Brugsenimik akit qaffapput. Orsussaarniarfimmi aamma.
Naleqqallu siulittaasua Pele Broberg aperigaanni, ajoqut erseqqilluinnarpoq:
Brugsenimik akit qaffapput. Orsussaarniarfimmi aamma.
Naleqqallu siulittaasua Pele Broberg aperigaanni, ajoqut erseqqilluinnarpoq:
- Maanna inissisimanitsinni politikerit pisuupput. Naleqqamit qinigaaffiup siuliani ajornartorsiutit makku aaqqeeqataaffiginiartaraluarsimavagut, ajoraluartumilli partiit allat ajornartorsiutit nammineq pilersitat iliuuseqarfiginissaannut piareersimasoqartoqarsimanngilaq, tamannalu innuttaasunut tuppoq, taanna oqarpoq.
Naalakkersuisooqatigiit kukkuffigisimasaat arlallit tikkuarsinnaavai. Ukiuni aggersuni amerlasuuni ineqarnermut akiliutit 75 procentinik qaffattussaapput, namminersorlutik oqartussat ingerlatseqatigiiffiutaat Polaroil orsussat akiinik qaffaavoq, nunatsinnut nunatsinniillu usinik assartuinermi kisermaassisuunermik attassiinarneq, assartuinermillu akinik appaanani mingutsitsinngitsumik suliniutinut aningaasalersuinerit.
- Ukiuni aggersuni nakkaakkiartornermiiginnaqqalerpugut, tamatumanilu naalakkersuisooqatigiit Danmarkimut pituttuinissamik kissaateqarnerat patsisaavoq, Pele Broberg oqarpoq.
Kisermaassisuiaaneq danskillu niueriaasiannik qimatsineq
Peqatigisaanillu aaqqiigasuarnissamut tikkuussassaqarpoq.
Naalakkersuisut kisermaassilluni ingerlatsinernik qimatsillutik pitsaanerpaamik akikinnerpaamillu qanoq sullissisoqarsinnaanera ujartussagaat, Pele Brobergip siunnersuutiga.
- Piffissap ingerlanerani kukkussuteqartarsimaqaagut, assersuutigalugu sullissinissamik isumaqatigiissutinik ingerlatsineq, tamatumali pitsaanerpaamik nassaarniartariaqarnitsinnut akornusissanngilaatigut, taanna oqarpoq.
Ajornartorsiut alla inuussutissat akiisa qaffasinnerinut attuumassuteqarpoq. Suut tamaasa Danmarkikkoortikkunnaarlugit Kalaallit Nunaat niueriaatsiminik allannguisariaqartoq, Pele Broberg isumaqarpoq.
- Danmarkimut umiarsuarnik angalatitsineq isumassaqanngilaq, maannali taamaaliornitsinni danskit niueriaasiannut pituttoqqarnerput patsisaavoq, nioqqutissallu siunissami akikinnerulissappata tamakku allanngortittariaqarput.
- Maannakkorpiaq akikinneruleqqunagit, assigiinngiiaarnerusumilli periuseqartariaqarpugut, tassa pisortorfivut assigiinngiiaarnerusariaqarput, taanna oqarpoq.
Naalakkersuisooqatigiinnermik isumaqatigiissut allanngortinneqarli
Pele Broberg pissutsit aaqqinnissaannut Naalakkerusisut sulilernissaat kissaatigaa.
- Taakku makkunannga aallussitinnissaat soorunami uagut suliassaraarput, aappaatigulli aamma qineqqusaarutigisatik tunullugit naalakkersuisooqatigiinnissamik isumaqatigiissuteqarsimanerat nassuerutigisariaqarparput. Sorusussuseqanngillat, taanna oqarpoq.
Naleraq Inatsisartuni kisimi illuatungiliuttuuvoq. Taakku arfineq pingasunik ilaasortaatitaqarput, illuatungaanillu naalakkersuisooqatigiit 23-nik ilaasortaatitaqarput.
Taamaalillunilu Naalakkersuisut politikiannut sunniuteqarniarsinnaaneq ajornakusoortorujussuusinnaavoq.
- Pilersaarusiorsinnaannginnerat oqaatigineqartariaqarpoq, naalakkersuisut siulii maannaluunniit issiasut. Taamaammallu taakku qanittumi naalakkersuisooqatigiinnermi isumaqatigiissutimik ullutsinnut naleqquttuunanilu innuttaasunut naleqqutinnginnera oqaatigalugu allannguinngippata, allatut ajornartumik qinigaaffiup tullianut utaqqisariaqassaagut, Pele Broberg oqarpoq.
