Pineqaatissiisarnerup sakkortunerulernissaa Folketingimi taasissutigineqassasoq
Pineqaatissiinermi piffissaritap annerpaaffissaata ukiut quliniit 16-inut qaffannissaanut inatsisissatut siunnersuut, Folketingimut pingasunngorpat saqqummiunneqassaaq.
- Kalaallit Nunaanni eqqartuussiveqarnermut tunngasut ataatsimut isigalugit ineriartortinnissaat danskit naalakkersuisuinut pingaaruteqarpoq, Peter Hummelgaard oqarpoq.
Assi: Sebastian Elias Uth/Ritzau Scanpix
Pinerluttulerinermi inatsit tunngavigalugu pineqaatissiinermi ukiut amerlanerpaaffissaata, tassa ukiut quliniit 16-inut, sivitsornissaa Inatsisartuni ilaasortat ukiakkut ataatsimiinnermi matumani akuersaareerpaat. Siunnersuut Folketingimut pingasunngornermi saqqummiunneqassaaq.
Naalakkersuisut Kalaallit Nunaanni eqqartuussiviit sivisunerusumik pineqaatissiisinnaalernissaat kissaatigimmassuk inatsimmik allannguinerit Folketingimi akuerineqassapput.
Danmarkimi inatsisinik atortitsinermut ministereqarfiup inatsisissatut siunnersuut pillugu tusagassiuutitigut nalunaaruteqarput, Inatsisinillu atuutsitsinermut ministeri Peter Hummelgaard piffissamik killiliussap qaffanneqarnera nuannaarutigalugu oqarpoq:
- Tamanna Naalakkersuisut sivisuumik kissaatigisimavaat, aamma erseqqissaatigissavara Kalaallit Nunaanni eqqartuussiveqarnermut tunngasut ataatsimut isigalugit ineriartortinnissaat danskit naalakkersuisuinut pingaartimmassuk, ministeri oqarpoq.
Pineqaatisseeriaaseq maanna atuuttoq ingerlatiinnarneqassasoq inatsisinik atuutsitsinermut ministerip aamma oqaatigaa, pisunili ilungersunartuni ukiuni amerlanerusuni pineqaatissiisisoqarsinnaalissalluni.
Soorlu toqutsisoqarsimanerani imaluunniit pinerluutini allani sakkortunerusuni pineqaatissiinernut tunngatillugu. Eqqartuussiviit suliani taamaattuni pineqaatissinneqarsimasunut sivisisunerusumik inissiisarfimmiittussanngortitsisinnaalissapput.
Inatsisissaq inuusuttunut pinerlunnerup nalaani 18-it inorlugit ukiulinnut atuutinngilaq. Siunnersuut akuerineqassappat, 2026-mi januaarip aallaqqaataani atuutilernissaa naatsorsuutigineqarpoq.
