Akit qaffakkiartorput – isertitalli malinnaavallaanngillat

Nioqqutissat ukiuni kingullerni akitsoraluttuinnarnerat isertitanit qaffasinnerujussuupput, saniatigullu Namminersorlutik Oqartussat inissiaataanni ineqarnermut akiliut qaffannissaa ilimasaarutigineqarpoq. Nioqqutissat ulluinnarni pisariaqartitat akii ukiuni qulini kingullerni qanoq ineriartorsimanerat Sermitsiamit misissorpavut, taamatullu isertitat 2023-p tungaanut aamma misissorlugit.

Akit qaffakkiartorput, agguaqatigiissitsigulli isertitat qaffakkiartornermut malinnaaniapiloorput.

Assi toqqorsivimmit: Leiff Josefsen.

KASSAALUK KRISTENSEN Digitalimik aaqqissuisuuneq

Saqqummersinneqarpoq 21. Maaji 2025 - 11:59

Annonse

Inissianut nungullarsimasunut iluarsartuussinissamut pilersaarutit inissipput – ineqarnermut akiliut 2027-miit qaffanneqartalissapput

Kalaallit atuisut ulluinnarni nioqqutissat akitsoriartornerat malugilereerpaat, Namminersorlutik Oqartussallu inissiaataanni ineqarnermut akiliutit 2027-mi qaffassapput.

Ilaqutariippassuit aningaasaqarnerannut tamanna sunniuteqarpoq, ingammik akiligassat akilereerlugit pisissutaasinnaasunut sanilliukkaanni.

Naatsorsueqqissaartarfiup kisitsisaataasa kingulliit naapertorlugit immuup, immussuup, immuup qalipaata manniillu akii ukiuni qulini kingullerni – januaari 2015-imiit januaari 2025-mut – 25,3 procentimik qaffassimapput.

Akit qaffakkiartornerat isertitat qaffakkiartornerannit annerusut

Isertitat atoriaannaat 2015-imi 138.373 koruuniusut 2023-mi 152.037 koruuniupput. Tamanna Naatsorsueqqissaartarfiup kisitsisaataani takuneqarsinnaavoq, tassanilu isertitat ineriartornerisa nutaanersaat 2023-meersuullutik.

Ukiut arfineq-pingasut ingerlaneranni 9,9 procentimik qaffariarsimapput.

Isertitat atoriaannaat tassaapput ineqarnermut akiligassanut, akiligassanut allanut, nerisassanut, atisanut assigisaannullu atorneqartartut.

Nioqqutissat assigiinngitsut pilersuinermut tunisassiornermullu aningaasartuutit pissutigalugit pisiniarfinni akit nalimmassartariaqartut Pisiffik Brugsenilu Sermitsiamut nassuiaapput.

Nioqqutissat assigiinngitsut akii ukiuni kingullerni qulini qaffakkiartorsimasut Naatsorsueqqissaartarfiup kisitsisaataani takuneqarsinnaapput.