Politiit: Macronip tikeraarnera eqqissisimasumik nuannersumillu ingerlavoq
Frankrigip præsidentiata sapaammi tikeraarnera isumannaallisaanikkut ajornartorsiuteqanngitsumik ingerlavoq, politiit nalunaarput.
Emmanuel Macronip sapaatiummat Nuummut tikeraarnerani politiit amerlasuut najuupput, tassanilu præsidentip ilaatigut innuttaasut amerlasuut ilassivai.
Assi: Oscar Scott Carl
Frankrigip præsidentiata nuimasup Emmanuel Macronip sapaammi tikeraarnera pissutigalugu Nuuk ulikkaarpoq.
Kalaallit Nunaanni Politiit tikeraarneq sioqqullugu tikeraarnerullu nalaani Nuummi takussaanerussallutik nalunaaruteqarsimapput. Tikeraarnermi ministeriuneq Mette Frederiksen aamma peqataasoq Naalakkersuisut siulittaasuat Jens-Frederik Nielsen (D) qaaqqusisuuvoq.
Tikeraarneq isumannaallisaanikkut ajortoqarsimanngitsoq politiit ataasinngornermi Sermitsiamut ilisimatitsipput.
Tikeraarneq piareersarneqarsimasoq oqartussaasullu akornanni ataqatigiissaarisoqartariaqarsimasoq politiit erseqqissaapput, taakkulu suleqatigiilluarput.
- Naalagaaffimmiit tikeraartoqarneq pilersaarusiornikkut oqartussaasullu, isumannaallisaasut minnerunngitsumillu innuttaasut akornanni suleqatigiinnermik annertuumik piumasaqaateqarpoq, politikommissær Brian Thomsen oqarpoq nangillunilu:
- Politiit isiginnittaaserput naapertorlugu tikeraarnerup eqqissisimasumik nuannersumillu ingerlanneqarnera naammagisimaarluarparput, tamannalu aamma innuttaasut aqqusinermi angallannermi allanngortitsigallarnermut atatillugu paasinninnerannik naammagittarnerannillu pissuteqarpoq.
Kalaallit Nunaanni Politiit sulisut suliaminnik pingaartitsinerat pillugu immikkut qujaffigerusullugillu innuttaasut tapersersuinerannut paasinninneralannullu qujaffigerusuppaat.
