Politikerit KNR pillugu: Tamanna akuerineqarsinnaanngilaq
KNR-imi siulersuisut nutaat suliassarpassuaqarput. Sulinermi atukkat misissorneqartariaqarput, aamma Naalakkersuisoq iliuuseqartariaqarpoq, politikerit ilaat taama qisuariarput.
Politikkimut KNR akuliunneqaqqittariaqarpoq. Inatsisartuni politikerit isumaqarput, tusagassiivik sulisunut tunngatillugu ingerlalluaqqilernissaa anguniarlugu iliuuseqartoqartariaqartoq.
Leiff Josefsen
Innuttaasunik kiffartuussivimmi KNR-imi sulisut 35-t qaammatini aqqanilinni kingullerni soraarsimapput, tassa agguaqatigiissillugu qaammatit tamaasa pingasut soraartarput.
Tamanna akuerineqarsinnaanngitsoq, sulisussanillu amigaateqarneq aaqqinniarlugu iliuuseqapallattoqartariaqartoq, Inatsisartuni politikerit oqarput.
- Uggornarpoq taama inissisimammat, tusagassiorfiimmi pissaanerup sisamaattut
inissisimatillutik eqqortumik pingaaruteqartumillu suliassaqarput. Soraartoqarnerani pissutsit suut tunngaviunersut
ilisimanngilagut. Kisianni taamaattoq sulisoqarnikkut ilungersunartoqarpat,
uppernarsarneqarpoq siulersuisut pinartumik suliassaqartut, Najaaraq Møller (S) Sermitsiamut oqarpoq.
Naleqqamittaaq sulisut qimaararnerat kamaatigineqarpoq, pissutsillu sukumiisumik misissorneqaqqissaarnissaannik piumasaqqinniarlutik, tassani siulittaasoq Pele Broberg oqarpoq.
- Pissutsit taamaannerat paasillugu ajuusaarnaqaaq. Aammali atorfeqartut taarserartillugit
qullersaqarfimmi ajortoqarneranik ersiutaasutut taaneqarsinnaavoq. Isumaqarpunga misissuisitsisoqartariaqartoq ilumut
KNR-ip inuiaqatigiinnik kiffartuussinissaq kivissinnaaneraa. Taamaanngippallu
allatut aaqqiisoqarsinnaanersoq, kiffartuussinissamik akisussaaffik allanut
tunniullugu, Pele Broberg oqarpoq.
Naalakkersuisoq iliuuseqartariaqarpoq
Piffissap ingerlanerani suliffimmi aalajangersimasumi taama amerlatigisunik soraartoqarnera nalinginnaanngitsoq, KNR-imi pisortaq Annga Lynge, septembarip aallaqqaataani atorfinitsinneqarsimasoq, Sermitsiamut oqarpoq. KNR-imi siulersuisuni siulittaasumik nutaamik, pisortamik nutaamik nutaarsiassanullu pisortamik nutaamik atorfinitsitsisoqaqqammersoq, Najaaraq Møllerip Siumumeersup tikkuarpaa.
KNR-imili aqutsisut nutaat Demokraatit isornartorsiorniarsarinngilaat.
- Pisortanngortoq sivitsulerpoq inissimmalli. Ajornartoorneq sakkortoorujussuartut
taaneqartariaqarpoq. Taamaammat pisariaqarluinnalerpoq Naalakkersuisuusoq akisussaasuusoq qanimut suleqatiginnilluni iliuuseqartariaqalersoq, akisussaaffimminillu tigusilluni suliniuteqarluni. KNR pisortat suliffeqarfiutaattut nunatta karsianit aningaasalersorneqarluni inissisimasuuvoq, Nivi Olsen oqarpoq.
Pele Broberg aamma taama isumaqarpoq:
- Akuersaarneqarsinnaanngilaq ukiumut 68 mio. kr.-ninik
taperneqartartoq, pisortat suliffeqarfiutaat, pitsanngorsaavigineqanngitsoq.
Suliffeqarfiup ineriartorneq malinnaaffigisinnaanngilaa, demokrati illersorlugu nakkutilliinini kivissinnaanagu. Ukiunilu kingullerni aamma kiffartuussinissamut isumaqatigiissutaasimasut nammassinnaanagit, akisussaasuusumit suleriartoqarniannginnera nassuerutigineqarneq ajormat ajuusaarnarpoq, oqarpoq.
Kajungilersitsineq sulisunillu attasineq
Sulisussanik kajungilersitsinissaq sulisunillu attassinissaq suliffeqarfiit soqutigigaat, politikerit erseqqissarpaat. Politikerit immaqa iliuuseqarsinnaapput:
- Politikkikkut ataasiakkaarluta soorunami
iluarsiinissamik suliaqarusuttarpugut. Kisimiillutali angusinnaasanngilarput. Soorlu
suliffeqarfiup soqutiginarsarneqassappat, eqaallisaaffigerusupparput.
Ineriartornerummi siuarsarnissaa, suliffiullu kajungernarnerulernissaa peqataaffigerusuppagut. Aammali ilisimavarput siulersuisunngortut
imaannaanngitsumik suliassaqartut, Najaaraq Møller oqarpoq.
Ilinniartitaanermut, kultureqarnermut, timersornermut ilageeqarnermullu naalakkersuisoq Aqqaluaq B. Egede, IA, oqaaseqartinniarlugu Sermitsiap sulissutigaa.
