Kommuneqarfik
Sermersuumi pisortaasimasup Lars Møller-Sørensenip, pisortap allap
pilersuisullu politiinut nalunaarutigineqarnerannit ukiut pingasungajaat
qaangiuttut Københavnip politiivisa pinerluttoqarsimatillugu suliamik
aallartitsinissartik taamaatitsinissartillu suli aalajangersimanngilaat.
Kommuneqarfik
Sermersuumi pisortaasimasup Lars Møller-Sørensenip, pisortap allap
pilersuisullu politiinut nalunaarutigineqarnerannit ukiut pingasungajaat
qaangiuttut Københavnip politiivisa pinerluttoqarsimatillugu suliamik
aallartitsinissartik taamaatitsinissartillu suli aalajangersimanngilaat.
Kommunip taakku
pingasut aningaasatigut pinerlussimasinnaasutut atorfimmillu
atornerluisimasutut unnerluutigimmagit, politiit suliamut annertuumut
atatillugu inatsisitigut suliaat naammassingajalerpoq.
Københavnimi
politiit aningaasanik peqquserluttuliornermut tunngasunik unnerluussisussaatitaata,
Rashid F. Elkottip, paasissutissat Sermitsiamut uppernarsarpai.
Piginnaatitaanermik atornerluineq
Inuit pingasut suliami unnerluutigineqarput. Taakkua pingasut tamarmik
pinerluttulerinarmut inatsit naapertorlugu piginnaatitaanermik
atornerluinermut, aningaasanik peqquserlunnermut, peqquserlunnermut
akiitsunillu peqquserluuteqarnermut tunngasuusinnaapput, erseqqissaavoq.
- Aningaasatigut
pinerlunnermut tunngatillugu immikkoortumi sorlermi tamanna pineqarnersoq
aalajangersimanngilarput. Pinerluttoqarsimappalli peqquserlunneq atorfimmillu
atornerluineq pillugit immikkoortoq misissussavarput, Rashid F. Elkott oqarpoq.
Suliaq sivisullunilu annertuvoq, siornalu Københavnip Politiivini
ringbindit tallimaapput.
Ukiut pingasut matuma siorna oktobarip 7-ani Kommuneqarfik Sermersuup
Lars Møller-Sørensen, kommunimi sanaartornermut pisortaasimasoq, Hans Henrik
Winther Johannsen, aamma pilersuisoq aningaasatigut pinerluuteqarsimasutut
atorfimmillu atornerluisimasutut unnerluutigai.
Kalaallit Nunaanni Politiinut nalunaarutiginninnerup kinguninngua suliaq
Københavnimi Politiinut tunniunneqarpoq.
Københavnimi politiit aningaasanik peqquserluttuliornermut tunngasunik
unnerluussisussaatitaaffiata qaqugukkut aalajangiissanersoq, tassa suliat
unnerluutigineqarnermik kinguneqassanersut imaluunniit
eqqartuussisoqannginnerani naammassineqassanersut, unnerluussisussaatitaasup
Rashid F. Elkottip oqaatigisinnaanngilaa.
Unnerluutiginninneq tassaavoq suliap unnerluussutip, pinerlunnerup
suuneranik nassuiaat ilanngullugu, eqqartuussivimmut ingerlateqqinneqarnera.
Politiit unnerluutiginnittuugaluartut unnerluussisussaatitaasoq
unnerluutiginninniarnani aalajangersinnaavoq taamaalillunilu eqqartuussivimmi
pinerluttulerinermi suliaq unitsissinnaavaa. Tamanna suliani
eqqartuussinissamut pisarialinnik uppernarsaateqanngitsoq
unnerluussisussaatitaasoq isumaqaraangat pisinnaasarpoq.
Ininik pisillunilu tunisineq
Unnerluutigineqartunut pingasuusunut suliaq ininik illuutinillu
pisinermut, tunisinermut attartortitsinermullu tunngavoq. Suliaq tamarmi sanaartornermut illuutinullu
tunngassuteqarpoq.
- Kommunip
aningaasaatai taakkulu qanoq aqunneqarsimaneri pineqarput. Suliaq aningaasanik
peqquserlunnermut annertuumut tunngavoq, ringbindillu tallimaapput, unnerluussisussaatitaasoq
siornatigut Sermitsiamut oqaaseqarnikuuvoq.
Allaffissornikkut
pissutsit pasinartut Kommuneqarfik Sermersuumut aningaasatigut annertuumik
annaasaqaataasinnaasut paasineqartut unnerluutiginninnermi tunngaviusut
tusagassiutitigut nalunaarummi allassimavoq.
- Inatsisinik
unioqqutitsinerit akuerinngilakka. Innuttaasut aningaasaataat aquppagut,
taamaattumik uagut pisortatut inatsisinik unioqqutitsinerit paasigaangatsigit
pisussaaffeqarpugut qisuariarfigissallugit. Kommunip unnerluutiginninneranik
politiit suliaqarnissaat qilanaarivara, tamanna inatsisinik peqqissaartumik
misissuereernikkut pivoq, borgmesteriusimasoq Charlotte Ludvigsen, IA, tusagassiutitigut
nalunaarummi taama allappoq.
Pisortaasut soraarnerminnut
atatillugu annertuunik ajunngitsorsiassarsisut
Kommuunip pisortaasimasut Lars
Møller-Sørensen aamma Hans Hendrik Winther Johannsen aningaasanik
peqquserlussimasinnaasutut atorfimmillu atornerluisimassinnaasutut 2021-mi
ukiakkut politiinut unnerluutigisiniarlugit aalajangeraluartoq taakku
Kommuneqarfik Sermersuumiit juunimi juulimiluunniit soraarnerminnut atatillugu
annertuumik ajunngitsorsitinneqarput.
Lars Møller-Sørensen soraarnerminut
atatillugu 1,4 millionit koruuningajannik ajunngitsorsitinneqarlunilu 90.000
koruuninik soraarnerussutisiassaqartinneqarpoq, tassani Hans Henrik Winther Johannsen 1,1 millionit koruuninik soraarnerminut atatillugu ajunngitsorsitinneqarlunilu
soraarnerussutisiassaqartinneqartoq.
