KOMMUNIMUT QINERSINEQ 2025
Qeqertalik: Aqqalu Reimer borgmesterinngornissaminit tunuartoq
Siumup Naleqqamik Atassummillu suleqateqarluni Kommune Qeqertalimmi Aqqalu Reimer borgmesterinngortissallugu ataasinngormat nalunaarutigaat. Aqqalu Reimerip borgmesterinngornissaminit tunuarluni marlunngornermi unnukkut nalunaarutigaa.
Frantz Lundbladip borgmesteritut inissisimaffik tiguaa Aqqalu Reimerip inissisimaffik qimammagu kommunalbestyrelsimut sulilernissaminut aalisartuulluni piniartuullunilu.
Assi: Leiff Josefsen
Frantz Lundblad (S) Kommune Qeqertalimmi borgmesteritut maanna ivertinneqartussanngorpoq.
Aqqalu Reimer (S), kommunimi isumaqatiginninniarnermik siuttuusoq borgmesterinngorniarnerminit tunuarmat tamanna pivoq.
Kommune Qeqertalimmi apriilip aallaqqaataani qinersisoqarmat Siumut ajugaavoq. Aqqalu Reimer, Siumut sinnerlugu qineqqusaartuni taaguunneqarnerpaalluni 131-nit qinerneqarami borgmesterinngortussanngoraluarpoq.
Kommunimili innuttaasunit isornartorsiorneqarpoq, tassa politikkimi misilittagaqanngimmat sulinissaa innuttaasunit arlalinnit apeqquserneqarluni:
- Ilisimaneqartutut piniarneq aalisarnerlu inuussutissarsiutigaakka. Inuttut nammineq eqqarsaatigilluareerlugu borgmesterinngornissara Siumumi qiningaanerpaap tullianut Frantz Lundbladimut tunniuppara, Aqqalu Reimer Facebookimi quppernermini allappoq.
Amerlasuut nalunngilaat
inuuniutigisarlugu piniartuuneq aalisartuuneq. Sivisuumik eqqarsareerlunga
paasisimavara, inuussutissarsiutiga qimallugu borgmesterinngorsinnaanngitsunga.
Taamaattumik borgmesteritut inissisimaffik tullianut, Frantz Lundbladimut,
ingerlateqqippara, allappoq Aqqalu Reimer Facebookimi.
Ataatsimiititaliami suleqataassasoq
Frantz Lundblad Kommune Qeqertalimmi 124-nit qinerneqarpoq.
Aqqalu Reimerip politikki qimalluinnarnaviarnagu aamma nalunaarutigaa. Piniarnermik aalisarnermillu inuussutissarsiuteqarnermi saniatigut kommunalbestyrelsimi suliniarpoq, piniartullu atugaannut tunngasut suleqataaffiginissaat qilanaaraa:
- Ataatsimiisitaliami uanga anguniakkannut pingaaruteqartumi inuussutissarsiutinut siulittaasutut inissillunga sulilernissara qilanaarivara. Neriullunga uannit qinersisimasut amerlasuut paasinnillutik nalunaarutiga tigussagaat, Aqqalu Reimer allappoq.
Suleqatigiinnissamut isumaqatigiissut atsiorneqartoq
Siumup Naleraq Atassullu suleqatigiinnissamik isumaqatigiissuteqarfigai. Taamaalillutik kommunalbestyrelsimi arfineq-pingasunik ilaasortaatitaqarlutik amerlanerussuteqarput, IA Demokraatillu katillugit arfineq-marlunnik ilaasortaqartut.
Kommunip akisussaaffiinik aaqqissuusseqqinneq taakku sulissutigissavaat, taamaalilluni ingerlatsiviit allanngortinneqaqqissallutik. Tamatuma saniatigut suleqatigiit ESANI A/S-imi ilaasortaaneq nalilersorniarpaat, tassalu kommunip eqqagassalerineq nammineerluni ingerlateqqilernissaa pitsaanerunersoq paasiniarneqassalluni.
Suleqatigiit Siumut siuttoralugu Qeqertalik Business Council aamma atorunnaarsillugu kommunimi inuussutissarsiornermut tunngasut suliarilerniarpaat.
Taakku pingasut IA-p Kommune Qeqertalimmi aqutsinerani atuutilersinneqarnikuupput.
