Naalakkersuisut: Politikkikkut angusavut aajuku
Naalakkersuisut siulittaasortik Múte B. Egede nassiussisuutillugu 2023-mi 2024-milu anguneqarsimasut pillugit nalunaarusiamik 26-nik quppernilimmik saqqummiussipput.
Múte B. Egedep Naalakkersuisullu sinnerisa ukiup aappaa avillugu qaangiuttup ingerlanerani politikkikkut angusat saqqummiuppaat.
Assi: Leiff Josefsen
Inatsisartunut qinersinissamut ukioq ataasiujunnaartorlu Naalakkersuisut ukiup aappaa avillugu kingullermi politikkikkut suliniutit ingerlanneqarsimasut nalunaarsornissaat pisariaqarsorisimavaat.
Kalaallit Nunaata siunissamiilersinnissaa ukiuni kingullerni Naalakkersuisut sulissutigaat, Naalakkersuisut siulittaasuata Múte B. Egedep nalunaarsuutip siulequtsiussaani naqissuserpaa, isumaqatigiinniarnerillu pingaarutillit pingasut ukunaniittut immikkut erseqqissarpai:
- Akileraartarnermut akitsuusiisarnermullu suliassaqarfimmi
- Peqqinnissamut suliassaqarfimmi
- Ineqarnermut suliassaqarfimmi
- Isumaqatigiissutit ukiuni aggersuni patajaatsumik nunatsinnut tunngavissaliipput, Múte B. Egede naqissusiivoq, akileraartarnermullu aaqqissuusseqqinneq pillugu itinerusumik oqaaseqarluni:
- Akileraartarnermut akitsuusiisarnermullu iluarsaaqqinnermi sulinissaq imminut akilersinnaanerulersinnaavoq,Kalaallit Nunaannilu inuuneq akikinnerulertussaalluni. Akitsuutinik appartitsinermi, inunnut isertitakitsunut ineqarnermut tapiissutit qaffanneqarneranni, immikkut ittumik meeqqanut tapiissuteqarnermi, Qaanaami Ittoqqortoormiinilu aalisartunut piniartunullu aningaasaqarnikkut ikiorsiinermi kiisalu utoqqalinersiallit siusinaartumillu pensionisiallit pilersueqatigiittussaatitaanerata atorunnaarsinneqarnerani, innuttaasut aningaasaqarnerannik nukittorsaanermut tamanna malittaatinneqarpoq.
Iluarsaaqqinnernut arlalinnut aqqutissat
Taamaaleriarluni Attassinissamut Siuariartortitsinissamullu pilersaarut 2 Múte B. Egedep eqqartorpaa, tassanilu iluarsaaqqinnernut arlalinnut ataqatigiissunullu aqqutissat inissinneqarsimapput, tamannalu ilutigalugu Peqqinnissaqarfik pitsaanerussasoq naqissuserneqarpoq, tassungalu atatillugu 2024-
mut aningaasanut inatsimmi ukiunut aggersunut sisamanut immikkut 114 millionit koruunit immikkoortinneqarsimanerat innersuussutigaa.
Inatsisit siunnersuutigineqartut nassuiaatillu Naalakkersuisut saqqummiussaat tamaasa naatsumik eqqaaneqarput – ilaatigut aalisarnermut inatsit, imminut toquttarnerup pitsaaliornissaanut periusissiaq, Parisimi isumaqatigiissummut ilanngunneq, imeruersaatit puuinut utertitseriaaseq nutaaq, nunanut allanut, illersornissamut isumannaallisaanermullu politikkimut periusissiaq akitsuutinullu allannguutit.
Naalakkersuisut angusaminnik saqqummiusseriaasiat Naalakkersuisut nittartagaanni takuneqarsinnaavoq, quppernermi uani: Saqqummersitat.
