. Isumaqatiginnissutaasinnaanngilaq.
Taamaattussaavoq.
- Trump taamatut eqqarsarunnaaginnarsinnaavoq. Kalaallit Nunaat tuniniagaanngilaq. Allatut
oqaatigisariaqanngilaq, Demokraatit qinersinermut atatillugu pilersaarumminni allapput.
Demokraatit siulittaasuanit, Jens-Frederik Nielsenimit, nassuiaatit annertunerusut pissarsiariniarlugit Sermitsiamit sulissutigaarput.
