ISLAND
- Polar Nanoq-imi tillinniartoqarsimaneranik nalunaarutiginnittoqarpoq
Sigguk A/S-imi, Polar Seafood-ip ataaniittumi, pisortaq Frans Heilmann Sermitsiamut oqaluttuarpoq, Islandimiut tusagassiorfiisa Polar Nanoq-imi inuttamik tigusarineqarsimasutut saqqummiussaat eqqunngitsoq. - Umiarsuarmi yillinniartoqarsimaneranik nalunaarutiginninneq pineqarpoq, taanna oqaluttuarpoq.
Toqqorsivimmit assiliisoq: Leiff Josefsen
Sermitsiaq ullaaq manna nutaarsiassamik saqqummiivoq, Islandimiut tusagassiorfiit saqqummiussaat tunngavigalugit, tassani oqaluttuarineqarpoq Polar Nanoq-imi inuttat ilaat tigusarineqarsimasoq.
Sigguk A/S-imi pisortaq, Frans Heilmann Sermitsiamut oqarpoq, Islandimiut allaaserisaat kinguaassiutitigut innimiilliortarnermut pasilliuteqarnermik pissutilimmik tigusarinninnermut tunngasoq ilumuunngitsoq.
- Polar Nanoq Ippassaq avalappoq, inuttallu tamarmik ilaapput. Polar Nanup Inuttanik politiit pasilliuteqanngilat. Naluarput qanoq oqaluttuaq allarluinnaqqissaamut saatinneqarsimanersoq. Pineqartormi tassaammat Polar Nanormi tilliartoqarsimaneranik nalunaarutiginnittoqarnera.
- Tillinniartoqarsimaneranik nalunaarutiginninneq tunngavigalugu suliaq politiit ingerlappaat. Polar Nanormi inuttat tamarmik ajunngillat, ajoqaarlu inuttat ilaqutaat kammalaataallu ernumatinneqarmata, Frans Heilmann oqarpoq.
