Pele Broberg: Naalakkersuisut sunniiniarnermik ingerlatsipput
Naleqqap siulittaasuata Pele Brobergip Naalakkersuisut angusaannik nalunaarsuutit “sunniiniarnertut” aamma “akileraartartut aningaasaataannik isumaqanngitsumik atuinermut saqqummiussinertut” taavaa.
Pele Broberg: - Politikerit aningaasatigut iluanaaruteqarnerminnik imminnut pinngitsuutikkumanerat pissutigalugu allaffissorpallaarpugut.
Assiliisoq: Kassaaluk Kristensen / Sermitsiaq.AG
Sapaatip-akunnerata siuliani 2023/24-mi politikkikkut angusat Naalakkersuisut saqqummiuppaat, Inatsisartunullu kingusinnerpaamik apriilimi qinersisoqarnissaata qallinera taassuma paasinarsisippaa.
Pele Brobergip Naalakkersuisut angusaannik nalunaarsuutit isornartorsiorpai, ilaatigut politikkikkut isumaqatigiissutinik illuatungiliuttut ilaasa aamma isumaqatigiissuteqarfigisimasaannik imaqartoq.
- Nalunaarsuutit taakku IA-mi Siumumilu tunuliaqutaasut qineqqusaarnermi tulliuttumi suleqatigiinnermik ingerlatitseqqinnissaannik qularunnaarsinniarnertut isigaakka. Sunniiniarluni saqqummersitsinermikkut suliaminnik nalilersuititsinissamik siunertaqanngillat, Pele Broberg Sermitsiamut oqarpoq.
Angusaqarluarnerit
Partiimilu siulittaasoq nangilluni oqarpoq:
- IA-p Siumullu nalunaarsuutinik makkuninnga saqqummiussinermikkut naalakkersuisoqatigiinnut isumaqatigiissuteqarniarnissaq imminut akilersinnaanngitsoq uppernarsarpaat, tassami politikkikkut angusaqarluarnermit namminneq politikkikkut anguniakkaminnik erseqqissaanissaq pingaarnerutikkamikku.
Pele Broberg naapertorlugu partiit naalakkersuisoqatigiit taakkua arlaannaataluunniit innuttaasut ajornartorsiutaat paasinngilaat.
- Politikerit aningaasatigut iluanaaruteqarnerminnik imminnut pinngitsuutikkumanerat pissutigalugu allaffissorpallaarpugut. Inatsisit malittarisassallu sorpassuit suliarisariaqarput oqarsinnaajumalluni: "Suut suliarisimanerigut takuuk, qineqqissinga." Politikkikkut nuimasut nunap innuttaasuinik nunatsinnillu avissaartuutsitsilersimapput, taamaalilluta siunissaq pillugu ataatsimoorsinnaajunnaarluta, Naleqqami siulittaasoq oqarpoq, taarsiullugulu Naalakkersuisut ’unammillernartut suussusersisimassagaluaraat’ taassuma kissaatigigaluarpaa.
Akisussaaffeqarfimmik angerlaassineq
Naalakkersuisoqatigiit uppinnginneranni Naleqqallu Siumumit taarserneqarnissaata tungaanut IA-p Naleqqallu naalakkersuinikkut pissaaneqartinneqarnerat Pele Brobergip assersuutit ilaattut taavaa.
- Qanoq ililluni IA-p Naleqqallu inuussutissalerinermut aqutsisoqarfimmik angerlaassinerannik qinigaaffik aallartissava, Pele Broberg aperivoq, taannalu oqarpoq "anisitaagatta tamanna nipaaruttoq".
- Aap, Parisimi isumaqatigiissut allallu "isigineqarneq pillugu suliniutit" ulapputigaat, innuttaasunulli iliuuseqarneq puigorlugu, Naleqqami siulittaasoq naqissusiivoq, aamma allaffissornikkut suli marluinnik oqaaseqarneq eqqarsaatigalugu kalaallisut oqaatsit atorneqartarnerat kulturilu pingaartinneqannginnerarpaa.
